தமிழக அரசு சிக்ஸர்.. 4 மண்டலங்களாகப் பிரியும் நெடுஞ்சாலைத் துறை! இனி வேலைகள் ஜெட் வேகம்! எப்படி?

Updated: Thursday, March 19, 2026, 16:02 [IST]

Subscribe to Oneindia Tamil

சென்னை: தமிழக அரசின் மிக முக்கியமான துறைகளில் ஒன்றான நெடுஞ்சாலைத் துறையில் தற்போது ஒரு பிரம்மாண்ட 'நிர்வாக சீர்திருத்தம்' (Administrative Reform) அரங்கேறியிருக்கிறது. "கோப்புக்கள் இனி தேங்காது, வேலைகள் இனி இழுத்தடிக்கப்படாது" என்கிற நம்பிக்கையோடு இந்த அதிரடி மறுசீரமைப்பு ஆணையை வெளியிட்டிருக்கிறது தமிழக அரசு.

என்ன மாற்றம்? ஏன் இந்த அதிரடி?

இதுவரை சென்னைைத் தலைமையிடமாகக் கொண்டு இயங்கி வந்த நெடுஞ்சாலைத் துறையின் நான்கு முக்கியப் பிரிவுகள்:

கட்டுமானம் மற்றும் பராமரிப்பு (C&M)
திட்டங்கள் (Projects)
நபார்டு மற்றும் கிராம சாலைகள் (Rural Roads & NABARD)
மெட்ரோ (Metro)

இந்த நான்கு பிரிவுகளும் இதுவரை தனித்தனித் தீவுகளாகச் செயல்பட்டு வந்தன. ஒரு சிறிய பாலத்தைக் கட்ட ஒரு பிரிவு, அந்தச் சாலையைப் பராமரிக்க ஒரு பிரிவு எனப் பிரிந்து கிடந்ததால், ஒரு திட்டத்தை முடிக்கப் பல கட்டத் தடைகளைத் தாண்ட வேண்டியிருந்தது. இப்போது இவை அனைத்தும் ஒருங்கிணைக்கப்பட்டு, சென்னை, மதுரை, திருச்சி, மற்றும் கோவை என நான்கு மண்டலங்களாகப் பிரிக்கப்பட்டுள்ளன.

அதிகாரிகள் சந்திக்கும் 'பயண' சவால்!

சுமார் 70,000 கிலோமீட்டர் நீளமுள்ள சாலைகள், உயர்மட்ட மேம்பாலங்கள், ரயில்வே மேம்பாலங்கள் (RoB), சுரங்கப்பாதைகள் எனப் பிரம்மாண்டமான பணிகளைக் கவனிக்கும் இந்தத் துறையில், இதுவரை இருந்த மிகப்பெரிய மைனஸ் - தூரம்.

"ஆய்வுப் பணிகளுக்காகச் சென்னையிலிருந்து அதிகாரிகள் கன்னியாகுமரி வரை பயணிக்க வேண்டியிருந்தது. ஒரு முடிவை எடுக்கவும், கையெழுத்து வாங்கவும் பல நாட்கள் காத்திருக்க வேண்டிய சூழல். இதனால் திட்டப்பணிகள் முடிவதில் பெரும் தொய்வு ஏற்பட்டது" என்கிறார்கள் துறை சார்ந்த வல்லுநர்கள்.

மண்டல வாரியாகப் பிரிப்பதால் கிடைக்கும் நன்மைகள்:

சீரான பணிப்பகிர்வு: கட்டுமானம் மற்றும் பராமரிப்புப் பிரிவில் எப்போதும் வேலைப்பளு அதிகமாக இருக்கும். அதேநேரம், கிராம சாலைகள் அல்லது திட்டப் பிரிவில் சில நேரங்களில் பணிகள் குறைவாக இருக்கும். இனி மண்டல வாரியாக ஒருங்கிணைக்கப்படுவதால், பொறியாளர்கள் மற்றும் பணியாளர்களைத் தேவையைப் பொறுத்துச் சரியாகப் பயன்படுத்த முடியும்.

வேகமான முடிவுகள்: ஒவ்வொரு மண்டலத்திற்கும் ஒரு தலைமைப் பொறியாளர் (Chief Engineer) தலைமை தாங்குவார். இதனால் உள்ளூர் திட்டங்களுக்குப் பச்சைக்கொடி காட்ட இனி சென்னை வரை கோப்புகள் ஓட வேண்டிய அவசியமில்லை.

நேரடி மேற்பார்வை: தலைமைப் பொறியாளர்கள் அந்தந்த மண்டலங்களிலேயே தங்கியிருந்து பணிகளை ஆய்வு செய்ய முடியும் என்பதால், தரக் குறைபாடுகள் குறையும்.

தமிழகத்தின் உள்கட்டமைப்புப் பணிகளில் இந்த 'யுனிஃபைட் ஸ்ட்ரக்சர்' (Unified Structure) ஒரு மைல்கல் என்பதில் மாற்றுக் கருத்தில்லை. நிர்வாக ரீதியாகத் துறையை ஒருங்கிணைப்பது வரவேற்கத்தக்கது என்றாலும், இந்த மாற்றம் வெறும் காகிதத்தோடு நின்றுவிடாமல், குண்டும் குழியுமான சாலைகளுக்கு விரைவில் 'விடிவு காலம்' தருமா என்பதுதான் சாமானிய மக்களின் எதிர்பார்ப்பு. ஆனால் தேர்தலுக்கு பின்பே இது நடைமுறைக்கு வரும் என்பதும் குறிப்பிடத்தக்கது.

கோவையில் ஒரு பாலம் கட்டும் பணி இனி கோவை மண்டலத்திலேயே முடிவெடுக்கப்படும் என்பது அந்தப் பகுதி மக்களுக்குக் கிடைத்த இனிப்பான செய்திதான். நிர்வாகம் பரவலாக்கப்படுவது வளர்ச்சிக்கான அறிகுறி. வேலைகள் இனி 'ஹைவேஸ்' வேகத்தில் நடக்குமா என்பதைப் பொறுத்திருந்து பார்ப்போம்!