உதயநிதி மேஜைக்கு போன ரிப்போர்ட்.. சென்னை மெரினா சாலை தடம் தெரியாமல் மாறுது.. மிகப்பெரிய பிளான்

Updated: Thursday, November 27, 2025, 9:31 [IST]

Subscribe to Oneindia Tamil

சென்னை: சென்னையில் நாளுக்கு நாள் அதிகரித்து வரும் போக்குவரத்து நெரிசலைக் குறைக்கும் பொருட்டு, பெருநகர சென்னை மாநகராட்சி (GCC) புதிய திட்டங்களை வகுத்துள்ளது. இதன் ஒரு பகுதியாக, மெரினா காமராஜர் சாலையை எட்டு வழித்தடச் சாலையாக அகலப்படுத்துவதுடன், டாக்டர் ராதாகிருஷ்ணன் சாலை மற்றும் சர்தார் படேல் சாலையில் துணைச் சாலைகள் அமைப்பதற்கான வடிவமைப்புகளை உருவாக்க ஆலோசகர்களிடம் இருந்து ஒப்பந்தப்புள்ளி கோரியுள்ளது.

இந்தத் திட்டம் தற்போது ஆரம்ப கட்டத்தில் இருப்பதாக GCC அதிகாரி ஒருவர் தெரிவித்தார். தேசிய சாலைத் திட்டமிடல் வழிகாட்டுதல்களின்படி வடிவமைப்புகள் உருவாக்கப்படும். ஆனால், புதிய சிக்கல்களை உருவாக்காமல், நெரிசலைத் தீர்க்கும் நடைமுறைத் தீர்வுகளுக்கே முன்னுரிமை அளிக்கப்படும் என்றும் அவர் கூறினார். இத்திட்டத்தின் கீழ், தனியார் நிலம் கையகப்படுத்துவது குறித்த ஆய்வும் நடத்தப்படும்.

உதயநிதி ஸ்டாலின் மேஜையில் திட்டம்

சென்னை நகரில் சுரங்கப்பாதைகள் அல்லது மேம்பாலங்களை மட்டுமே நம்பியிருக்க முடியாது என்றும், தீர்வுகள் தேவை என்றும் நாடாளுமன்ற உறுப்பினர் தயாநிதி மாறன் வலியுறுத்தியுள்ளார். இது தொடர்பாக துணை முதல்வர் உதயநிதி ஸ்டாலினிடம் ஒரு திட்டத்தை சமர்ப்பித்துள்ளதாகவும் அவர் குறிப்பிட்டார்.

நகரின் போக்குவரத்து நெரிசலைக் குறைக்க அவர் ஆர்வமாக உள்ளார். கோட்டூர்புரம்-சர்தார் படேல் சாலை சந்திப்பில் விமான நிலையம், OMR, ECR ஆகியவற்றை நோக்கிச் செல்லும் வாகனங்களும், இரு திசைகளில் இருந்தும் கோட்டூர்புரம் நோக்கி வரும் வாகனங்களும் அடிக்கடி நெரிசலை ஏற்படுத்துகின்றன. எனவே, இந்தச் சாலையில் ஒரு துணைச் சாலை அமைப்பது அவசியம்," என்று தயாநிதி மாறன் விளக்கினார்.

அதிகரித்து வரும் சாலை வசதிகள் தற்காலிக நிவாரணம் மட்டுமே அளிக்கும், ஆனால் இறுதியில் அடிப்படை சிக்கலை மோசமாக்கும் என்று வல்லுனர்கள் தெரிவிக்கின்றனர்.

புதிய சாலைகள், மேம்பாலங்கள் மற்றும் சுரங்கப்பாதைகள் விரைவில் அதிக கார்களால் நிரம்பி, அதே நெரிசலை மீண்டும் உருவாக்கும், அதே சமயம் நகர்ப்புறச் சூழலை மேலும் சீரழிக்கும். உயர்தர, ஒன்றோடொன்று இணைக்கப்பட்ட பொதுப் போக்குவரத்து வலையமைப்பிலும், நடைபாதைகள் நிறைந்த சாலைகளிலும் தொடர்ச்சியாக முதலீடு செய்வதே ஒரே நிலையான வழி என்று வல்லுனர்கள் தெரிவிக்கின்றனர்.

சர்தார் பட்டேல் சாலை

அதேபோல் சென்னையில் சர்தார் படேல் சாலையில் இருந்த நடைபாதை அளவு குறைக்கப்பட்டு உள்ளது. இதையடுத்து இங்கே சர்தார் படேல் சாலையை அகலப்படுத்தும் பணிகள் நடந்து வருகின்றன.

சென்னை சர்தார் படேல் சாலையை அகலப்படுத்தும் திட்டத்திற்காக மாநில நெடுஞ்சாலைத் துறை விரைவில் டெண்டர்களை வெளியிட உள்ளது. தற்போதைக்கு அங்கே நடைமேடை மட்டும் சிறிதளவு தாக்கப்பட்டு உள்ளது. பல லட்சம் ஊழியர்கள் பயணம் செய்யும் இச்சாலையின் மேம்பாட்டிற்கு ₹45 கோடி செலவாகும் என மதிப்பிடப்பட்டுள்ளது. இரு கூடுதல் பாதைகள் அமைத்தல், பாதசாரிகளுக்கான நடைபாதைகளை மேம்படுத்துதல், மற்றும் ஐஐடிக்கு அருகிலுள்ள புற்றுநோய் மையத்தைச் சுற்றி ஒலி தடுப்புச் சுவர் கட்டுதல் ஆகியவை இத்திட்டத்தின் முக்கிய அம்சங்களாகும்.

சர்தார் படேல் சாலை

இச்சாலை, ஆறு வழித்தடங்களைக் கொண்ட ஐடி காரிடர் மற்றும் அண்ணா சாலை ஆகிய இரு முக்கிய சாலைகளை இணைக்கிறது. "கல்வி நிறுவனங்கள் மற்றும் நினைவிடங்கள் நிறைந்த இச்சாலை, அதன் அகலத்தை தக்கவைத்துக் கொள்வது அவசியம். மத்திய கைலாஷ் சந்திப்பில் மேம்பாலம் கட்டப்பட்டதால், அதன் கீழ் உள்ள சாலை சுமார் 400 மீட்டர் தூரத்திற்கு ஏற்கனவே அகலப்படுத்தப்பட்டுள்ளது," என ஓர் அதிகாரி தெரிவித்துள்ளார்.

ஐஐடி மெட்ராஸ் முதல் அண்ணா சாலை வரையிலான பகுதி விரிவுபடுத்தப்பட்டு, அதிக வாகனங்களைச் செல்ல அனுமதிக்கும் என்று அவர் மேலும் கூறினார். இத்திட்டப்பணிகள் இரண்டு கட்டங்களாக மேற்கொள்ளப்படும். முதல் கட்டமாக, ஐஐடி மெட்ராஸ் முதல் ராஜ்பவன் வரையிலான 1.70 கி.மீ தூரப் பணிகள் தொடங்கும்.

அதைத் தொடர்ந்து, ராஜ்பவன் முதல் அண்ணா சாலை வரையிலான 0.80 கி.மீ தூரம் கொண்ட இரண்டாம் கட்டப் பணிகள் மேற்கொள்ளப்படும். சில மாதங்களுக்கு முன்பு, நெடுஞ்சாலைத் துறை அமைச்சர் எ.வ.வேலு, மேம்பால ஆய்வுக்குப் பிறகு சாலையின் அகலத்தை நேரில் ஆய்வு செய்திருந்தார்.