கங்கணாவிற்கு சப்போர்ட்.. தேசிய அளவில் திடீர் வைரல்.. பாஜகவில் இணைகிறாரா விஷால்.. உண்மை என்ன?

Updated: Sunday, September 13, 2020, 16:35 [IST]

Subscribe to Oneindia Tamil

சென்னை: நடிகர் விஷால் பாஜகவில் இணைய இருப்பதாக காலையில் இருந்து இணையத்தில் பெரிய அளவில் செய்திகள் உலவி வருகிறது. நடிகர் விஷால் தற்போது இதற்கு விளக்கம் அளித்துள்ளார்.

நடிகர் விஷால் பல பேட்டிகளில், மேடைகளில் தனக்கு இருக்கும் அரசியல் ஆசையை வெளிப்படுத்தி இருக்கிறார். தன்னுடைய ரசிகர் மன்றத்தை 2018ல் இவர் மக்கள் நல இயக்கம் என்று இயக்கமாக மாற்றி அறிவிப்பு வெளியிட்டு இருந்தார்.

அப்போதில் இருந்தே அரசியலில் விஷால் ஈடுபட வாய்ப்புள்ளது. பெரிய கட்சிகளில் விஷால் இணைய வாய்ப்புள்ளது என்றும் தகவல்கள் பரவி வந்தது.

செய்தி வந்தது

இந்த நிலையில் நடிகர் விஷால் பாஜகவில் இணைய இருப்பதாக காலையில் இருந்து இணையத்தில் பெரிய அளவில் செய்திகள் உலவி வருகிறது. இதற்காக இன்று பாஜக தலைவர் எல் முருகன் அவர்களை சந்திக்க இருப்பதாகவும் கூறப்பட்டது. இதற்காக அவர் நேரம் கேட்டு இருப்பதாக செய்திகள் வெளியானது. விஷால் ரசிகர்கள் பலர் இதனால் அவருக்கு எதிராக இணையத்தில் டிவிட் செய்து வந்தனர்.

கங்கணா ராணாவத் ஆதரவு

கடந்த சில நாட்களுக்கு முன் கங்கணா ராணாவத்திற்கு ஆதரவாக விஷால் பேசி இருந்தார். நடிகை கங்கணா ராணாவத் பாஜகவிற்கு ஆதரவாக பேசி வருகிறார். மகாராஷ்டிராவில் இவர், பாஜகவிற்கு ஆதரவாகவும், சிவசேனாவிற்கு எதிராகவும் பேசி வருகிறார். இந்த நிலையில் கங்கணா ராணாவத்தை விஷால் பகத் சிங்குடன் ஒப்பிட்டு புகழ்ந்து இருந்தார். இது தேசிய அளவில் வைரலானது.

தேசிய அளவில் வைரல்

தேசிய பாஜக கட்சியினர் பலர் இதனால் விஷாலுக்கு ஆதரவாக இதில் பேசினார்கள். மகாராஷ்டிராவில் கங்கணா ராணாவத் போல தமிழகத்தில் விஷாலை பாஜக தன் பக்கம் இழுக்க போகிறதா என்று கேள்விகள் எழுந்தது. பாஜகவில் விஷால் இணைய போகிறாரா என்று கேள்விகளும், விவாதங்களும் எழுந்தது. பாஜகவில் வரிசையாக திரட்ட பிரபலங்கள் பலர் இணைந்து வருவதும் இந்த சந்தேகத்தை வலுப்படுத்தியது.

மறுத்த விஷால்

இந்த நிலையில் விஷால் தரப்பு இந்த செய்தியை மறுத்துள்ளது. அதில், நான் பாஜகவில் இணைவதாக வெளியாகும் செய்திகள் பொய்யானது. பாஜகவில் நான் யாரையும் சந்திக்கவில்லை. பாஜக தலைவர் எல். முருகனை நான் சந்திப்பதாக வெளியாகும் செய்திகள் தவறானது. பொய்யானது வதந்திகளை என் ரசிகர்கள் நம்ப கூடாது என்று விஷால் சார்பாக விளக்கம் அளிக்கப்பட்டுள்ளது.