Fact Check: சானியா மிர்சா - முகமது ஷமி இருவரும் டேட்டிங் செய்கிறார்களா? தீயாக பரவி வரும் AI போட்டோ!

சென்னை: முன்னாள் டென்னிஸ் வீராங்கனை சானியா மிர்ஸா, இந்திய கிரிக்கெட் வீரர் முகமது ஷமி உடன் கிறிஸ்துமஸ் கொண்டாடியதாகவும், கடற்கரைகளில் நெருக்கமாக இருப்பதாகவும் சில புகைப்படங்கள் சமூக வலைதளங்களில் பரவி வருகின்றன. இவை உண்மையா?

இந்தியாவின் முன்னணி டென்னிஸ் வீராங்கனையாகத் திகழ்ந்து பல போட்டிகளில் வென்று சாதித்தவர் சானியா மிர்சா. இவர், பாகிஸ்தான் கிரிக்கெட் வீரர் சோயிப் மாலிக்கை கட்ந்த 2010ஆம் ஆண்டு திருமணம் செய்துகொண்டார். இவர்களுக்கு இசான் என்ற மகன் உள்ளார். இந்நிலையில், சோயிப் மாலிக், சனா ஜாவேத் உடனான தனது இரண்டாவது திருமணத்தை அறிவித்து அனைவரையும் ஆச்சரியப்படுத்தினார்.

பின்னர், சானியா மிர்ஸா ஏற்கனவே சோயப் மாலிக்கிடம் இருந்து விவாகரத்து பெற்றதை அவரது தந்தை இம்ரான் தெரிவித்தார். இதேபோல இந்திய கிரிக்கெட் வேகப்பந்து வீச்சாளர் முகமது ஷமி தனது மனைவி ஹசின் ஜஹானைப் பிரிந்து வாழ்கிறார்.

இந்தச் சூழலில் தான், சானியா மிர்சா - முகமது ஷமி ஆகிய இருவரும் ஒன்றாக இருப்பது போல புகைப்படங்கள் அண்மைக் காலங்களில் சமூக வலைதளங்களில் அதிகமாக பகிரப்பட்டு வருகின்றன. சானியா மிர்சாவும், முகமது ஷமியும் திருமணம் செய்துகொள்ள உள்ளதாக 2024 ஜூன் மாதம் தகவல்கள் பரவின. ஆனால், சானியா மிர்சாவின் தந்தை அந்த தகவலை மறுத்துவிட்டார். சானியா மிர்சா முகமது ஷமியை சந்தித்தது கூட இல்லை என்றும் குறிப்பிட்டார்.

இந்நிலையில், சானியா மிர்சா, முகமது ஷமி இருவரும் துபாயில் கிறிஸ்துமஸ் விழாவை கொண்டாடியதாக சில புகைப்படங்கள் சமூக வலைதளங்களில் வைரலாகி வருகின்றன. இருவரும் கிறிஸ்துமஸ் உடை அணிந்து நெருக்கமாக நின்றுகொண்டிருப்பது போன்ற புகைப்படங்கள் சமூக வலைதளங்களை ஆக்கிரமித்துள்ளன.

மேலும், முகமது ஷமியும், சானியா மிர்ஸாவும், கடற்கரையில் மிக நெருக்கமாக இருப்பது போன்ற புகைப்படங்களும் சில நாட்களாக வேகமாகப் பரவி வருகின்றன. இருவரும் டேட்டிங் செய்வதாகவும், திருமணம் செய்து விட்டதாகவும் பலர் சமூக வலைதளங்களில் பதிவிட்டு வருகின்றனர்.

டென்னிஸ் ஸ்டார் சானியா மிர்சா மற்றும் கிரிக்கெட் வீரர் முகமது ஷமி மிகவும் பிரபலமான நபர்கள் என்பதால், அவர்கள் பற்றிய தேடலும் அதிகரித்துள்ளது. இதனால், ஏராளமானோர் இந்தப் புகைப்படங்களை பதிவிட்டு வருகின்றனர். ஆனால், முகமது ஷமி, சானியா மிர்சா இருவரின் சமூக ஊடக கணக்குகளிலும் இப்படியான எந்தப் புகைப்படங்களும் இல்லை.

உண்மை என்ன?

முகமது ஷமியும், சானியா மிர்சாவும் கிறிஸ்துமஸ் கொண்டாடியதாக வெளியான புகைப்படங்களும், கடற்கரையில் நெருக்கமாக இருப்பதாக வெளியான புகைப்படங்களும் போலியானவை, ஏஐ -யால் உருவாக்கப்பட்டவை என்பது உறுதி செய்யப்பட்டுள்ளன.

English summary

Photographs of cricketer Mohammed Shami and tennis star Sania Mirza are doing round the internet claiming that both are seeing each other. Some posts said that they are married. But, That photos are created with AI.