Gold Investors: தங்கம் விலை தொடர் சரிவு! முதலீட்டாளர்களுக்கு நஷ்டம்? என்ன நடக்கிறது?

சென்னை: தங்கத்தின் விலை தொடர்ந்து சரிந்து வரும் நிலையில் ஓரிரு நாட்களில் விலை அதிகரிக்கும் என நகை வியாபாரிகள் சங்கத் தலைவர் ஜெயந்திலால் சலானி தெரிவித்துள்ளார். அது போல் முதலீட்டாளர்களுக்கு பாதிப்பு ஏற்படுமா என்பது குறித்தும் அவர் கருத்துகளை தெரிவித்துள்ளார்.

தங்கம் விலை கணிசமாகக் குறைந்து வருவதற்குப் பின்னால் பல சர்வதேச மற்றும் உள்நாட்டுப் பொருளாதாரக் காரணங்கள் உள்ளன. முக்கியமாக, சர்வதேசச் சந்தையில் நிலவும் சில மாற்றங்களே இந்தியாவிலும் தங்கம் விலை சரியக் காரணமாகின்றன.

அவை பின்வருமாறு:

அமெரிக்க டாலரின் மதிப்பு உயர்வு:

சர்வதேச சந்தையில் தங்கம் அமெரிக்க டாலரிலேயே வர்த்தகம் செய்யப்படுகிறது. தற்போது அமெரிக்க டாலரின் மதிப்பு மற்ற நாடுகளின் நாணயங்களுக்கு எதிராக வலுவடைந்துள்ளதால் (டாலர் குறியீடு 100-ஐத் தாண்டியுள்ளது), தங்கம் வாங்குவது மற்ற நாட்டு முதலீட்டாளர்களுக்கு அதிகச் செலவை ஏற்படுத்துகிறது. இதனால் அதன் தேவை குறைந்து விலை இறங்குகிறது.

வட்டி விகிதங்கள் உயர்வு: அமெரிக்காவின் மத்திய வங்கியான 'பெடரல் ரிசர்வ்' (US Fed), வட்டி விகிதங்களைக் குறைக்காமல் தொடர்ந்து உயர்த்தி அல்லது நிலையாக வைத்துள்ளது. வங்கிகளில் வட்டி விகிதம் அதிகமாக இருக்கும்போது, முதலீட்டாளர்கள் வட்டி தராத தங்கத்தில் முதலீடு செய்வதை விட, நிலையான வருமானம் தரும் வங்கிப் பத்திரங்கள் (Bonds) மற்றும் சேமிப்புகளில் முதலீடு செய்ய ஆர்வம் காட்டுகின்றனர்.

கச்சா எண்ணெய் விலை மற்றும் பணவீக்கம்: மத்திய கிழக்கு நாடுகளில் நிலவும் போர்ச் சூழலால் கச்சா எண்ணெய் விலை $100-ஐத் தாண்டியுள்ளது. இது உலகளவில் பணவீக்கத்தை அதிகரிக்கும் என்ற அச்சத்தை ஏற்படுத்தியுள்ளது. இந்தப் பணவீக்கத்தைக் கட்டுப்படுத்த மத்திய வங்கிகள் வட்டி விகிதத்தைக் குறைக்கத் தயங்குவது, தங்கத்தின் விலையைப் பாதிக்கிறது.

லாப நோக்கில் விற்பனை : தங்கம் விலை கடந்த சில மாதங்களில் மிக உச்சத்தை (சவரன் ரூ. 1.20 லட்சத்தைத் தாண்டி) எட்டியிருந்தது. இந்த விலையேற்றத்தைப் பயன்படுத்தி, பல பெரிய முதலீட்டாளர்கள் மற்றும் நிறுவனங்கள் தங்களது தங்கத்தை விற்று லாபம் ஈட்டத் தொடங்கியுள்ளனர். சந்தையில் தங்கம் விற்பனை அதிகரிக்கும்போது அதன் விலை குறைகிறது.

உள்நாட்டுத் தேவை மற்றும் நிதிநிலை: மார்ச் மாதம் நிதியாண்டின் இறுதிக்காலம் என்பதால், இந்தியாவில் பணப்புழக்கம் சற்று குறைவாக இருக்கும். மேலும், மிக அதிக விலையில் தங்கம் இருந்ததால் சில்லறை விற்பனை மற்றும் ஆபரணத் தங்கம் வாங்குவது மக்களிடையே சற்று குறைந்துள்ளது.

இந்த நிலையில் இன்றைய தினமும் தங்கம் விலை சவரனுக்கு ரூ 5360 சரிந்தது. இதனால் தங்கம் விலை ஒரு சவரன் 1,03,600-க்கு விற்பனையாகிறது. இதுகுறித்து ஜெயந்திலால் சலானி கூறியிருப்பதாவது: ரம்ஜான் முடிந்ததும் போர் முடிவுக்கு வர வாய்ப்பிருப்பதாக சொல்லப்படுகிறது.

தற்போது அமைதியற்ற சூழல் நிலவி வருவதால் தங்கம் விலை குறைந்துள்ளது. போர் முடிவுக்கு கொண்டு வருவது குறித்து பேச்சுவார்த்தைகள் நடத்தப்படும் என சொல்லப்படுகிறது.

எனவே பேச்சுவார்த்தை நடந்து போர் முடிவுக்கு வந்தால், தங்கத்தின் விலை உயரக் கூடும். தற்போது தங்கத்தின் விலை ரூ 1 லட்சம் வரை குறையும். அதற்கு மேல் குறையாது. தங்கத்தின் விலை குறைவால் முதலீட்டாளர்களுக்கு எந்த நஷ்டமும் இல்லை. நீண்ட கால முதலீடு என்பதால் எப்படியும் தங்கம் விலை உயரக் கூடும். எனவே முதலீட்டாளர்களுக்கு நஷ்டம் ஏதும் இல்லை என தெரிவித்துள்ளார்.

English summary

As gold prices continue to decline, Jewellers Association President Jayanthilal Chalani has stated that prices are likely to rise again within the next few days. He also addressed concerns about the impact on investors, noting that short-term fluctuations are common in the gold market and may not significantly affect long-term investments. His remarks provide reassurance while highlighting the need for cautious decision-making among investors during volatile market conditions.