போடு வெடிய.. தங்கம் விலை அதிரடியாக 38 சதவீதம் குறைய போகுதாம்! மார்க்கெட் நிபுணர் கணிப்பு

வாஷிங்டன்: சர்வதேச அளவில் நடந்து வரும் மாற்றங்கள் காரணமாக தங்கத்தின் விலையில் உயர்வு ஏற்பட்டிருந்தது. ஆனால் இனி வரும் நாட்களில் தங்கம் விலை 38% வரை குறைய வாய்ப்பு இருப்பதாக சொல்லப்படுகிறது.

மார்னிங்ஸ்டார் நிறுவனத்தின் சந்தை நிபுணர் ஜான் மில்ஸ் இதனை தெரிவித்திருக்கிறார். ஒரு அவுன்ஸ் $3,080 இருந்து $1,820 வரை குறையலாம் என்று அவர் கணித்திருக்கிறார்.

மார்ச் 31ம் தேதி நிலவரப்படி 24 காரட் தங்கத்தின் விலை 10 கிராம் ரூ.89,510 என்று இருந்தது. இந்த விலை ரூ.55,496 ஆகக் குறையலாம் என கணிக்கப்பட்டிருக்கிறது. இது இல்லத்தரசிகளுக்கு மகிழ்ச்சியான செய்தியாக இருந்தாலும் முதலீட்டாளர்களுக்கு அப்படியல்ல. இத்தனை நாட்களாக தங்கத்தின் விலை ஏறியதற்கு சில காரணங்கள் இருக்கின்றன. உலகளாவிய மந்தநிலை, பணவீக்கம், பொருளாதார நிச்சயமின்மை ஆகியவை முதலீட்டாளர்களை தங்கத்தை நோக்கி தள்ளியது.

டிமான்ட் எதற்கு அதிகமோ, அதன் விலையும் உயரும் என்பது அடிப்படை விதி. அதாவது தங்கத்தின் மீது முதலீடு அதிகரித்ததால் அதன் விலை உயர்ந்தது. உலகமே அமெரிக்க பொருளாதார சந்தையை அடிப்படையாக கொண்டுதான் இயங்கி வருகிறது. ஆனால் அமெரிக்காவின் பொருளாதாரத்தில் டிரம்ப் வந்த பிறகு பல மாற்றங்கள் எற்பட்டிருக்கின்றன. இதுவும் தங்கம் விலை உயர்வுக்கு காரணமாகும். டிரம்பின் வரி நடவடிக்கை கூட விலை உயர்வுக்கு முக்கிய காரணமாகும்.

ஆனால் இதெல்லாம் நேற்றுவரை நடந்த விஷயங்கள். இன்று நிலைமையே வேறு. தங்கத்திற்கு அதிக டிமான்ட் இருப்பதை உணர்ந்து கொண்ட உற்பத்தியாளர்கள், அதை மேலும் அதிகமாக தோண்டி எடுக்க தொடங்கியுள்ளனர். கடந்த ஆண்டில் தங்கம் தோண்டுவதால் ஒரு அவுன்ஸுக்கு $950 வரை லாபம் கிடைத்ததாக உற்பத்தியாளர்கள் கூறுகின்றனர். எனவே இன்று பல நிறுவனங்கள் தங்கத்தை தோண்டி எடுக்க வரிசை கட்டி நிற்கின்றன.

மறுபுறம் உலகளவில் தங்க சேமிப்பு 9% அதிகரித்து 2,16,265 டன்னாக உயர்ந்திருக்கிறது. குறிப்பாக ஆஸ்திரேலியா தங்கம் உற்பத்தியை அதிகரித்திருக்கிறது. நம்மூர் ரிசர்வ் வங்கி போல உலகம் முழுவதும் உள்ள நாடுகளில் இருக்கும் மத்திய வங்கிகளில் தங்கம் 1,000 டன்னுக்கும் அதிகமாக இருப்பு இருக்கிறது. எனவே மேலும் அதிகமாக தங்கத்தை வாங்க வங்கிகள் விருப்பம் காட்டவில்லை. ஆய்வு ஒன்றில் 71% வங்கிகள் தங்கத்தை வாங்கி குவிக்க விரும்பவில்லை என்று கூறியிருக்கின்றன.

எனவே டிமான்ட் குறைய தொடங்கியுள்ளது. இது போதுமே விலை சரிய. முதலீட்டாளர்களும் கொஞ்ச காலத்தில் தங்கத்திற்கு மாற்றாக வேறு ஒரு விஷயத்தில் முதலீடு செய்ய தொடங்குவார்கள். இதனால் விலை மளமளவென குறையும் என்று ஆய்வாளர்கள் கூறுகின்றனர். நீங்கள் என்ன நினைக்கிறீர்கள் மக்களே! தங்கம் விலை குறையுமா? அப்படி குறைந்தால் யாருக்கு லாபம்?

English summary

Due to ongoing international changes, the price of gold had seen a significant rise. However, in the coming days, it is expected that gold prices may drop by up to 38%. John Mills, a market expert at Morningstar, has stated this prediction. He has estimated that the price of gold per ounce could decrease from $3,080 to $1,820.