தங்க மார்க்கெட்டில் திடீர் ’பூம்’., விலை இப்போ குறைய வாய்ப்பேயில்லை ராஜா! நிபுணர் கொடுத்த வார்னிங்!

சென்னை: கடந்த சில மாதங்களாகவே தங்கத்தின் விலை கணிசமாக உயர்ந்து வரும் நிலையில், அதிக முதலீட்டால் தங்கத்தின் விலை விரைவில் குறையலாமென சொல்லப்படுகிறது. இந்நிலையில், உலகளாவிய பொருளாதார சூழ்நிலை மற்றும் புவிசார் அரசியல் பதற்றங்களின் மத்தியில், தங்க விலையில் பெரிய அளவிலான சரிவு ஏற்படுவது தற்போது சாத்தியம் அல்ல என்று ஜூலியஸ் பேயர் இந்தியா நிறுவனத்தின் நிர்வாக இயக்குனர் மிலிந்த் முசலா தெரிவித்துள்ளார்.

தங்கம் விலை நாளுக்கு நாள் தொடர்ந்து புதிய உச்சத்தை எட்டியுள்ளது. 22 காரட் ஆபரணத் தங்கத்தின் விலை ஒரு பவுனுக்கு ரூ.95,000-ஐ நெருங்கியுள்ளதால், திருமணங்கள் மற்றும் பண்டிகை போன்றவற்றுக்காக தங்கம் வாங்க தயாராகி வரும் பொதுமக்கள் பெரும் அதிர்ச்சியில் உள்ளனர்.

தங்கத்தின் விலை எப்போதும் சர்வதேச பொருளாதாரச் சூழ்நிலைகள், அமெரிக்க டாலரின் மதிப்பு, ரூபாயின் மதிப்பில் ஏற்படும் ஏற்றத் தாழ்வுகள் ஆகியவற்றின் அடிப்படையில் தீர்மானிக்கப்படுகிறது. கடந்த 6 மாதங்களில் தங்கமும் வெள்ளியும் விலைகளில் ஏற்பட்ட கடுமையான விலை உயர்வால் முதலீட்டாளர்கள் பெருமளவில் மதிப்புள்ள உலோகங்களில் ஈடுபட்டு வருகின்றனர்.

தங்கம் விலை

அதிக முதலீடு மற்றும் வாங்கும் திறன் ( over buying) காரணமாக விரைவில் தங்கத்தின் விலை சரியலாம் என சொல்லப்படுகிறது. இந்நிலையில், தங்க விலையில் பெரிய அளவிலான சரிவு ஏற்படுவது தற்போது சாத்தியம் அல்ல என்று ஜூலியஸ் பேயர் இந்தியா நிறுவனத்தின் நிர்வாக இயக்குனர் மிலிந்த் முசலா தெரிவித்துள்ளார். இதுதொடர்பாக பேசியுள்ள அவர்," சில நேரங்களில் 10 முதல் 20 சதவீதம் வரை இடைக்கால திருத்தங்கள் நிகழ்வது இயல்பானது. ஆனால், தற்போதைய விலை உயர்வின் வேகம், சந்தையின் வலிமை ஆகியவற்றை கருத்தில் கொண்டால், பெரிய அளவிலான விலை சரிவு ஏற்பட வாய்ப்பில்லை.

தங்க முதலீடு

அமெரிக்க டாலர் மதிப்பு குறையும் நிலை, உலகளாவிய புவிசார் அரசியல் பதற்றங்கள், மத்திய வங்கிகள் அமெரிக்க அரசுத் துறைகளிலிருந்து பணத்தை வாபஸ் பெறுவது போன்ற காரணிகள் தங்கத்தின் நீண்டகால வளர்ச்சிக்கு ஆதரவாக உள்ளன. எனவே, தற்போது தங்கம் ஒரு பாதுகாப்பான முதலீடாகவே பார்க்கப்படுகிறது. இந்த விலை உயர்வு தற்காலிகமானது அல்ல, நீண்டகாலத்தில் தங்கத்தின் மதிப்பு இன்னும் உயரும் வாய்ப்பு உள்ளது. அதே நேரத்தில், சில நாட்கள் அல்லது வாரங்களில் சிறிய விலை சரிவுகள் நிகழ்வது சந்தையின் இயல்பானது தான்.

மிலிந்த் முசலா

இந்தியா பொருளாதார வளர்ச்சி தொடர்பாக பார்க்கும் போது நிதியாண்டு 2026-ல் இந்தியாவின் மொத்த உள்நாட்டு உற்பத்தி (GDP) வளர்ச்சி சுமார் 6.5 முதல் 6.8 சதவீதம் வரை இருக்கும் என RBI, உலக வங்கி, IMF ஆகியவை கணித்துள்ளன. இது நியாயமான அளவு தான். ஆனால், வரி குறைப்புகள், வட்டி விகித தளர்வுகள், உள்நாட்டு உற்பத்தி ஊக்கங்கள் போன்ற காரணிகள் செயல்பட்டால் வளர்ச்சி சற்று அதிகமாக கூட இருக்கலாம். அதேபோல, உள்நாட்டு உற்பத்தி, வேளாண்மை மற்றும் உற்பத்தித் துறைகள் மீண்டும் உயரும்.

பொருளாதார வளர்ச்சி

இந்த ஆண்டின் மழை நிலை நல்லதாக இருந்ததால் விவசாய உற்பத்தி அதிகரிக்கும். இதனால் உணவு பொருட்களின் விலை நிலைமை கட்டுக்குள் இருக்கும். மொத்தத்தில், தங்கத்தின் விலை சில சதவீதம் குறையலாம் என்றாலும், உலக பொருளாதார நிலை, டாலர் மதிப்பு வீழ்ச்சி, அரசியல் பதற்றங்கள் ஆகியவை காரணமாக தங்கம் இன்னும் பல வருடங்களுக்கு உறுதியான முதலீட்டு வாய்ப்பாகவே இருக்கும்" என்று நிதி நிபுணர் மிலிந்த் முசலா தெரிவித்துள்ளார்.

English summary

Gold prices are near record highs as global tensions and economic uncertainty drive investor demand. Julius Baer India MD Milind Musale says a major crash is unlikely soon, though minor 10–20% corrections may occur. With weakening dollar value and strong geopolitical risks, gold remains a safe long-term investment option.