குரு பெயர்ச்சி.. மேஷத்தில் இருந்து ரிஷப ராசிக்கு பெயர்ச்சி அடைந்தார் குரு பகவான்.. சிறப்பு பூஜைகள்!

சென்னை: இன்று மாலை 5.19 மணிக்கு மேஷ ராசியில் இருந்து ரிஷப ராசிக்கு இடம்பெயர்ந்தார் குரு பகவான். குரு பெயர்ச்சியையொட்டி தமிழ்நாட்டில் சிறப்பு பூஜைகள் நடைபெற்று வருகின்றன.

நவ கிரகங்களில் கல்வி, திருமணம், புத்திசாலித்தனம், குழந்தைகள், பணம், செல்வச் செழிப்பு ஆகியவற்றுக்கான கிரகமாக உள்ள குரு பகவான் இன்று மேஷ ராசியிலிருந்து விலகி ரிஷப ராசிக்கு இடம்பெயர்ந்துள்ளார். இந்த குரு பெயர்ச்சி இந்த ஆண்டின் மிக முக்கியமான ஜோதிட நிகழ்வாக பார்க்கப்படுகிறது.

மேஷ ராசியில் இருந்த குரு பகவான் மே மாதம் ஒன்றாம் தேதி, சித்திரை மாதம் 18ஆம் நாளான இன்று வாக்கிய பஞ்சாங்கப்படி மாலை 5.19 மணிக்கு குரு பெயர்ச்சி அடைந்துள்ளார். இதையொட்டி கோயில்களில் வாக்கிய பஞ்சாங்க நேரப்படி சிறப்பு வழிபாடுகள் நடைபெற்று வருகின்றன.

குரு பெயர்ச்சியை முன்னிட்டு, தமிழ்நாட்டில் உள்ள பிரசித்தி பெற்ற குரு பகவான் தலங்களில் சிறப்பு பூஜைகள், அபிஷேகங்கள் நடைபெற்று வருகின்றன. குரு பெயர்ச்சி சிறப்பு பூஜைகளில் ஏராளமான பக்தர்கள் பங்கேற்று வழிபாடு செய்து வருகின்றனர்.

மேஷ ராசியில் இருந்து ரிஷப ராசிக்கு குரு பகவான் பெயர்ச்சியான நிலையில், ஆலங்குடி ஆபத்சகாயேஸ்வரஸ்வாமி திருக்கோவிலில் குருபகவானுக்கு சிறப்பு பூஜைகள் நடைபெற்று வருகின்றன. இதையொட்டி, அங்கு பக்தர்கள் திரளாக பங்கேற்றுள்ளனர்.

குரு பெயர்ச்சியை முன்னிட்டு கன்னியாகுமரி மாவட்டம் நாகர்கோவில் அருகே கள்ளியங்காடு சிவன் கோவிலில் ஓம குண்டங்கள் வளர்த்து பரிகார பூஜைகளும் சிறப்பு பூஜைகளும் நடைபெற்றன. இதில் ஏராளமான பக்தர்கள் கலந்து கொண்டனர்.

திட்டக்குடி குரு கோயில், ஆவடி அருகே பாடியில் அமைந்துள்ள சிவன் கோயிலிலும் சிறப்பு ஆராதனைகள் நடைபெற்று வருகின்றன. குரு பகவானுக்கு பிரசித்தி பெற்ற கோவில்களில் எல்லாம் மக்கள் குவிந்து வழிபட்டு வருகின்றனர்.

குருவின் பார்வை பெறும் ராசிகள் பூரண பலன்களை பெறும் என்பது ஐதீகம். அதன்படி, ரிஷப ராசியில் இருந்து தனது ஐந்தாம் பார்வையால் கன்னி ராசியையும், ஏழாம் பார்வையால் விருச்சிக ராசியையும், ஒன்பதாம் பார்வையால் மகர ராசியையும் பார்க்கிறார் குரு.

குரு பெயர்ச்சியின் தாக்கத்தால் பரிகார ராசிகளான ரிஷபம், மிதுனம், சிம்மம், துலாம், தனுசு, கும்பம், மீனம் ஆகிய ராசிக்காரர்கள் பரிகாரம் செய்து குரு பகவானை வழிபட்டனர்.

English summary

Today at 5.19 pm Guru Bhagavan moved from Aries to Taurus. Special poojas are being held in Tamil Nadu on the occasion of the Guru's migration.