தங்கம் ஏன் தலைகீழாக மாறியது? நாளை என்ன நடக்குமோ.. எல்லாத்துக்கும் காரணமே இந்த ஃப்ளஷ்தான்!

Updated: Sunday, February 8, 2026, 9:49 [IST]

Subscribe to Oneindia Tamil

சென்னை: கடந்த வாரம் தங்கச் சந்தையில் யாரும் எதிர்பார்க்காத வகையில் மிகப் பெரிய ஏற்ற இறக்கங்கள் காணப்பட்டன. பொதுவாகப் பொருளாதார நெருக்கடி காலங்களில் தங்கம் ஒரு பாதுகாப்பான முதலீடாகக் கருதப்படும். ஆனால், கடந்த வாரம் அந்த நம்பிக்கையைத் தலைகீழாக மாற்றி, முதலீட்டாளர்களை அதிர்ச்சியில் ஆழ்த்தியது.

நிபுணர்கள் இதனை "லிக்குடிட்டி ஃப்ளஷ்" (Liquidity Flush) என்று அழைக்கிறார்கள். அதாவது மற்ற துறைகளில் ஏற்பட்ட நஷ்டத்தைச் சரிசெய்ய, முதலீட்டாளர்கள் தங்கத்தை விற்றுப் பணமாக மாற்றியதே இந்த வீழ்ச்சிக்கு முக்கியக் காரணம்.

முன்னெப்போதும் இல்லாத ஏற்ற இறக்கங்கள்

இந்த அதிரடி மாற்றத்திற்குப் பின்னால் உலகளாவிய பொருளாதாரக் காரணிகள் உள்ளன. குறிப்பாக, அமெரிக்க மத்திய வங்கியின் (Fed) அடுத்த தலைவராக கெவின் வார்ஷ் பரிந்துரைக்கப்பட்டது, சந்தையில் பெரும் தாக்கத்தை ஏற்படுத்தியது. அவர் வட்டி விகிதங்களைக் குறைக்க மாட்டார் என்ற எதிர்பார்ப்பு உருவானதால், அமெரிக்க டாலரின் மதிப்பு பலமடைந்தது. டாலர் மதிப்பு உயரும்போது, தங்கம் விலை குறையும் என்ற உலகளாவிய விதியின்படி, தங்கத்தின் விலை மளமளவெனச் சரிந்தது.

கடந்த 10 நாட்களின் தினசரி விலை நிலவரம்

கடந்த 10 நாட்களில் தங்கம் எவ்வளவு மாற்றங்களை கண்டது என்பதைப் பின்வரும் தரவுகள் காட்டுகின்றன. (24 காரட் தங்கம், ஒரு கிராமிற்கான உத்தேச விலை):

ஜனவரி 30: ₹16,529 (உச்சகட்ட விலை)

ஜனவரி 31: ₹15,649 (விலை குறையத் தொடங்கிய நாள்)

பிப்ரவரி 1: ₹16,058 (மீண்டும் சற்று உயர்வு)

பிப்ரவரி 2: ₹15,317 (பெரிய சரிவு)

பிப்ரவரி 3: ₹15,393 (தொடர் ஏற்ற இறக்கம்)

பிப்ரவரி 4: ₹15,944 (திடீர் உயர்வு)

பிப்ரவரி 5: ₹15,442 (இரண்டாவது பெரிய சரிவு)

பிப்ரவரி 6: ₹15,441 (மாற்றமில்லாத நிலை)

பிப்ரவரி 7: ₹15,371 (லேசான சரிவு)

பிப்ரவரி 8: ₹15,660 (மீண்டு வர முயற்சிக்கும் விலை)

திங்கட்கிழமை பயம்: நாளை என்ன நடக்கும்?

நாளை, பிப்ரவரி 9, 2026, திங்கட்கிழமை சந்தை மீண்டும் திறக்கப்படும்போது என்ன நடக்கும் என்ற அச்சம் மக்களிடையே எழுந்துள்ளது. கடந்த வார இறுதியில் ஏற்பட்ட சிறிய விலை உயர்வு நிலையானதுதானா அல்லது மீண்டும் விலை சரியுமா என்ற சந்தேகம் நிலவுகிறது.

நாளை விலை மாற்றத்திற்கான முக்கியக் காரணங்கள்:

பணவீக்கத் தரவுகள்: அமெரிக்காவின் நுகர்வோர் விலை குறியீடு (CPI) தரவுகள் இந்த வாரம் வெளியாக உள்ளன. பணவீக்கம் அதிகமாக இருந்தால், தங்கம் விலை மேலும் குறைய வாய்ப்புள்ளது.

டாலரின் ஆதிக்கம்: அமெரிக்க டாலர் குறியீடு தொடர்ந்து வலுவாக இருந்தால், தங்கம் மீதான முதலீடு குறையும்.

கட்டாய விற்பனை: பெரிய முதலீட்டு நிறுவனங்கள் (Hedge Funds) தங்களின் மற்ற நஷ்டங்களை ஈடுகட்ட இன்னும் தங்கத்தை விற்கக்கூடும் என்ற பயம் உள்ளது.

புவிசார் அரசியல் சூழல்: சில நாடுகளில் நிலவி வந்த பதற்றங்கள் குறையத் தொடங்கியுள்ளதால், பாதுகாப்பான முதலீடாகத் தங்கத்தை வாங்குவது குறைந்து வருகிறது. ஆனால் சீனா இன்னொரு பக்கம் தங்கம் வாங்கி வருகிறது. இதனால் தங்கம் விலை உயர்ந்தாலும் வியப்பதற்கு இல்லை .