போபால்: மத்திய பிரதேச மாநிலம் உஜ்ஜைனில் நடைபெற உள்ள கும்பமேளா விழாவையொட்டி அங்குள்ள ஷாஹி மசூதியின் ஒரு பகுதியை சாலை விரிவாக்க பணிக்காக இன்று இடிக்க அதிகாரிகள் சென்றனர். அப்போது அங்கிருந்தவர்கள் போராட்டம் நடத்திதோடு போலீசார் மீது கற்களை வீசி தாக்குதல் நடத்தினர். இதனால் போலீசார் கண்ணீர் புகை குண்டுகளை வீசியும், தடியடி நடத்தியும் போராட்டக்காரர்களை விரட்டியடித்த சம்பவம் பெரும் பரபரப்பை ஏற்படுத்தியது.
மத்திய பிரதேசத்தில் பாஜகவின் ஆட்சி நடக்கிறது. முதல்வராக மோகன் யாதவ் உள்ளார். வரும் 2028 ம் ஆண்டில் மத்திய பிரதேசத்தில் 2028 ம் ஆண்டில் கும்பமேளா நடைபெற உள்ளது. ஒவ்வொரு 12 ஆண்டுகளுக்கும் ஒருமுறை கும்பமேளா நடைபெறும். அந்த வகையில் மத்திய பிரதேசத்தின் உஜ்ஜைன் நகரில் .ள்ள ஷிப்ரா நதிக்கரையில் 2028 ம் ஆண்டில் கும்பமேளா நடைபெற உள்ளது. இந்த கும்பமேளாவை ஷிம்சாஸ்தா கும்பமேளா என்றும் அழைப்பார்கள். இந்த கும்பமேளாவையொட்டி இப்போதே பல்வேறு பணிகள் தொடங்கி உள்ளன. கும்பமேளாவிற்கு இந்தியா மட்டுமின்றி வெளிநாடுகளில் இருந்தும் பக்தர்கள் வந்து செல்வார்கள். இதனால் சாலை விரிவாக்கம் செய்யும் பணி தொடங்கி நடந்து வருகிறது. இந்த சாலை விரிவாக்க பணியின்போது மொத்தம் 272 கட்டுமானங்களை இடிக்க முடிவெடுக்கப்பட்டுள்ளது. இதில் உஜ்ஜைனில் உள்ள பழயைான ஷாஹி மசூதியின் ஒரு பகுதியும் உள்ளது. இதற்கு அங்குள்ள மக்கள் கடும் எதிர்ப்பு தெரிவித்தனர். நேற்று இரவு முதலே மசூதியை இடிக்க எதிர்ப்பு தெரிவித்து போராட்டங்களை நடத்தினர். இந்த மசூதி சுமார் 600 ஆண்டு பழமையான மசூதி. இதனால் இதனை இடிக்க கூடாது. இதற்கு பதிலாக மசூதிக்கு எதிரே உள்ள கட்டடங்களை அகற்றி சாலையை விரிவாக்கம் செய்ய வேண்டும் என்று அவர்கள் கூறினர். இதனால் பதற்றம் ஏற்பட்டது. அசம்பாவிதங்களை தவிர்க்க ஏராளமான போலீசாரும் குவிக்கப்பட்டனர். இன்று காலையில் ஷாஹி மசூதியை இடிக்க அதிகாரிகள் சென்றனர். அப்போது அவர்களுக்கு எதிர்ப்பு தெரிவித்து பொதுமக்கள் போராட்டம் நடத்தினர். இந்த சமயத்தில் போலீசார் மீது கல்வீசப்பட்டது. இதையடுத்து போலீசார் தற்காப்புக்காக கண்ணீர் புகை குண்டுகளை வீசியும், தடியடி நடத்தியும் போராட்டக்காரர்களை கலைத்தனர். பதற்றம் அதிகரித்ததால் உடனடியாக ஆர்ஏஎப் எனும் அதிவிரைவு படையினரும் குவிக்கப்பட்டனர். இதனால் உஜ்ஜைன் நகரில் பெரும் பதற்றம் ஏற்பட்டுள்ளது.