என்னது.. விஜய் டிவி ராமர் தமிழ் மாநில காங்கிரஸில் இருக்காரா? டிரெண்டாகும் புகைப்படம் - FACT CHECK

சென்னை: விஜய் டிவியில் பிரபல நகைச்சுவை கலைஞராக இருக்கும் ராமர் தமிழ் மாநில காங்கிரஸ் கட்சி சார்பில் தொலைக்காட்சி விவாதத்தில் பங்கேற்று இருப்பதாக ஒரு புகைப்படம் சமூக வலைதளங்களில் அதிகளவில் பகிரப்பட்டு வருகிறது.

விஜய் டிவியில் பிரபல நகைச்சுவை கலைஞராக இருந்து வருபவர் ராமர். கலக்கப்போவது யாரு நிகழ்ச்சியில் அறிமுகமாகி, அது இது எது, கேபிஒய் சாம்பியன்ஸ், ராமர் வீடு போன்ற பல்வேறு நிகழ்ச்சிகளின் மூலம் பிரபலம் அடைத்தார். குறிப்பாக பெண் வேடத்தில் இவர் நடித்திருக்கும் நிகழ்ச்சிகள் அசத்தல் ரகம்.

அது இது எது நிகழ்ச்சியில், பிரபல தனியார் தொலைக்காட்சியில் குடும்ப பிரச்சனைகள் குறித்து பேசும் பிரபல நடிகையின் வேடத்தில் ராமர், சொல்வதெல்லாம் பொய் என்ற பெயரில் அரங்கேற்றிய நகைச்சுவை, இன்று வரை மக்களை சிரிக்க வைத்துக்கொண்டே இருக்கிறது. அதேபோல் பிரபல சினிமா பாடல்களை நகைச்சுவை தொனியில் பேசி மீண்டும் அதை டிரெண்ட் செய்துவிடுவது ராமரின் வழக்கம்.

அப்படி மக்களால் மறந்துபோன பாடல்களை மீண்டும் தனது நகைச்சுவையால் நினைவூட்டி இருப்பார் ராமர். விஜய் தொலைக்காட்சியில் பிரபலமானதன் மூலம் சினிமாக்களில் நடிக்கவும் ராமருக்கு வாய்ப்புகள் கிடைத்தன. சில திரைப்படங்களில் நடித்தும் இருக்கிறார். ஆனால், தொலைக்காட்சியில் கிடைத்த அளவுக்கு சினிமாவில் இவர் அதிக பிரபலம் ஆகவில்லை.

எனவே தொடர்ந்து விஜய் டிவி நிகழ்ச்சிகளில் பங்கேற்று வருகிறார். ராமர் நகைச்சுவை கலைஞர் மட்டுமில்லை. அரசு அதிகாரி என்ற தகவல் கடந்த ஆண்டு வெளியாகி பலரை வியப்படைய வைத்தது. கடந்த ஆண்டு மதுரை மார்க்சிஸ்ட் எம்பி சு வெங்கடேசன், விஜய் டிவி ராமருடன் இருக்கும் ஒரு புகைப்படத்தை வெளியிட்டார்.

அதில், "கொட்டாம்பட்டி ஒன்றிய கிராம ஊராட்சிகளில் நடைபெறும் ஆய்வின் போது 18 சுக்காம்பட்டி கிராமத்தில் கிராம நிர்வாக அலுவலராக பணியாற்றும் சின்னத்திரை கலைஞர் விஜய்டிவி புகழ் ராமர் அவர்களை சந்தித்தேன்" என பதிவிட்டு இருந்தார். இந்த பதிவை பார்த்து பலரும் வியப்படைந்தனர்.

இந்த நிலையில், ரசிகர்களுக்கு மேலும் அதிர்ச்சியளிக்கும் ஒரு புகைப்படம் சமூக வலைதளங்களில் வேகமாக பகிரப்பட்டு வருகிறது. அதாவது அதிமுகவின் அதிகாரப்பூர்வ தொலைக்காட்சியில் நடைபெற்ற ஒரு விவாதத்தில் தமிழ் மாநில காங்கிரஸ் கட்சி சார்பில் விஜய் டிவி ராமர் அமர்ந்திருப்பதைபோல் உள்ளது அந்த புகைப்படம்.

பலரும் இதனை உண்மை என்று நம்பி சமூக வலைதளங்களில் பதிவிட்டு வருகிறார்கள். சிலர் ஒருவர் அரசு அதிகாரி கட்சி சார்பில் எப்படி விவாதத்தில் கலந்துகொள்ள முடியும் என்று கேள்வி எழுப்பி உல்ளனர். இதன், உண்மைத்தன்மையை அறிய பெரிதாக நாம் நேரம் எடுக்க வேண்டிய அவசியமே இல்லை. பகிரப்படும் அந்த புகைப்படத்தை ஜூம் செய்து பார்த்தாலே உண்மை தெரிந்துவிடும்.

ஆம், ராமர் முகம் இருக்கும் இடத்தில் தொலைக்காட்சியின் லோகோவின் ஒரு முனையை ராமரின் தலைமுடி மறைத்திருக்கும். அதை வைத்தே புரிந்துகொள்ள முடியும், வேறொருவரின் முகத்தின் மேல் ராமரின் முகத்தை வைத்து உள்ளார்கள் என்று. அந்த பதிவுக்கு கீழேயே த.மா.க சார்பில் விவாதத்தில் உண்மையாக கலந்துகொண்டவரின் படத்தை நெட்டிசன்கள் கருத்திட்டு உள்ளனர்.

English summary

Fact check about the photo of Ramar, who is a popular comedian on Vijay TV, participating in a TV debate on behalf of the Tamil maanila Congress Party, is being shared widely on social media.