வண்ண ஒளியில் மிளிரும் அயோத்தி ராமர் கோயில்! ஹர்பஜன் சிங் ஷேர் செய்த தவறான வீடியோ! உண்மை இதுதான்

அயோத்தி: உத்தரப் பிரதேச மாநிலம் அயோத்தியில் இன்று ராமர் கோயில் கும்பாபிஷேக விழா சிறப்பாக நடைபெற்று வருகிறது. இந்நிலையில் இது தொடர்பான பல தவறான வீடியோக்கள் சோஷியல் மீடியாக்களில் வேகமாக ஷேர் செய்யப்பட்டு வருகின்றன. குறிப்பாக முன்னாள் கிரிக்கெட் வீரரும், ஆம் ஆத்மி கட்சியின் எம்பியுமான ஹர்பஜன்சிங் பகிர்ந்துள்ள வீடியோ விவாதங்களை கிளப்பியுள்ளது.

ராமர் பிறந்ததாக நம்பப்படும் அயோத்தியில் அவருக்கான கோயிலை கட்ட கடந்த 2021ம் ஆண்டு ஆகஸ்ட் மாதம் 5ம் தேதியன்று பிரதமர் நரேந்திர மோடி அடிக்கல் நாட்டினார். 360 அடி நீளம், 235 அடி அகலம், 161 அடி உயரத்தில், 3 மாடிகள், 5 குவிமாடங்கள், கோபுரம், 360 தூண்கள் என பிரமாண்டமாக ரூ.1,100 கோடியில் பாரம்பரிய நாகரா பாணியில் கோயில் கட்டப்பட்டிருக்கிறது. இந்த கோயிலில் இன்று குழந்தை ராமர் சிலை வைத்து பிரதிஷ்டை செய்யப்படுகிறது.

இன்று பிற்பகல் 12.29.08 மணிமுதல் 12.30.32 வரை (84 விநாடிகளில்) பிரதிஷ்டை செய்யப்படவுள்ளது. பதினாறு பொருத்தங்களில் 10 பொருத்தங்கள் சிறப்பாக அமைந்துள்ளதால் இக்குறுகிய காலத்தில் பிரதிஷ்டை நடைபெறவுள்ளது என ஸ்ரீ ராமஜென்மபூமி தீா்த்த க்ஷேத்ர அறக்கட்டளை பொதுச் செயலாளர் சம்பத் ராய் கூறியுள்ளார். குழந்தை ராமர் சிலையின் பீடம் 3 அடி உயரத்தைக் கொண்டது. இச்சிலை மக்ரானா மார்பிள் கற்களால் செய்யப்பட்டு, அதன் மீது தங்கக் கவசம் பொருத்தப்பட்டுள்ளது.

கோயிலின் கும்பாபிஷேகம், பிரதமர் நரேந்திர மோடி, ஆர்.எஸ்.எஸ்., தலைவர் மோகன் பாகவத், உ.பி., கவர்னர் ஆனந்திபென் படேல், முதல்வர் யோகி ஆதித்யநாத், கோயில் அறக்கட்டளை தலைவர் மஹந்த் நிருத்ய கோபால் தாஸ் ஆகியோர் முன்னிலையில் நடைபெறுகிறது. இந்த நிகழ்வில் நாடு முழுவதும் இருந்து முக்கிய தலைவர்கள், திரை நட்சத்திரங்கள், விளையாட்டு வீரர்கள் பங்கேற்கிறார்கள்.

இந்த கோயிலின் கும்பாபிஷேகம் முடிந்த பின்னர், தினந்தோறும் சுமார் 3 லட்சம் பக்தர்கள் கோயிலுக்கு வந்து செல்வார்கள் என்று எதிர்பார்க்கப்படுகிறது. கும்பாபிஷேகம் நடைபெறும் ஜனவரி 22ம் தேதி பல்வேறு மாநிலங்கள் பொது விடுமுறையை அறிவித்திருக்கின்றன. இந்நிலையில், ராமர் கோயில் தொடர்பாக சில தவறான வீடியோக்கள் சோஷியல் மீடியாவில் பரப்பப்பட்டு வருகின்றன. குறிப்பாக அயோத்தி ராமர் கோயில் என முன்னாள் கிரிக்கெட் வீரரும், ஆம் ஆத்மி கட்சியின் எம்பியுமான ஹர்பஜன்சிங் பகிர்ந்துள்ள வீடியோ விவாதங்களை கிளப்பியுள்ளது.

இது குறித்து தமல் ஷாஹா எனும் பத்திரிகையாளர் விளக்கமளித்துள்ளார். அதாவது, மேற்கு வங்க மாநிலம் கொல்கத்தாவில் கடந்த ஆண்டு துர்கா பூஜை விழாவின் போது ராமர் கோயில் போன்று மாதிரி உருவாக்கப்பட்டிருந்தது. இது உண்மையான ராமர் கோயில் அல்ல என்று கூறியுள்ளார். இவரது கூற்றை உறுதி செய்யும் விதமாக இந்துஸ்தான் டைம்ஸ் இணைய இதழில் கடந்த ஆண்டு அக்டோபர் 18ம் தேதி செய்தி வெளியிடப்பட்டிருக்கிறது.

English summary

Ram Temple kumbhabhishekham is going on in Ayodhya, Uttar Pradesh today. In this case, many false videos related to this are being shared rapidly on social media. Especially the video shared by former cricketer and Aam Aadmi Party MP Harbhajan Turbanator has sparked debates.