Gold Rate Today: மொத்தமாக குறைந்த தங்கம் விலை.. ஒரே நாளில் அதிரடி சரிவு! காலையில் வந்த ஹேப்பி நியூஸ்

Updated: Thursday, April 9, 2026, 10:00 [IST]

Subscribe to Oneindia Tamil

சென்னை: வளைகுடா மோதலில் போர் நிறுத்தம் அமலுக்கு வந்தவுடனேயே தங்கம் விலை சட்டென நேற்றைய தினம் விலை எகிறியது.. இதற்கிடையே இஸ்ரேல் போர் நிறுத்த ஒப்பந்தத்தை மீறிவிட்டதாகச் சொன்ன ஈரான், ஹார்முஸ் ஜலசந்தியை மூடுவதாக நேற்றிரவு திடீரென அறிவித்தது. இந்த அறிவிப்பு வந்தவுடனேயே தங்கம் விலை ஏற்றம் சர்வதேச சந்தையில் நின்றுவிட்டது. அது இந்தியாவிலும் எதிரொலித்த நிலையில், ஆபரண தங்கம் விலை சவரனுக்கு ரூ.1600 குறைந்துள்ளது.

வளைகுடாவில் சூழல் சர்வதேச அளவில் தொடர்ந்து பல்வேறு விளைவுகளை ஏற்படுத்தி வருகிறது. நேற்றைய தினம் போர் முடிவுக்கு வந்துவிட்டதா டிரம்ப் அறிவித்தார். இரு வாரங்கள் தாக்குதலை நிறுத்தி வைப்பதாக டிரம்ப் அறிவிக்க.. ஈரானும் அதை உறுதி செய்தது. மேலும், ஹார்முஸ் ஜலசந்தியில் கப்பல் போக்குவரத்தும் ஆரம்பிக்கப்பட்டது.

சர்வதேச சந்தை

இந்த தகவல் வந்தவுடனேயே கச்சா எண்ணெய் விலை சரிந்தது. இதனால் டாலர் மதிப்பும் சரியவே தங்கம் விலை உயர ஆரம்பித்தது. சர்வதேச சந்தையில் ஒரு அவுன்ஸ் தங்கம் 4800 டாலர் வரை போனது. இனிமேல் தங்கம் இப்படி தான் இருக்கும்.. ஆட்டத்தை ஆரம்பித்துவிட்டது என்றே மக்கள் பலரும் நினைத்தனர். ஆனால், நிலைமை மாறியது. இரவே எல்லாம் மொத்தமாக மாறியது.

என்ன நடந்தது

அதாவது போர் நிறுத்த ஒப்பந்தத்தை மீறி இஸ்ரேலின் ஹெர்ம்ஸ் ஆளில்லா விமானம் ஒன்று ஈரானின் லார் நகரின் மீது பறந்ததாகவும் அதை ஈரான் படைகள் சுட்டு வீழ்த்தியதாகவும் தகவல் வெளியானது. இதை உறுதி செய்த ஈரான், தங்களது நவீன வான் பாதுகாப்பு அமைப்பு அந்த டிரோன்களை இடை மறித்து அழித்தாக தெரிவித்தது. மேலும், இதன் காரணமாக ஹார்முஸ் ஜலசந்தியை மூடுவதாகவும் ஈரான் அறிவித்தது. இந்த அறிவிப்பு வந்தவுடனேயே கச்சா எண்ணெய் விலை சரிவது நின்ற நிலையில், தங்கம் விலையும் உயர்வது நின்றுவிட்டது. எனவே, இந்திய சந்தையிலும் இதுவே எதிரொலிக்கும் என எதிர்பார்க்கப்படுகிறது.

தங்கம் விலை

நேற்றைய தினம் சென்னையில் தங்கம் விலை அதிரடியாக உயர்ந்தது. ஆபரணத் தங்கம் விலை சவரனுக்கு ரூ.2720 உயர்ந்து, ரூ.1,13,600க்கு விற்பனையானது. அதேபோல ஆபரணத் தங்கம் விலை கிராமுக்கு ரூ.340 உயர்ந்து, ரூ.14,200க்கு விற்கப்பட்டது.

இன்றைய தினம் சென்னையில் இன்று தங்கம் விலை சரிந்தது. ஆபரண தங்கம் விலை சவரனுக்கு ரூ.1600 குறைந்து, ரூ.1,12,000க்கு விற்பனை செய்யப்படுகிறது. 22 கேரட் தங்கம் விலை கிராமுக்கு ரூ.200 குறைந்து, ரூ.14,000க்கு விற்பனையாகிறது. அதேபோல வெள்ளி விலை கிராமுக்கு ரூ.5 குறைந்து, ரூ.260க்கு விற்பனையாகிறது.