20% வரை சரிந்த தங்கம் விலை! ஆனாலும் இந்தியாவுக்கு முழு பலன் கிடைக்காது! நிபுணர்கள் சொல்லும் விளக்கம்

Updated: Monday, March 23, 2026, 10:36 [IST]

Subscribe to Oneindia Tamil

சென்னை: வளைகுடா போர் காரணமாக தங்கத்தின் விலை சர்வதேச அளவில் 20% வரை சரிந்திருக்கிறது. இருப்பினும், இந்தியர்களால் இதன் முழு பலனையும் அனுபவிக்க முடியாது என்று நிபுணர்கள் கூறுகிறார்கள்.

தங்கத்தின் விலை கடந்த காலங்களில் பெரும் உச்சத்தை தொட்டிருந்தது. எனவே எப்போது விலை குறையும் என பல்வேறு தரப்பினரும் எதிர்பார்த்திருந்தனர். இப்படி இருக்கையில், சர்வதேச அளவில் விலை குறைந்திருந்தாலும், இந்தியாவில் முழுமையாக 20% விலை குறைவு எதிரொலிக்காதது ஏமாற்றத்தை கொடுத்திருக்கிறது.

தங்கம் விலை குறைய காரணம் என்ன?

பொதுவாக போர் காலங்களில் தங்கத்தின் விலை அதிகரிக்கும். ஆனால், இந்த முறை குறைந்திருக்கிறது. ஏனெனில் பணம் வைத்திருக்கும் முதலீட்டாளர்கள், டாலர்தான் இனி எதிர்காலம் என்று நம்புகின்றனர். எனவே அதில் முதலீடு செய்கின்றனர். தங்கம் கண்டுக்கொள்ளாமல் விடப்பட்டிருக்கிறது. டிமாண்ட் இல்லாத பொருட்களின் விலை சரியும். எனவே தங்கத்தின் விலையும் வேகமாக சரிந்து வருகிறது.

டாலரின் மதிப்பு

டாலரை நம்ப காரணம், கச்சா எண்ணெய்யை வாங்கதான். கச்சா எண்ணெய் விலை உயர்ந்து வருவதால், நாடுகள் எண்ணெயை வாங்க அதிக டாலர்களைச் செலவிட வேண்டியுள்ளது. இதனால் டாலருக்கான தேவை அதிகரித்து அதன் மதிப்பு உயர்ந்துள்ளது. தங்கம் டாலரில் விலை நிர்ணயம் செய்யப்படுவதால், டாலர் மதிப்பு உயரும்போது தங்கத்தின் விலை குறைந்திருக்கிறது.

கச்சா எண்ணெய் விலை உயர்வும் பணவீக்கமும்

கச்சா எண்ணெய் விலை ஒரு பேரல் 120 டாலருக்கு விற்கப்படுகிறது. இதனால், பணவீக்கம் அதிகரிக்கும் நிலை ஏற்பட்டிருக்கிறது. நிலைமையை சமாளிக்க, வட்டி விகிதங்களை அமெரிக்க மத்திய வங்கி அதிகரித்திருக்கிறது. இது இன்னும் கொஞ்ச காலத்திற்கு உயர்த்திதான் வைக்கப்பட்டிருக்கும். எனவே வட்டி தராத தங்கத்தை விட, வட்டி அதிகம் கிடைக்கும் பத்திரங்கள் மீது முதலீட்டாளர்கள் பணத்தை போட தொடங்கியிருக்கிறார்கள். தங்கத்தை விற்றுதான் பணத்தை போடுகிறார்கள் என்பதால், தங்கத்தின் மதிப்பு குறைய தொடங்கியிருக்கிறது.

இந்தியாவில் ஏன் விலை குறையவில்லை?

சரி சர்வதேச அளவில் தங்கத்தின் மதிப்பு குறைந்தாலும், இந்தியாவில் ஏன் குறையவில்லை? என்று கேள்வி எழலாம். இதற்கு காரணம் இந்திய ரூபாயின் வீழ்ச்சிதான். சர்வதேச அளவில் தங்கம் 20% சரிந்தாலும், இந்தியாவில் ரூபாய் மதிப்பு (1 டாலர் = ₹92+) வீழ்ச்சியடைந்துள்ளதால், இந்திய வாடிக்கையாளர்களுக்கு இந்தச் சரிவு சுமார் 10% முதல் 15% வரை மட்டுமே பிரதிபலிக்கிறது.

தங்கம் விலை

தங்கம் சர்வதேச அளவில் டாலர் கொடுத்துதான் வாங்கப்படுகிறது. எனவே டாலர் மதிப்பு அதிகரிக்கும் போது தங்கத்தின் மதிப்பு குறையும். ஆனால், இந்தியாவில் டாலருக்கு எதிரான இந்திய ரூபாயின் மதிப்பு வீழ்ச்சியடைந்திருப்பதால், அதிக பணம் கொடுத்து டாலரை வாங்க வேண்டும். பின்னர், அந்த டாலரை கொடுத்து தங்கம் வாங்க வேண்டும். இதன் காரணமாகத்தான் தங்கத்தின் விலை இந்தியாவில் முழுமையாக பிரதிபலிக்கவில்லை.