வெவ்வேறு தோற்றம்.. ஒரே பதிவு எண்ணில் 3 அரசு பஸ்கள் இயக்கமா? தமிழக அரசு விளக்கம்

சென்னை: தமிழக அரசு சார்பில் 'த.நா. 74 என் 1813' என்ற ஒரே பதிவு எண்ணில் 3 தோற்றத்தில் அரசு பஸ்கள் இயக்கப்படுவதாகவும், அடுத்தடுத்து அடுக்கி வைக்கப்பட்ட அந்த 3 பஸ்களின் படங்களும் சமூக வலைத்தளங்களில் வேகமாக தகவல் பரவியது. இந்நிலையில் வெவ்வேறு தோற்றத்தில் ஒரே பதிவு எண்ணில் 3 தோற்றத்தில் அரசு பஸ் இயக்கப்படுவது குறித்து தமிழக அரசின் தகவல் சரிபார்ப்பகம் விளக்கம் அளித்துள்ளது.

பரவிய செய்தி என்ன: தமிழக அரசு சார்பில் 'த.நா. 74 என் 1813' என்ற ஒரே பதிவு எண்ணில் 3 தோற்றத்தில் அரசு பஸ்கள் இயக்கப்படுவதாகவும், அடுத்தடுத்து அடுக்கி வைக்கப்பட்ட அந்த 3 பஸ்களின் படங்களும் நேற்று சமூக வலைத்தளங்களில் தகவல்கள் வேகமாக பரவியது. இது 'வாட்ஸ் அப்' உள்ளிட்ட பல்வேறு சமூக ஊடகங்களில் விவாத பொருளாக மாறியது. ஆம்னி பேருந்துகள் தான் இப்படி சில சமயங்களில் மோசடி செய்வதாகவும், ஆனால் அரசு பேருந்துகளே இப்படி இருப்பது தான் இதுதான் முதல்முறை என்று சிலர் தகவல்கள் தெரிவித்தனர். அதெப்படி திமிங்கலம் ஒரே எண்ணில் மூன்று பேருந்துகள் ஓடுகிறது என்றும் சிலர் கேள்வி எழுப்பினார்கள்.

அரசு மீது விமர்சனம்: இப்படி பலரும் தங்களது கருத்துகளை பதிவு செய்து வந்தார்கள். சிலர் இந்த விவகாரத்தில் தமிழக அரசையும் விமர்சித்து வருகிறார்கள். அதேநேரம் அரசு பேருந்துகளே என்றாலும் ஒரே பதிவு எண்ணில் 3 பேருந்துகள் ஓடுவது சாத்தியமா? அப்படி எல்லாம் அரசு அனுமதிக்குமா என்ற கேள்விகளும் எழுகிறது. ஆனால், இது திரிக்கப்பட்ட தகவல் என்று தமிழக அரசின் அதிகாரப்பூர்வ சமூக ஊடக கணக்கான தகவல் சரிபார்ப்பகம் விளக்கம் அளித்துள்ளது.

தகவல் சரிபார்ப்பகம் விளக்கம் என்ன: 'த.நா. 74 என் 1813' என்ற இந்த பஸ் 8-2-2017 அன்று புதிய பஸ்சாக கூண்டு கட்டி 9-3-2017 முதல் புறநகர் பஸ்சாக நாகர்கோவில்-திருவனந்தபுரம் தடத்தில் இயக்கப்பட்டது. 3 ஆண்டுகள் கழித்து இந்த பஸ்சுக்கு பதில் புதிய பஸ் இயக்கப்பட்டதால், 4-1-2020 முதல் இது நகர பஸ்சாக (இருக்கை மாற்றம்) செய்யப்பட்டு இயக்கப்பட்டது.

இந்த பஸ்சின் வயது 6-ஐ கடந்த நிலையில் தமிழக அரசின் அரசாணைப்படி கடந்த 7-10-2023 அன்று இதன் கூண்டு புதுப்பிக்கப்பட்டு நகர பஸ்சாக நாகர்கோவில்-மேல் மிடாலம் தடத்தில் (தடம் எண்: 9ஏ) இயக்கப்பட்டு வருகிறது என்று கன்னியாகுமரி போக்குவரத்து வணிக மேலாளர் தெரிவித்துள்ளார் என்று அரசின் தகவல் சரிபார்ப்பகம் வெளியிட்ட பதிவில் தெரிவிக்கப்பட்டிருக்கிறது.

தமிழக அரசு கொடுத்துள்ள விளக்கத்தின் மூலம் ஒரே பதிவு எண் கொண்ட இந்த ஒரே பஸ், மூன்று கட்டங்களில், மூன்று தோற்றத்தில், மூன்று வழித்தடத்தில் ஓடியது தெரியவந்திருக்கிறது.

ஒரே பதிவு எண்ணில், வெவ்வேறு தோற்றத்தில் தனது மூன்று முகத்தை காட்டி சமூக வலைத்தளங்களில் றெக்கை கட்டி பறந்த புதிருக்கு விடையை கொடுத்து முற்றுப்புள்ளி வைத்திருக்கிறது தமிழக அரசு.

English summary

The fact checker of the Tamil Nadu government has given an explanation about the fact that the government bus is operated in 3 different forms with the same registration number in different forms.