படக்குனு 10 கிராம் வாங்கிப் போடுங்க மக்களே! சட்டுனு சரிந்த தங்கத்தின் விலை.. இன்னும் சரியப் போகுதாம்

சென்னை: இஸ்ரேல் - ஈரான் - அமெரிக்கா இடையே நீடித்து வரும் போர் பதற்றம் உலக பொருளாதாரத்தில் பல்வேறு தாக்கங்களை ஏற்படுத்தி வரும் நிலையில், தங்கத்தின் சர்வதேச விலை திடீரென 3 சதவீதத்துக்கும் அதிகமாக சரிந்துள்ளது. இதனால் தங்கத்தில் முதலீடு செய்தவர்களும், நகை வியாபாரிகளும் கவலையடைந்துள்ளனர். இந்நிலையில் தங்கத்தின் விலை மேலும் அதிகரிக்கலாம் என அஞ்சப்படும் சூழல் இருப்பதாகவும் கூறுகின்றனர் பொருளாதார நிபுணர்கள்.

ஈரான் -அமெரிக்கா - இஸ்ரேல் இடையிலான பதற்றம் தொடர்ந்து அதிகரித்து வரும் சூழலில், உலக சந்தைகளில் தங்கம் விலை கடுமையாக சரிந்துள்ளது. கடந்த சில வாரங்களாக போர் சூழ்நிலை காரணமாக எண்ணெய் விலை அதிகரித்து, பணவீக்கம் உயரக்கூடும் என்ற அச்சம் உருவாகியுள்ளது.

இதன் விளைவாக அமெரிக்க மத்திய வங்கி மற்றும் பிற நாடுகளின் மத்திய வங்கிகள் வட்டி விகிதத்தை உடனடியாக குறைக்கும் வாய்ப்பு குறைந்துள்ளதாக பொருளாதார நிபுணர்கள் தெரிவிக்கின்றனர். இந்த நிலைமையே தங்கம் விலைக்கு எதிர்மறை தாக்கத்தை ஏற்படுத்தியுள்ளதாக கூறப்படுகிறது.

தங்கம் விலை சரிவு

வட்டி விகிதங்கள் அதிகமாக இருக்கும் சூழலில், வட்டி வருவாய் வழங்காத தங்கத்தில் முதலீடு செய்வதில் முதலீட்டாளர்கள் தயக்கம் காட்டுவதால் தங்கம் விலை சரிவை சந்தித்துள்ளது. சமீபத்திய சந்தை நிலவரப்படி, சர்வதேச சந்தையில் தங்கத்தின் விலை ஒரே நேரத்தில் 3.8 சதவீதம் வரை சரிந்து, ஒரு அவுன்ஸ் தங்கம் சுமார் 4,320 அமெரிக்க டாலர் அளவிற்கு குறைந்துள்ளது. இது கடந்த ஆண்டு இறுதியில் இருந்த விலைக்கு மிக அருகில் இருப்பதாக சந்தை தகவல்கள் தெரிவிக்கின்றன.

ஈரான் இஸ்ரேல் போர்

தொடர்ந்து எட்டு நாட்களாக தங்கம் விலை சரிவை சந்தித்து வருவது குறிப்பிடத்தக்கது. மேலும், 1983ஆம் ஆண்டுக்குப் பிறகு மிகப்பெரிய வாராந்திர சரிவாக இது பதிவாகியுள்ளது என்பதும் கவனிக்கத்தக்க விஷயமாகும். போர் தொடங்கிய பிப்ரவரி 28ஆம் தேதி முதல் கடந்த மூன்று வாரங்களில், தங்கம் விலை தொடர்ந்து அழுத்தத்தை சந்தித்து வருகிறது. முதலீட்டாளர்கள் மற்ற சந்தைகளில் ஏற்பட்ட இழப்புகளை சரிசெய்ய தங்களிடம் இருந்த தங்கத்தை விற்பனை செய்ததும் இந்த சரிவுக்கு ஒரு முக்கிய காரணமாக பார்க்கப்படுகிறது.

