படக்குனு 10 கிராம் வாங்கி போடுங்க.. சட்டென மாறிய தங்க சந்தை! 6 மாதத்தில் இல்லாத சரிவு! சரியான நேரமா?

Updated: Thursday, June 11, 2026, 12:33 [IST]

Subscribe to Oneindia Tamil

சென்னை: சர்வதேச சந்தையில் தங்கத்தின் விலை தொடர்ந்து கடுமையான அழுத்தத்தைச் சந்தித்து வரும் நிலையில், இன்றைய வர்த்தகத்தில் கடந்த ஆறு மாதங்களில் இல்லாத அளவுக்கு தங்கத்தின் விலை சரிந்ந்துள்ளது. இருப்பினும், பின்னர் சிறிய அளவில் மீண்டுள்ளதால் முதலீட்டாளர்கள் மிகக் கவனமாக தங்கத்தின் மீதான முதலீடு குறித்து சிந்திப்பது நல்லது என்கின்றனர் பொருளாதார நிபுணர்கள்.

உலகளாவிய பொருளாதார சூழல், அமெரிக்காவின் வட்டி விகித கொள்கை, மத்திய கிழக்கு பதற்றம் ஆகியவை தங்க சந்தையின் போக்கை தீர்மானிக்கும் காரணங்களாக உள்ளன. இந்த நிலையில், விரைவில் வெளியாகவுள்ள அமெரிக்க பணவீக்க அறிக்கையை முதலீட்டாளர்கள் எதிர்பார்த்துள்ளனர்.

இந்த நிலையில், இன்றைய தங்கம் சந்தை ஏற்ற இறக்கங்கள் நிறைந்ததாக உள்ளது. இன்று அதிகாலை வர்த்தகத்தில், ஸ்பாட் தங்கத்தின் விலை ஒரு அவுன்ஸுக்கு 4,077.39 டாலராக இருந்தது. அதற்கு முன்பு வர்த்தகத்தின் போது 4,022.09 டாலர் வரை சரிந்தது.

கடந்த ஆண்டு நவம்பர் 21-ம் தேதிக்குப் பிறகு இல்லாத குறைந்தபட்ச நிலையை தொட்டது. அதே நேரத்தில் ஆகஸ்ட் மாத அமெரிக்க தங்க எதிர்கால ஒப்பந்தங்களின் (Future gold) விலையும் சரிவை சந்தித்தது. சந்தை ஆய்வாளர்களின் கருத்துப்படி, கடந்த சில வாரங்களாக தங்கம் மீது விற்பனை அழுத்தம் அதிகரித்து வருகிறது. விலை தொடர்ந்து குறைந்ததால் பல முதலீட்டாளர்கள் தங்களது முதலீட்டு ஆபத்தை குறைக்கும் நடவடிக்கைகளில் ஈடுபட்டுள்ளனர்.

இதற்கிடையில் அமெரிக்காவில் மே மாத நுகர்வோர் பணவீக்க தரவுகள் வெளியிடப்பட்டுள்ளன. அதன்படி, கடந்த மூன்று ஆண்டுகளில் இல்லாத அளவுக்கு பணவீக்கம் அதிகரித்துள்ளது. குறிப்பாக மத்திய கிழக்கு பகுதியில் நீடித்து வரும் பதற்றம் காரணமாக எரிசக்தி பொருட்களின் விலை உயர்ந்ததே இந்த பணவீக்க உயர்வுக்கு முக்கிய காரணமாக கருதப்படுகிறது. இப்போது சந்தையின் கவனம் முழுவதும் அமெரிக்காவி மீது திரும்பியுள்ளது.

தற்போதைய சந்தை கணிப்புகளின்படி, இந்த ஆண்டு டிசம்பர் மாதத்திற்குள் அமெரிக்க மத்திய வங்கி மீண்டும் வட்டி விகிதத்தை உயர்த்தும் வாய்ப்பு 70 சதவீதத்திற்கும் அதிகமாக இருப்பதாக மதிப்பிடப்பட்டுள்ளது. பொதுவாக வட்டி விகிதங்கள் உயரும்போது வட்டி வருமானம் வழங்காத தங்கம் போன்ற முதலீட்டு சொத்துக்கள் மீது அழுத்தம் அதிகரிக்கும். இதுவே தற்போது தங்கத்தின் விலை சரிவுக்கு முக்கிய காரணமாக பார்க்கப்படுகிறது.

மற்றொரு புறம், அமெரிக்கா மற்றும் ஈரான் இடையேயான பதற்றமும் உலக சந்தைகளில் கவலையை ஏற்படுத்தியுள்ளது. அமெரிக்கா ஈரானில் பல்வேறு இலக்குகளை குறிவைத்து புதிய தாக்குதல்களை மேற்கொண்டுள்ளதாக தகவல்கள் வெளியாகியுள்ளன. அதற்கு பதிலடியாக ஹார்முஸ் ஜலசந்தியை மூடுவதாக ஈரான் அறிவித்திருப்பதும் உலக பொருளாதாரத்தை அதிர்ச்சிக்குள்ளாக்கியுள்ளது. உலகின் முக்கிய எண்ணெய் போக்குவரத்து பாதைகளில் ஒன்றாக கருதப்படும் ஹார்முஸ் ஜலசந்தி மூடப்பட்டால், கச்சா எண்ணெய் விலை கடுமையாக உயரும் அபாயம் உள்ளது.

இதன் காரணமாக வியாழக்கிழமை வர்த்தகத்தில் கச்சா எண்ணெய் விலை இரண்டு டாலருக்கும் அதிகமாக உயர்ந்தது. எண்ணெய் விலை உயர்வு உலகளாவிய பணவீக்கத்தை மேலும் தூண்டக்கூடும். வழக்கமாக பணவீக்கத்துக்கு எதிரான பாதுகாப்பு முதலீடாக தங்கம் கருதப்பட்டாலும், அதே நேரத்தில் வட்டி விகித உயர்வு தங்கத்தின் தேவையை குறைக்கும் என்பதால் சந்தையில் குழப்பமான நிலை காணப்படுகிறது.