40 வருடங்களில் முதல்முறை! 1980க்கு பின் ஒரே நாளில் பெரிய சரிவு! தங்கம், வெள்ளி சரிய என்ன காரணம்?

Updated: Sunday, February 1, 2026, 10:44 [IST]

Subscribe to Oneindia Tamil

நியூயார்க்: சர்வதேச சந்தையில் நிலவும் பொருளாதார மாற்றங்களால் தங்கம் மற்றும் வெள்ளி விலைகள் தொடர்ந்து நான்காவது நாளாக அதிரடியாகச் சரிந்துள்ளன. 40 வருடங்களில் இல்லாத மிக மோசமான சரிவை தங்கம், வெள்ளி சந்தித்துள்ளது. குறிப்பாக, வெள்ளி விலை ஒரே நாளில் 30 சதவீதத்திற்கும் மேல் சரிந்து முதலீட்டாளர்களைப் பெரும் கவலையில் ஆழ்த்தியுள்ளது.

சர்வதேச சந்தையில் என்ன நடக்கிறது?

அமெரிக்க ஃபெடரல் ரிசர்வ் வங்கியின் (US Fed) அடுத்த தலைவராக கெவின் வார்ஷ் (Kevin Warsh) என்பவரை அதிபர் டொனால்ட் டிரம்ப் பரிந்துரைக்க உள்ளதாக வெளியான தகவலே இந்த விலை வீழ்ச்சிக்கு முக்கியக் காரணமாகக் கூறப்படுகிறது. அவர் ஒரு பணவீக்க எதிர்ப்பாளர் (Inflation Hawk) என்று அறியப்படுவதால், அமெரிக்க டாலரின் மதிப்பு வலுவடைந்துள்ளது. இதன் எதிரொலியாக, டாலருக்கு நிகரான தங்கம் மற்றும் வெள்ளியின் மதிப்பு சரிவைச் சந்தித்துள்ளது.

தங்கம்: நியூயார்க் சந்தையில் ஸ்பாட் தங்கம் விலை 13% வரை சரிந்து, ஒரு அவுன்ஸ் 5,000 டாலருக்கும் கீழ் சென்றது. இது 1980-களுக்குப் பிறகு ஒரே நாளில் ஏற்பட்ட மிகப்பெரிய வீழ்ச்சியாகக் கருதப்படுகிறது.

வெள்ளி: வெள்ளி விலை இன்னும் மோசமாக 36% வரை சரிந்து வரலாற்றுச் சாதனை வீழ்ச்சியைப் பதிவு செய்துள்ளது.

இந்திய சந்தை (MCX) நிலவரம்

இந்தியாவின் மல்டி கமாடிட்டி எக்ஸ்சேஞ்சில் (MCX) சர்வதேச சந்தையின் தாக்கம் அப்படியே எதிரொலித்தது. இன்று பிப்ரவரி 1, ஞாயிற்றுக்கிழமை என்றாலும், மத்திய பட்ஜெட் 2026 தாக்கல் செய்யப்படுவதால் சந்தையில் சிறப்பு வர்த்தகம் நடைபெற்று வருகிறது.

தங்கம்: ஒரு கிலோ தங்கத்தின் விலை சுமார் ₹33,113 (18%) சரிந்து, ₹1,50,849 என்ற அளவில் வர்த்தகமானது.

வெள்ளி: வெள்ளி விலை ஒரு கிலோவுக்கு ₹1,07,971 (27%) சரிந்து, ₹2,91,922-க்கு விற்பனையானது.

