20 நாட்களில் தமிழ் கற்ற ரஜினி... 'நண்பேன்டா' ராஜ் பகதூர்

By A K Khan

Published: Friday, July 26, 2013, 11:10 [IST]

Subscribe to Oneindia Tamil

சூப்பர் ஸ்டார் ரஜினியின் நண்பர் ராஜ் பகதூருடனான சந்திப்பின் தொடர்ச்சி...

மெட்ராஸ் இன்ஸ்ட்டியூட்டில் படித்தபோது ரஜினி நடித்த ஒரு நாடகத்தைப் பார்க்க வந்திருந்தார் இயக்குனர் கே.பாலசந்தர். ரஜினியோடு பலர் நடித்திருந்தாலும் ரஜினி அவரை ஈர்த்திருக்கிறார். அவரைக் கூப்பிட்டு, நீ தமிழ் கத்துக்கோ என்று மட்டும் கூறிவிட்டுச் சென்றார் பாலசந்தர். இதை ரஜினி என்னிடம் வந்து கூறியபோது, முதல்ல தமிழ் கத்துக்க. பாலசந்தர் உனக்கு வாய்ப்பு தருவார் என்று நினைக்கிறேன் என்றேன்.

ரஜினிக்கு யார் தமிழ் சொல்லித் தந்தது?

பாலசந்தர் தமிழ் கற்கச் சொல்லிவிட்டுப் போனதால் நானே ரஜினிக்கு தமிழ் சொல்லித் தர ஆரம்பித்தேன். அப்போது ரஜினிக்கு மிகக் கொஞ்சமே தமிழ் தெரியும். நான் பெங்களூரில் செட்டில் ஆன தமிழ்க் குடும்பத்தைச் சேர்ந்தவன் என்பதால் நானே ரஜினிக்கு தமிழ் சொல்லிக் கொடுக்க ஆரம்பித்தேன்.

'என்னடா தமிழ் பேசுறே'..

அப்போது, டேய் இனிமே நீயும் நானும் தமிழ்ல தான் பேசுரோம் என்றார் ரஜினி. இதையடுத்து இருவரும் கன்னடத்தை விட்டுவிட்டு தமிழில் பேச ஆரம்பித்தோம். சொன்னால் நம்ப மாட்டீர்கள். அடுத்த 15, 20 நாட்களில் மிகச் சரளமாக தமிழ் பேச ஆரம்பித்துவிட்டார் ரஜினி. எனக்கு ஆச்சரியமாக இருந்தது ரஜினியின் வேகம். அவருக்கு எதிலுமே வேகம் தானே. அதே ரஜினி இப்போது என்னிடம், 'என்னடா தமிழ் பேசுறே'.. என்று திட்டுறான்.

பாலசந்தரை அசத்திய ரஜினி:

தமிழை மிகச் சரளமாக பேச ஆரம்பித்தவுடன் மீண்டும் மெட்ராஸ் போன ரஜினி நேராக பாலசந்தரைப் போய்ப் பார்த்து தமிழில் மடமடவென பேச அவர் அசந்து போயிருக்கிறார். இதையடுத்து அபூர்வ ராகங்கள் படத்தில் ரஜினிக்கு வாய்ப்பு தந்தார்.

வில்லன் ரோல் கேட்ட ரஜினி:

இதையடுத்து உனக்கு ஹீரோ ரோல் வேணுமா, வில்லனா நடிக்கிறியா என்று பாலசந்தர் கேட்க, நான் வில்லன் ரோல் செய்றேனே் என்று தனது வில்லத்தனத்தைக் காட்டினார் ரஜினி. இதையடுத்து அவருக்கு அடுத்தடுத்த படங்களில் வில்லன் ரோல் தந்தார் பாலசந்தர்.

வித்தியாசமான வில்லனாக, யதார்த்தமான ஹீரோவாக தமிழக மக்களின் மனதைக் கவர்ந்தார் ரஜினி.

ரஜினி இவ்வளவு பெரிய சூப்பர் ஸ்டார் ஆவார் என நீங்கள் நினைத்ததுண்டா?

சத்தியமாக இல்லை. அவருக்குள் நல்ல நடிகன் இருக்கிறான். அவர் நிச்சயம் நடிகராவார் என்று நினைத்தேனே தவிர, இவ்வளவு பெரிய ஸ்டார் ஆவார் என்று நான் நினைத்துக் கூட பார்த்ததில்லை.

(ரஜினி கண்கலங்க வைத்த நிமிடங்கள்.... தொடரும்)

Published On July 26, 2013