ஹார்லி டேவிட்சனை விடுங்க.. ராயல் என்பீல்டுக்கு வந்த அடுத்த போட்டி.. அசர வைத்த ட்ரையம்ப் ஸ்பீட் 400

சென்னை: இந்தியாவின் மோட்டார்சைக்கிள் நிறுவனமான பஜாஜ் ஆட்டோ, இங்கிலாந்தின் ட்ரையம்ப் மோட்டார் சைக்கிள்களுடன் இணைந்து இந்தியாவில் இரண்டு புதிய பைக்குகளை வெளியிட முடிவு செய்துள்ளது.

அதன்படி 400சிசி பைக்குகளான ஸ்பீட் 400 மற்றும் ஸ்க்ராம்ப்ளர் 400 எக்ஸ் ஆகியவற்றை கடந்த வாரம் இவர்கள் கூட்டணி அறிமுகப்படுத்தியது. ஸ்பீட் 400 விலை ரூ.2.33 லட்சம். இருந்தாலும், முதல் 10,000 வாடிக்கையாளர்கள் இதை ரூ.2.23 லட்சத்திற்கு வாங்கலாம். ஸ்க்ராம்ப்ளர் 400 இன் விலை கடந்த வாரம் அறிவிக்கப்படவில்லை.

இதன் விலை 2.90 லட்சம் ரூபாய் வரை இருக்கும் என்று எதிர்பார்க்கப்படுகிறது. இரண்டு மோட்டார் சைக்கிள்களும் 16000 கிமீ சர்வீஸ் இண்டர்வல் மற்றும் இரண்டு வாரண்டி கொண்டது. இரண்டு பைக்குகளும் ஹின்க்லியில் உள்ள ட்ரையம்ப் நிறுவனம் மற்றும் பஜாஜ் ஆட்டோவுடன் இணைந்து வடிவமைக்கப்பட்டுள்ளது.

மிகவும் ஹை எண்ட் மாடலான இரண்டு பைக்கும் மிக குறைந்த விலையில் இந்திய மார்கெட்டிற்கு வருவதால் ராயல் என்பீல்ட்க்கு இது பெரிய போட்டியாக இருக்கும் என்று எதிர்பார்க்கப்படுகிறது. ட்ரையம்ப் 400 மாடலானது 398.15 சிசி, சிங்கிள்-சிலிண்டர், லிக்விட்-கூல்டு எஞ்சின் ஆகும், இது 8,000 ஆர்பிஎம்மில் 40 பிஎஸ் அதிகபட்ச ஆற்றலையும், 6,500 ஆர்பிஎம்மில் 37.5 என்எம் பீக் டார்க்கையும் வெளிப்படுத்தும். இன்ஜின் 6-ஸ்பீடு கியர்பாக்ஸுடன் அசிஸ்ட் மற்றும் ஸ்லிப்பர் கிளட்ச் உடன் இணைக்கப்பட்டுள்ளது.

இதன் வருகையால் இந்தியாவில் ராயல் என்பீல்டு மார்கெட்டிற்கு மிகப்பெரிய போட்டி நிலவி உள்ளது. இந்திய மார்க்கெட்டில் கோலோச்சும் டாப் எண்ட் மாடல் பைக் என்றால் அது ராயல் என்பீல்டுதான். தற்போது வீட்டிற்கு ஒரு புல்லட் என்று சொல்லும் அளவிற்கு விலை அதிகம் இருந்தாலும் கூட மார்க்கெட்டில் இவர்கள்தான் டாப்பில் இருக்கிறார்கள்.

இந்த நிலையில் ராயல் என்பீல்டுக்கு போட்டியாக சமீபத்தில் ஹார்லி டேவிட்சன் பைக் தனது விலை குறைந்த மாடலை களமிறக்கியது. அமெரிக்காவின் விஸ்கான்சினை தளமாகக் கொண்ட வாகன உற்பத்தியாளர் மில்வாக்கி, இரு சக்கர வாகனத் துறையில் இந்தியாவில் டாப்பில் உள்ள Hero MotoCorp இரண்டும் சேர்ந்துதான் இந்த புதிய மாடலை வெளியிட்டு உள்ளன.

ஹீரோ நிறுவனம் ஹூண்டாய் உடன் உறவை முறித்துக்கொண்ட பின் தனியாக பைக் தயாரித்து வந்தது. இந்த நிலையில் அந்த உறவு முறிவிற்கு பைக் தயாரிக்க வேறு ஒரு பெரிய நிறுவனத்துடன் கைகோர்ப்பது இதுவே முதல்முறை. தி மில்வாக்கி - ஹீரோ இணைந்து இந்த புதிய மலிவான Harley Davidson மாடலை வெளியிட்டு உள்ளது.

