இதுதான் டாடா.. கிராஷ் டெஸ்டில் அசத்திய நெக்ஸான் எஸ்யூவி.. அதுவும் 5 ஸ்டார்.. என்ன நடந்தது?

சென்னை: பிரபலமான எஸ்யூவியான டாடா நெக்ஸான், குளோபல் என்சிஏபி கிராஷ் டெஸ்ட்களில் 5-ஸ்டார் மதிப்பீட்டைப் பெற்று அதன் பாதுகாப்பை மீண்டும் நிரூபித்துள்ளது.

சமீபத்திய மதிப்பீடு 2022 இல் அறிமுகப்படுத்தப்பட்ட கடுமையான தரநிலைகளை அடிப்படையாகக் கொண்டது. இது வாகனப் பாதுகாப்பில் நெக்ஸான் தொடர்ந்து முன்னணியில் உள்ளது என்பதைக் காட்டுகிறது.

கடுமையான விதிகள்: 2018 இல் அதன் முந்தைய மதிப்பீட்டை ஒப்பிடும்போது, ​​மிகவும் கடுமையான சோதனை அளவுகோல்களை அறிமுகப்படுத்திய போதிலும், நெக்ஸான் அதன் உயர் பாதுகாப்பு மதிப்பீட்டைத் தக்க வைத்துக் கொண்டுள்ளது. அதாவது கடுமையான ரூல்ஸ் இருந்தும் கூட நெக்ஸான்
5 ஸ்டார் பெற்றுள்ளது.

பெரியவர்கள் மற்றும் குழந்தைகள் இருவருக்கும் சிறந்த பாதுகாப்பை வழங்குவதில் இது தனித்து நிற்கிறது, இந்திய கார்களில் பாதுகாப்பு மதிப்பெண்களில் டாடா சஃபாரி/ஹாரியருக்கு அடுத்தபடியாக இரண்டாவது இடத்தைப் பிடித்துள்ளது.. முன்பக்கம் இருப்பவர்கள் மட்டுமின்றி பின்பக்கம் இருப்பவர்களும் இதனால் பாதுகாப்பாக இருப்பதாக ரிப்போர்ட் தெரிவித்துள்ளது.

பாதுகாப்பு முடிவுகள்: வயது வந்தோருக்கான பாதுகாப்பு: இது 34 இல் 32.22 புள்ளிகளைப் பெற்றது.

குழந்தைகளுக்கான பாதுகாப்பு: இது 49 இல் 44.52 புள்ளிகளைப் பெற்றது.

நெக்ஸான் முன்பக்க விபத்தின் போது ஓட்டுநர்கள் மற்றும் பயணிகளின் தலை மற்றும் கழுத்துக்கு வலுவான பாதுகாப்பை வழங்குகிறது என்று சோதனைகள் காட்டுகின்றன. இது முன்பக்கத்தில் இருப்பவர்களுக்கு முழங்கால் பாதுகாப்பையும், ஓட்டுநர் மற்றும் பயணிகளின் கால் முன்னெலும்புக்கு போதுமான நல்ல பாதுகாப்பையும் வழங்குகிறது.

நெக்ஸான் கார் தலை, வயிறு மற்றும் இடுப்பை நன்கு பாதுகாத்து உள்ளது. அதே நேரத்தில் போதுமான மார்புப் பாதுகாப்பையும் வழங்கி உள்ளது. இதன் ஏர்பேக்குகள் சிறப்பாக செயல்பட்டு உள்ளன. தலை மற்றும் இடுப்பை இவை திறம்பட பாதுகாத்து உள்ளன.

அசத்தும் டாடா; இதற்கு இடையே, Tata Motors இன் துணை நிறுவனமான Tata Passenger Electric Mobility (TPEM) அதன் Nexon.ev மற்றும் Tiago.ev ஆகியவற்றின் விலைகளை குறைத்துள்ளது. இதன் மூலம் இவி வாகனங்களின் விலை எதிர்பார்க்காத அளவிற்கு குறைந்துள்ளது.

Nexon.ev விலைகள் ₹ 1.2 லட்சம் வரை குறைக்கப்பட்டுள்ளன, Tiago.ev விலைகள் ₹ 70,000 வரை குறைக்கப்பட்டுள்ளன. Nexon.ev MR (நடுத்தர வீச்சு)க்கான புதிய விலைகள் ₹ 14.49 லட்சத்திலும், Nexon.ev LR (நீண்ட தூரம்) 16.99 லட்சத்திலும், Tiago.ev இன் புதிய விலை ₹ 7.99 லட்சத்திலும் தொடங்குகிறது.

பேட்டரி செலவு: பேட்டரி செலவை குறைத்ததன் மூலம் காரின் விலை குறைந்துள்ளதாக தெரிவித்துள்ளனர். விலைக் குறைப்பு பற்றி விளக்கம் அளித்த டாடா நிறுவனம், ஒரு EV-யின் ஒட்டுமொத்த செலவில் பேட்டரியின் விலை கணிசமான பங்கைக் கொண்டுள்ளது. சமீப காலமாக பேட்டரி செல்களின் விலை குறைந்துள்ளது. இதனால் கார் உற்பத்தி விலையும் குறைந்துள்ளது.

இதனால் கார்களின் விலை குறைந்துள்ளது. கடந்த சில ஆண்டுகளாக EVகள் வேகமாக வளர்ந்து வரும் நிலையில், EV களை நாடு முழுவதும் வாங்க மக்கள் ஆர்வம் காட்டி வருகிறார்கள். அவர்களுக்கு வசதியாக விலையை குறைத்துள்ளோம், என்று டாடா நிறுவனம் தெரிவித்துள்ளது.

English summary

Tata Nexon Proves again: Gets 5-Star Global NCAP Rating again