சர்வதேச சந்தையில் தங்கம் மற்றும் வெள்ளி விலையில் ஏற்பட்டுள்ள அதிரடிச் சரிவு உலகப் பொருளாதாரத்தையே உலுக்கியுள்ளது. குறிப்பாக வெள்ளி விலை ஒரே நாளில் 30% மேல் சரிந்தது 1980-களுக்குப் பிந்தைய மிகப்பெரிய வீழ்ச்சியாகப் பார்க்கப்படுகிறது. இந்த வரலாற்றுச் சரிவுக்குப் பின்னால் உள்ள காரணங்கள் இதோ:

1. கெவின் வார்ஷ் - 'ஹாக்கிஷ்' (Hawkish) தாக்கம்

அமெரிக்க அதிபர் டொனால்ட் டிரம்ப், அந்நாட்டின் மத்திய வங்கி (US Fed) தலைவராக கெவின் வார்ஷ் என்பவரை நியமிக்க முடிவு செய்துள்ளார். இவர் பணவீக்கத்தைக் கட்டுப்படுத்த வட்டி விகிதங்களை உயர்த்துவதில் அதீத ஆர்வம் கொண்டவர் (Inflation Hawk). இவர் பொறுப்புக்கு வந்தால், அமெரிக்காவில் வட்டி விகிதங்கள் குறையாது, மாறாக உயரக்கூடும் என்ற எதிர்பார்ப்பு முதலீட்டாளர்களிடையே ஒருவித அச்சத்தை ஏற்படுத்தியுள்ளது.

2. பலமடைந்த அமெரிக்க டாலர்

கெவின் வார்ஷின் நியமனச் செய்தியால் அமெரிக்க டாலர் குறியீடு (Dollar Index) ஒரே நாளில் உச்சத்தை எட்டியது. பொதுவாக டாலர் மதிப்பு உயரும்போது, டாலரில் விலை நிர்ணயம் செய்யப்படும் தங்கம் மற்றும் வெள்ளியின் மதிப்பு சர்வதேச அளவில் குறையும். இந்த 'டாலர்-மெட்டல்' நேரெதிர் மாற்றமே தற்போதைய சரிவுக்குத் தூண்டுகோலாக அமைந்தது.

3. அதிரடி லாபப் பதிவு (Profit Booking)

கடந்த ஜனவரி மாதம் முழுவதும் தங்கம் மற்றும் வெள்ளி விலைகள் வரலாறு காணாத வகையில் ஏறுமுகத்தில் இருந்தன. 2026 ஜனவரியில் மட்டும் வெள்ளி விலை சுமார் 60% வரை உயர்ந்திருந்தது. இந்த அதிகப்படியான விலையில் தங்களுக்குக் கிடைத்த லாபத்தை உறுதி செய்ய, பெரிய முதலீட்டு நிறுவனங்கள் மற்றும் வங்கி நிறுவனங்கள் ஒரே நேரத்தில் தங்களது இருப்புகளை விற்கத் தொடங்கின. இது சந்தையில் தங்கம், வெள்ளியின் வரத்தை அதிகரித்து விலையை மிக வேகமாக இறக்கியது.

4. மார்ஜின் கட்டண உயர்வு (Margin Hike)

தங்கம் மற்றும் வெள்ளி வர்த்தகத்தில் நிலவும் அதீத ஏற்ற இறக்கத்தைக் கட்டுப்படுத்த, சர்வதேச கமாடிட்டி சந்தையான CME (Chicago Mercantile Exchange), வர்த்தகத்திற்கான 'மார்ஜின்' தொகையை (முன்பணம்) திடீரென உயர்த்தியது. இதனால் குறைந்த முதலீட்டில் வர்த்தகம் செய்து வந்த சிறு முதலீட்டாளர்கள் தங்களது நிலைகளைத் தக்கவைக்க முடியாமல் வெளியேற வேண்டிய கட்டாயம் ஏற்பட்டது. இது விற்பனை அழுத்தத்தை மேலும் அதிகரித்தது.

5. புவிசார் அரசியல் தணிப்பு

சமீபகாலமாக ஈரான் - அமெரிக்கா இடையே நிலவி வந்த பதற்றம் ஓரளவு தணிந்து, பேச்சுவார்த்தைக்கான அறிகுறிகள் தென்படுவதால், 'பாதுகாப்பான முதலீடு' (Safe Haven) என நம்பப்படும் தங்கம் மீதான மோகம் தற்காலிகமாகக் குறைந்துள்ளது.