Fact Check: முதல்வர் மருந்தகத்தில் மாத்திரை விலை அதிகமா? பரவும் போட்டோ.. உண்மை என்ன?

சென்னை: சர்க்கரை நோய்க்கான வில்டாகிளிப்டின் மெட்பார்மின் ஹைட்ரோ குளோரைடு மாத்திரை ஒரு அட்டை பிரதமரின் மக்கள் மருந்தகத்தில் ரூ.30க்கும், முதல்வர் மருந்தகத்தில் ரூ.35க்கும் விற்கப்படுவதாக இரு மாத்திரை அட்டைகளுடன் சமூக வலைத்தளங்களில் பரப்பப்படுகிறது. இது உண்மை அல்ல என தமிழக அரசின் உண்மை சரிபார்ப்பகம் தெரிவித்துள்ளது.

"சர்க்கரை நோய்க்கான வில்டா கிளிப்டின் மெட்பார்மின் ஹைட்ரோ குளோரைடு மாத்திரை அட்டை பிரதமரின் மக்கள் மருந்தகத்திற்கும் முதலமைச்சரின் மருந்தகத்திற்கும் உள்ள வித்தியாசம் ஐந்து ரூபாய். ஸ்டிக்கர் ஒட்டி 16.6% கமிஷன் அடிக்கும் விஞ்ஞான ஊழல் விடியா அரசு" என ராஜசேகர் ஜெயராஜ் என்பவர் பதிவிட்டிருந்தார். இந்தப் பதிவை பலரும் பகிர்ந்துள்ளனர்.

உண்மை என்ன?

இந்த தகவலை பலரும் பகிர்ந்து, தமிழக அரசை விமர்சித்துள்ள நிலையில், இது முற்றிலும் வதந்தி என தமிழ்நாடு அரசின் உண்மை சரிபார்ப்பகம் விளக்கம் அளித்துள்ளது.

வில்டாகிளிப்டின் மெட்பார்மின் ஹைட்ரோ குளோரைடு மாத்திரை (15) அட்டையில் விலை ரூ.36 என்றுள்ளது. ஆனால், முதல்வர் மருந்தகத்தில் ரூ.9 தள்ளுபடி (25%) போக 15 மாத்திரைகள் கொண்ட ஒரு அட்டை ரூ.27க்கே விற்பனையாகிறது. மாத்திரை அட்டையில் உள்ள விலையை மட்டும் வைத்து முதல்வர் மருந்தகத்தில் விலை அதிகமாக உள்ளதாகத் திரித்து வதந்தியைப் பரப்பி வருகின்றனர்.

முதல்வர் மருந்தகத்தில் மாத்திரை விலை அதிகம் என்று பரவும் வதந்தி!@CMOTamilnadu @TNDIPRNEWS (1/2) https://t.co/MP3BehVl0b pic.twitter.com/s9b91lS5UK

— TN Fact Check (@tn_factcheck) March 8, 2025

அத்துடன் முதல்வர் மருந்தகத்தில் பெறப்பட்ட சீட்டும் இணைக்கப்பட்டுள்ளது. அதில், தள்ளுபடி போக ரூபாய் 27க்கு ஒரு மாத்திரை அட்டை விற்பனை செய்யப்பட்டிருப்பதாக குறிப்பிடப்பட்டுள்ளது.

English summary

A claim is being spread on social media that one tablet of Vildagliptin Metformin Hydrochloride, a medicine for diabetes, is being sold at Rs. 30 at the Prime Minister's Pharmacy and Rs. 35 at the Chief Minister's Pharmacy. The Tamil Nadu Government's Fact-Check unit has said that this is not true.