Fact Check: சபாநாயகர் இருக்கையில் அமர்ந்த முதல் பெண் சத்யபாமா தானா? உண்மை என்ன?

சென்னை: சட்டசபையில் நேற்று முன்தினம் சபாநாயகர் இருக்கையில் அமர்ந்து மாற்று அவைத் தலைவராக இருந்து தவெக எம்எல்ஏ சத்யபாமா அவையை வழிநடத்தினார். இதனால் சட்டசபை வரலாற்றிலேயே சபாநாயகர் இருக்கையில் அமர்ந்த முதல் பெண் சத்யபாமா தான் என்று தவெகவினர் ரீல்ஸ் வெளியிட்டு வருகின்றனர். இதன் உண்மைத்தன்மை குறித்து பார்க்கலாம்.

சட்டசபையில் சபாநாயகர் ஜேசிடி பிரபாகர் அலுவல் பணிக்காக தனது அறைக்கு சென்ற போது, துணை சபாநாயகரும் அவையில் இல்லை. இதனால் மாற்று அவைத் தலைவராக தவெக எம்எல்ஏ சத்யபாமா அவையை நடத்தினார். அப்போது திமுக எம்எல்ஏ தங்கம் தென்னரசு, லேடி வெலிங்டன் சட்டசபைக்கு கொடுத்த ஆசனத்தில் பெண்மணி ஒருவர் அமர வேண்டும் என்பது நீண்ட காலமாக எல்லோரிடமும் இருக்கும் எதிர்பார்ப்பு.

மாற்று தலைவராக நீங்கள் அமர்ந்திருப்பதை பார்ப்பது எங்களுக்கு மகிழ்ச்சி அளிக்கிறது. வாழ்த்துகிறோம் என்று தெரிவித்தார். இதனைத் தொடர்ந்து தவெகவினர் சபாநாயகர் இருக்கையில் அமர்ந்த முதல் பெண்.. அதனை சாதித்து காட்டியது தவெக தான் என்று சோசியல் மீடியாவில் ரீல்ஸ் மற்றும் பதிவுகளை வெளியிட்டு வந்தனர்.

மாற்று பெண் அவைத் தலைவர்கள்

ஆனால் இதற்கு முன்பாகவே தமிழகத்தின் வரலாற்றுச் சிறப்புமிக்க சட்டசபையில் பல்வேறு பெண் எம்எல்ஏக்கள் மாற்று சபை தலைவர்களாக இருந்துள்ளனர். காங்கிரஸ் கட்சியை சேர்ந்த 7 முறை சட்டமன்ற உறுப்பினராக இருந்த பெண் எம்.எல்.ஏ. ஏ.எஸ். பொன்னம்மாள், ராஜாத்தி குஞ்சிதபாதம், பி.கே.ஆர். லட்சுமிகாந்தம், யசோதா, ராஜம்மாள் ஆகியோர் மாற்று அவைத் தலைவர்களாக இருந்துள்ளனர்.

அதேபோல் திமுகவைச் சேர்ந்த எஸ்.பி. சற்குணம், காஞ்சனா கமலநாதன் ஆகியோரும், அதிமுகவைச் சேர்ந்த சி.எம்.சூரியக்கலாவும் மாற்று அவைத் தலைவர்களாக இருந்துள்ளனர். அதேபோல் மார்க்சிஸ்ட் கம்யூனிஸ்ட் கட்சியைச் சேர்ந்த லீமா ரோஸ் எம்எல்ஏ மாற்று அவைத் தலைவர்களாக செயல்பட்டுள்ளார்.

உண்மை என்ன?

தமிழகத்தின் நீண்ட சட்டசபை பாரம்பரியத்தில் இதுவரை தமிழகத்தில் சபாநாயகராகவோ அல்லது துணை சபாநாயகராகவோ பெண்கள் தேர்ந்தெடுக்கப்பட்டதில்லை. இதனால் தவெக எம்எல்ஏ தான் மாற்று அவைத் தலைவராக சபாநாயகர் இருக்கையில் அமர்ந்த பெண் என்பது பொய்யான செய்தியாகும்.

English summary

Fact Check: Is TVK MLA Sathyabama Really the First Woman to Chair the Tamil Nadu Assembly?