கர்நாடகாவில் EV கார் வாங்கினால் சார்ஜ் இறங்குமேங்குற பயமே இல்லாமல் வண்டி ஓட்டிட்டே இருக்கலாம்!

பெங்களூர்: மின்சார வாகன (EV) பயன்பாட்டை ஊக்குவிப்பதில் கர்நாடகா மாநிலம் முன்னணியில் உள்ளது. குறிப்பாக, பொது சார்ஜிங் நிலையங்களை அமைப்பதில் இது மற்ற மாநிலங்களை விட மிக அதிகமாக உள்ளது.

பீரோ ஆஃப் எனர்ஜி எஃபிஷியன்சி (BEE) வெளியிட்டுள்ள தரவுகளின்படி, கர்நாடகாவில் மொத்தம் 5,880 பொது சார்ஜிங் மையங்கள் உள்ளன. இதில், 4,626 மையங்கள் முதன்மை நகரங்களில் (Tier-1), குறிப்பாக தலைநகர் பெங்களூருவில் அமைந்துள்ளன. கடந்த 5 ஆண்டுகளில் இந்த மையங்கள் அமைக்கப்பட்டுள்ளன. இது மகாராஷ்டிராவை (2,454 மையங்கள்) மற்றும் டெல்லியை (1,951 மையங்கள்) விட மிக அதிகம்.

மாநிலம் முழுவதும் விரிவாக்கம்

பெங்களூரில் சார்ஜிங் மையங்கள் அதிகமாக இருந்தாலும், கர்நாடகா முழுவதும் இந்த வசதி விரிவடைந்து வருகிறது. இரண்டாம் நிலை நகரங்களில் (Tier-2) 285 மையங்களும், மூன்றாம் நிலை நகரங்களில் (Tier-3) 969 மையங்களும் உள்ளன.

வெற்றிக்கு காரணம் என்ன?

மாநில எரிசக்தி துறை அதிகாரிகள் கூறுகையில், சுற்றுச்சூழல் பாதுகாப்பு மற்றும் சரியான கொள்கை முடிவுகளே இந்த வளர்ச்சிக்கு காரணம். எரிபொருள் விலை உயர்வு மற்றும் நகர்ப்புற காற்றின் தரம் குறைவது மின்சார வாகன பயன்பாட்டை அதிகரித்துள்ளது. 2017-ல் மின்சார வாகனக் கொள்கையை வெளியிட்ட முதல் மாநிலம் கர்நாடகா தான். இதுவே தற்போதைய வளர்ச்சிக்கு அடித்தளம் அமைத்தது.

மத்திய அரசின் FAME திட்டம், பெங்களூரு மின்சார விநியோக நிறுவனம் (Bescom) முதலீடுகள், போக்குவரத்து துறையின் பசுமை வரி வருவாய் மற்றும் தனியார் பங்களிப்புகள் ஆகியவை இந்த சார்ஜிங் வசதிகளை அமைக்க உதவியுள்ளன.

எதிர்கால திட்டங்கள்

மாநில அரசின் சமீபத்திய பட்ஜெட்டில் மின்சார வாகன மேம்பாட்டிற்காக பல முக்கிய அறிவிப்புகள் வெளியாகியுள்ளன.

பெங்களூரு பகுதியில் அதிநவீன மின்சார வாகன சோதனை மையம் (EV testing track) அமைக்கப்படும்.
மின்சார வாகன உற்பத்தி மற்றும் ஆராய்ச்சி மையம் உருவாக்கப்படும்.
இதற்காக ரூ.50,000 கோடி முதலீட்டை ஈர்த்து, 1 லட்சம் வேலை வாய்ப்புகளை உருவாக்க அரசு இலக்கு நிர்ணயித்துள்ளது.

மின்சார பேருந்துகள்

பொது போக்குவரத்தை மின்மயமாக்கும் திட்டத்தின் கீழ், 14,750 மின்சார பேருந்துகள் இயக்கப்பட உள்ளன. இதில் 9,000 பெங்களூர் மாநகர போக்குவரத்துக் கழகத்தில் (BMTC) சேர்க்கப்படும். இந்த நிதியாண்டில் மட்டும் 716 மின்சார பேருந்துகள் அறிமுகப்படுத்தப்பட்டுள்ளன.

சமூக ஆதரவு

பின்தங்கிய சமூகங்களைச் சேர்ந்த வேலையில்லாத இளைஞர்களுக்கு மின்சார நான்கு சக்கர வாகனம் வாங்க ரூ.3 லட்சம் வரை நிதியுதவி வழங்கும் திட்டமும் அறிவிக்கப்பட்டுள்ளது.

நிபுணர்கள் கருத்து

போக்குவரத்து நிபுணர்கள் கூறுகையில், கர்நாடகாவின் ஆரம்பகால கொள்கை முடிவுகளே இந்த வெற்றிக்கு காரணம். சார்ஜிங் நிலையங்கள் அதிகம் இருப்பது மக்கள் மத்தியில் நம்பிக்கையை ஏற்படுத்தியுள்ளது.

ஆனால், சார்ஜிங் நிலையங்களுக்கு இடையேயான இணைப்பு (interoperability), விலை நிர்ணயம் மற்றும் நேரடி தகவல்களை (real-time data) மேம்படுத்த வேண்டும் என அவர்கள் வலியுறுத்துகின்றனர். இரண்டாம் நிலை, மூன்றாம் நிலை நகரங்கள் மற்றும் தேசிய நெடுஞ்சாலைகளிலும் சார்ஜிங் வசதிகளை விரிவுபடுத்துவது அவசியம் என்றும் அவர்கள் தெரிவித்துள்ளனர்.

நாடு முழுவதும் மொத்தம் 26,367 பொது சார்ஜிங் மையங்கள் உள்ளன. ஆனால், பல மாநிலங்களில் முக்கிய நகரங்களைத் தவிர மற்ற பகுதிகளில் இந்த வசதி குறைவாக உள்ளது என்பது குறிப்பிடத்தக்கது.

English summary

Karnataka has emerged as the front-runner in India's electric vehicle (EV) charging infrastructure, boasting the highest number of public charging stations with 5,880 points statewide, primarily concentrated in Bengaluru (4,626 in tier-1 cities). This significantly surpasses other states like Maharashtra and Delhi. The state's success is attributed to its early 2017 EV policy, environmental concerns, rising fuel prices, and funding mechanisms like the FAME scheme, Bescom investments, and public-private partnerships. Future plans announced in the 2025-26 budget include establishing an EV testing track and a manufacturing/research cluster in Bengaluru with targets of ₹50,000 crore investment and 1 lakh jobs. The state is also focused on electrifying public transport with plans to deploy 14,750 electric buses and offers financial aid for EV purchase to support communities. While experts commend the policy, they suggest improvements in interoperability, standardization, and expanding infrastructure to smaller cities and national highways. India currently has 26,367 public charging stations nationwide, but regional disparities exist.