மயான வைராக்கியம்

துட்டனைக் கண்டால்
தூரவிலகென்ற முதுகட்டளை
தட்டாத குழந்தைதான்

கில்லியிலும் கோலியிலும் குட்டு
அரிசிமணியோடு மயிலிறகை
ஆட்டையைப் போடுவான்
தெரியாமல் குறிப்பேடு
பக்கம் கிழித்திடுவான்
முருகேசன் துட்டன்தான்
தூரப் போனாலும்

அரும்பும் கண்ணீரில்
ஆனந்தம் காண்பான்
என் வெறுப்பிற்கு விருப்பமாய்
என்றும் அவன்

இவன் இன்றே இறக்கமாட்டானா?
குழந்தை சாபத்தை
இறைவன் நிறைவேற்றினான்

ஊருணி நீச்சலில் உயிர்பலி
தினத்தந்தி சொன்னது
காலக் கப்பல் கடந்தது
குற்ற உணர்வின்றி

ஓய்வு பெற்றவுடன் மடிந்தான்
உயிர் நண்பனொருவன்
மயானத்தில் மனமொடிந்தேன்

வெக்கையில் நரம்பு
வெடித்து கிளம்பிய அவனுடல்
வெட்டியானடியில் அடங்கியது

புதைந்த பாலகன் முருகேசன்
புழுவாய் அரித்தது நினைவு