ஹார்லி டேவிட்சன் X440 என்பதுதான் இந்த மாடலின் பெயர். இது சிங்கிள் சிலிண்டர், 440சிசி மோட்டார் சைக்கிள் ஆகும். இது ராயல் என்ஃபீல்டின் 350சிசி வண்டியை விட கொஞ்சம் நல்ல திறன் கொண்ட , அதற்கு போட்டியாக களமிறக்கப்பட்ட பைக்காக பார்க்கப்படுகிறது.

இதன் ஷோரூம் விலை - ₹ 2.3 லட்சம் ஆகும். ஆன் ரோடு விலை 2.5- 2.7 லட்சம் வரை இருக்கும். ஏற்கனவே அதிகம் விற்பனையாகும் ராயல் என்ஃபீல்டு கிளாசிக் 350-ன் டாப் மாடலை விட சில ஆயிரம் ரூபாய் மட்டுமே இந்த ஹார்லி மாடல் அதிகம். இதனால் தற்போது பலரும் ஹார்லி பக்கம் திரும்பும் வாய்ப்புகள் உள்ளன. இதற்கு முன்பாக இந்தியாவில் தற்போது விற்பனையில் உள்ள மலிவான ஹார்லி நைட்ஸ்டர், விலை 17.49 லட்சத்தில் (எக்ஸ்-ஷோரூம்) தொடங்குகிறது.

இதை வாங்குவது பலருக்கும் எட்டா கனவு என்ற நிலையில்தான் தற்போது ஹார்லி டேவிட்சன் X440 வெறும் இரண்டரை லட்சத்திற்கு களமிறக்கப்பட்டு உள்ளது. மொத்தம் இந்த ஹார்லி மாடலில் மூன்று வகைகள் உள்ளன - பேசிக் வகை 'டெனிம்' ₹ 2.29 லட்சத்திற்கும், மிட்-ஸ்பெக் 'விவிட்' ₹ 2.49 லட்சத்திற்கும் மற்றும் டாப் ஸ்பெக் டிரிம் 'எஸ்' ₹ 2.69 லட்சத்திற்கும். அனைத்து விலைகளும் எக்ஸ்-ஷோரூம் விலைகள் ஆகும்.

ஆன் ரோடு விலை இதைவிட 30 ஆயிரம் வரை அதிகம் இருக்கலாம். இந்த மோட்டார் சைக்கிள் ரெட்ரோ ஸ்ட்ரீட் ஸ்டைல் வடிவமைப்பைக் கொண்டுள்ளது, ஹார்லி XR1200 இலிருந்து இன்ஸ்பயர் ஆன மாடல் போல உள்ளது. பொதுவாக ஹார்லியில் இருக்கும் வழக்கமான நீட்டிக்கப்பட்ட க்ரூஸர் வடிவமைப்பைப் போலல்லாமல் இதில் கொஞ்சம் மாறுபட்ட தோற்றம் உள்ளது.

இது, 27 பிஎஸ் பவர், 38 என்எம் டார்க் மற்றும் ஆறு கியர் கொண்ட பாக்ஸைக் ஆகியவற்றை கொண்டுள்ளது. ஒரு லிட்டர் பெட்ரோல் 25 கிலோமீட்டர் வரை மைலேஜ் வழங்க முடியும் என்று இந்த நிறுவனம் கூறுகிறது. ஆனால் ஆன் ரோடில் இந்திய சாலைகளில் இது 20 ஆக குறையும் வாய்ப்புகள் உள்ளன.

இதன் அடிப்படை வேரியண்டில் சக்கரங்கள் வயர் ஸ்போக்ஸ் உடன் வருகிறது. அதே நேரத்தில் அதிக விலை கொண்ட வேரியண்டில் அலாய் வீல்கள் மற்றும் இரண்டு-டோன் வண்ணங்களுடன் வருகின்றன. ராயல் என்ஃபீல்டுக்கு போல இல்லாமல், இந்த ஹார்லியில் KYB 43mm சஸ்பென்ஷன் உள்ளது. இது தலைகீழாக அமைக்கப்பட்டு உள்ளது.

English summary

Another competitor for Royal Enfield: After Harley Davidson X440, Now Triumph speed 400 Launched.