தங்கம் விலை அசுர வளர்ச்சி! 2000ல் 10 கிராம் Gold வாங்கியிருந்தால்! இப்ப மதிப்பு என்ன தெரியுமா?

சென்னை: இந்தியாவில் தங்கம் என்பது வெறும் ஆபரணம் மட்டுமல்ல; அது ஒரு குடும்பத்தின் சேமிப்பு, அந்தஸ்து மற்றும் ஆபத்து காலங்களில் கைகொடுத்து உதவும் மிகச்சிறந்த நண்பன். கடந்த 26 ஆண்டுகளில் (2000 - 2026) இந்தியாவில் தங்கத்தின் விலை அடைந்துள்ள வியக்கத்தக்க வளர்ச்சியைப் பார்த்தால், அதன் உண்மையான மதிப்பு நமக்குத் புரியும்.

2000ஆம் ஆண்டில் வெறும் 4,400 ரூபாயாக இருந்த 10 கிராம் தங்கம், இன்று 2026இல் 1.6 லட்சம் ரூபாயைக் கடந்து இமாலய உச்சத்தைத் தொட்டுள்ளது.

2000 முதல் 2026 வரை: 10 கிராம் தங்கம் விலை பட்டியல்

இந்தியாவில் புதிய மில்லினியம் (2000) தொடங்கியதில் இருந்து 2026 வரை, தங்கத்தின் விலை எவ்வாறு படிப்படியாகவும், அண்மைக்காலமாக அசுர வேகத்திலும் உயர்ந்துள்ளது என்பதைப் பின்வரும் அட்டவணை காட்டுகிறது.

2000 ஆம் ஆண்டு 10 கிராம் தங்கத்தின் விலை ரூ 4,400 ஆகும். அது போல் 2005 இல் ரூ 7000 ஆனது, 2010 ஆம் ஆண்டு ரூ 18,500-ஆகவும் 2015 ஆம் ஆண்டு ரூ 26,343 ஆகவும், 2020 ஆம் ஆண்டு ரூ 48,651 ஆகவும், 2022 ஆம் ஆண்டு 56, 100 ரூபாயாகவும் , 2023 ஆம் ஆண்டு ரூ 61,100 -ஆகவும், 2024 ஆம் ஆண்டு ரூ 74,100-ஆகவும், 2025 ஆம் ஆண்டு ரூ 1,13,000- ஆகவும், 2026 ஆம் ஆண்டு ரூ 1,60,000 ஆக தங்கம் விலை உயர்ந்துக் கொண்டே செல்கிறது.

தங்கம் விலை கட்டுக்கடங்காமல் உயரக் கூடுதல் காரணங்கள் என்னென்ன?

2000ஆம் ஆண்டில் நடுத்தரக் குடும்பங்கள் எளிதாக வாங்கும் தூரத்தில் இருந்த தங்கம், இன்று சாமானியர்களுக்கு எட்டாக்கனியாக மாறியுள்ளதற்குப் பின்னால் உள்ள முக்கியப் பொருளாதாரக் காரணங்களை பார்க்கலாம்.

பணவீக்கத்திற்கு எதிரான கேடயம் (Inflation Hedge):காலப்போக்கில் பணத்தின் வாங்கும் திறன் (Purchasing Power) குறைந்து கொண்டே வருகிறது. உதாரணமாக, 2000ஆம் ஆண்டில் 4,400 ரூபாய்க்கு இருந்த மதிப்பு இன்று இல்லை. ஆனால், தங்கம் தனது மதிப்பை இழக்காமல் பணவீக்கத்தை விட வேகமாக வளர்வதால், மக்கள் இதில் அதிகம் முதலீடு செய்கிறார்கள்.

சர்வதேச அரசியல் மற்றும் போர்கள் :கடந்த சில ஆண்டுகளில் நிகழ்ந்த ரஷ்யா - உக்ரைன் போர், மத்திய கிழக்கு நாட்டுப் பதற்றங்கள் போன்றவற்றால் உலகப் பொருளாதாரம் பாதிக்கப்பட்டது. இதுபோன்ற இக்கட்டான சூழல்களில் முதலீட்டாளர்கள் பங்குச்சந்தையை நம்பாமல், தங்கத்தையே 'பாதுகாப்பான புகலிடமாக' (Safe Haven Asset) கருதுகிறார்கள்.

மத்திய வங்கிகளின் கொள்முதல்: இந்தியா உட்பட உலக நாடுகளின் மத்திய வங்கிகள் (RBI போன்றவை) தங்களது கரன்சி பாதுகாப்பிற்காக டாலருக்கு மாற்றாகத் தங்கத்தை டன் கணக்கில் வாங்கிச் சேமித்து வருகின்றன. இதனால் உலகச் சந்தையில் தங்கத்திற்கான தட்டுப்பாடு ஏற்பட்டு விலை உயர்கிறது.

இந்தியாவின் இறக்குமதி வரி உயர்வு: இந்தியா தனது தேவையின் பெரும்பகுதி தங்கத்தை வெளிநாடுகளில் இருந்தே இறக்குமதி செய்கிறது. அண்மையில் மத்திய அரசு தங்கம் மீதான இறக்குமதி வரியை கணிசமாக உயர்த்தியதே, 2025-2026 காலகட்டத்தில் தங்கம் விலை 1.5 லட்சத்தைத் தாண்டி திடீரென எகிறியதற்கு மிக முக்கியக் காரணமாகும்.

பாரம்பரியத் தேவையும் சுபமுகூர்த்த நாட்களும்: இந்தியாவில் குறிப்பாகத் தமிழகத்தில், பண்டிகைகள், தீபாவளி, அட்சய திருதியை மற்றும் திருமணக் காலங்களில் தங்கத்திற்கான ஆபரணத் தேவை எப்போதும் குறையாமல் ஏறுமுகத்திலேயே இருக்கிறது.

கடந்த 26 ஆண்டு கால வரலாற்றைத் திரும்பிப் பார்க்கும்போது, தங்கம் என்பது வெறும் அழகுக்கான ஆபரணம் மட்டுமல்ல, அது காலத்தை வென்ற மிகச்சிறந்த முதலீடு என்பது மீண்டும் நிரூபணமாகியுள்ளது. 2000ஆம் ஆண்டுடன் ஒப்பிடும்போது 2026இல் தங்கத்தின் விலை சுமார் 36 மடங்கு அதிகரித்துள்ளது முதலீட்டாளர்களை வியப்பில் ஆழ்த்தியுள்ளது.

English summary

In India, Gold is not just an ornament but a symbol of savings, social status, and financial security during difficult times. A look at the remarkable rise in gold prices between 2000 and 2026 highlights why gold continues to be considered one of the most trusted long-term investments in the country.