கச்சா எண்ணெய் விலை

அதேநேரத்தில், கச்சா எண்ணெய் விலையிலும் ஆரம்பத்தில் உயர்வு காணப்பட்டாலும் பின்னர் சில அளவு சரிவு ஏற்பட்டது. பங்குச் சந்தைகளும் அதேபோல் நிலையற்ற சூழ்நிலையை எதிர்கொண்டுள்ளன. இதற்கிடையில், டொனால்ட் டிரம்ப், ஈரான் அரசுக்கு முக்கிய எச்சரிக்கை விடுத்ததாக தகவல்கள் வெளியாகியுள்ளன. உலகின் முக்கியமான கடல் வழித்தடமான ஹோர்மூஸ் நீரிணையை மீண்டும் திறக்க இரண்டு நாட்கள் அவகாசம் வழங்கப்பட்டுள்ளதாகவும், இல்லையெனில் ஈரானின் மின் நிலையங்கள் மீது தாக்குதல் நடத்தப்படும் என எச்சரிக்கப்பட்டதாகவும் கூறப்படுகிறது.

ஹோர்முஸ் நீரிணை

இதற்கு பதிலளித்த ஈரான் தரப்பில், தங்களது மின் நிலையங்கள் தாக்கப்பட்டால், ஹோர்முஸ் நீரிணையை முழுமையாக மூடி விடுவதாகவும், எரிசக்தி மற்றும் தகவல் தொழில்நுட்ப அமைப்புகளை குறிவைத்து தாக்குதல் நடத்துவதாகவும் எச்சரிக்கை விடுக்கப்பட்டதாக தகவல்கள் வெளியாகியுள்ளன. சந்தை நிபுணர்கள் கூறுவதாவது, தொழில்நுட்ப அடிப்படையில் தங்கம் விலை குறுகிய காலத்தில் மீண்டும் உயர வாய்ப்பு இருப்பதாகும்.

தங்கத்தின் வலிமை

குறிப்பாக தங்கத்தின் 14 நாள் சார்பு வலிமை குறியீடு (RSI) 30க்கும் கீழ் சரிந்துள்ளதால், இது 'அதிகமாக விற்கப்பட்ட நிலை' (oversold) என கருதப்படுகிறது. இதனால் அடுத்த சில நாட்களில் தங்கம் விலையில் திடீர் மீள்ச்சி ஏற்பட வாய்ப்பு இருப்பதாகவும் நிபுணர்கள் தெரிவிக்கின்றனர். மேலும், பெரிய முதலீட்டு நிறுவனங்கள் மற்றும் ஹெட்ஜ் நிதிகள் தங்கத்தில் முதலீட்டை அதிகரித்துள்ளதாக சமீபத்திய அமெரிக்க அரசு தரவுகள் காட்டுகின்றன.

தங்கம் விலை

இதனால் நீண்டகாலத்துக்கு தங்கம் விலை மீண்டும் சரிவை காணும் வாய்ப்பு இருப்பதாகவும் கூறப்படுகிறது. மொத்தத்தில், மத்திய கிழக்கில் நீடித்து வரும் போர் சூழ்நிலை உலக பொருளாதாரத்தில் பெரும் தாக்கத்தை ஏற்படுத்தி வரும் நிலையில், தங்கம் விலை தொடர்ந்து மாற்றம் காணும் நிலை உருவாகியுள்ளது. இந்த சூழ்நிலையில் முதலீட்டாளர்கள் கவனமாக முடிவெடுக்க வேண்டும் என்றும், உலக அரசியல் மற்றும் பொருளாதார நிலவரங்களை தொடர்ந்து கண்காணிப்பது அவசியம் என்றும் நிபுணர்கள் அறிவுறுத்துகின்றனர்.

English summary

Global gold prices fall over 3% amid market shifts, experts say rebound may happen soon.