Gold Rate Today: வாரத்தின் முதல் வர்த்தக நாள் மிக பெரிய அதிர்ச்சி கொடுத்த தங்கம் விலை.. தாறுமாறாக உயர்ந்தது!

Updated: Monday, January 19, 2026, 9:32 [IST]

Subscribe to Oneindia Tamil

சென்னை: இந்தாண்டு தங்கம் விலை கேப் விடாமல் தொடர்ந்து உயர்ந்தே வருகிறது. பல்வேறு சர்வதேச காரணங்களால் தங்கம் விலை குறைய வாய்ப்பு இருப்பது போலவே தெரியவில்லை. இதற்கிடையே வாரத்தின் முதல் வர்த்தக நாளான இன்றைய தினம் தங்கம் விலை தாறுமாறாக உயர்ந்துள்ளது. இன்று ஒரே நாளில் சவரனுக்கு ரூ.1360 உயர்ந்த தங்கம் விலை ரூ.1,07,600க்கு விற்பனையாகிறது.

தங்கம் விலை தொடர்ந்து உச்சம் தொட்டு வருகிறது. கொஞ்சம் குறையட்டும் பிறகு தங்கத்தை வாங்கலாம் என நினைப்போருக்கு அதிர்ச்சி கொடுக்கும் வகையில் தங்கம் விலை உயர்ந்தே வருகிறது. இதனால் ஏழை மட்டுமின்றி மிடில் கிளாஸ் மக்கள் கூட தங்கத்தை வாங்க முடியாத சூழலே தொடர்கிறது.

காரணங்கள்

சர்வதேச அளவில் நிகழும் மாற்றங்களே இதற்குப் பிரதானக் காரணமாக இருக்கிறது. அமெரிக்க அதிபரான டிரம்ப் கிரீன்லாந்து விவகாரத்தை அடுத்த கட்டத்திற்கு எடுத்துச் சென்றுள்ளனர். அமெரிக்காவின் தேசியப் பாதுகாப்புக்கு கிரீன்லாந்து கண்டிப்பாகத் தேவை எனச் சொல்லியிருக்கும் டிரம்ப் டென்மார்க், பிரிட்டன் உள்ளிட்ட நாடுகள் மீது 10% வரியை அறிவித்துள்ளார். இதனால் சர்வதேச பதற்றம் அதிகரித்தே இருக்கிறது. இதனால் தங்கம் விலை இன்றைய தினம் உயரும் என்றே தெரிகிறது.

விலை என்ன

கடந்த சனிக்கிழமை தங்கம் விலை சென்னையில் தங்கம் கிராம் ஒன்றுக்கு 50 ரூபாய் அதிகரித்து 13,280 ரூபாய்க்கு விற்பனை செய்யப்பட்டது.. சென்னையில் 22 காரட் ஆபரணத் தங்கம் சவரனுக்கு 400 ரூபாய் அதிகரித்து சனிக்கிழமை 1,06,240 ரூபாய்க்கு விற்பனையானது. வெள்ளியின் விலையும் சனிக்கிழமை கிராமுக்கு 4 ரூபாய் உயர்ந்து ஒரு கிராம் 310 ரூபாய்க்கு விற்பனை செய்யப்படுகிறது.

இன்றைய தங்கம் விலை

நேற்றைய தினம் ஞாயிற்றுக்கிழமை என்பதால் தங்கம் விலையில் மாற்றம் இல்லாமல் தொடர்ந்தது. இன்றைய தினம் திங்கள்கிழமை தங்கம் விலையில் பெரிய மாற்றம் இருக்கும் என்றே எதிர்பார்க்கப்பட்டது. அதற்கேற்பத் தங்கம் விலை மிக பெரியளவில் இன்று உயர்ந்தது. ஒரு சவரன் ஆபரண தங்கம் ரூ.1360 உயர்ந்து, ரூ.1,07,600க்கு விற்பனை செய்யப்படுகிறது. 22 கேரட் தங்கம் ஒரு கிராம் ரூ.170 உயர்ந்து, ரூ.13,450க்கு விற்பனையாகிறது. அதேபோல ஒரு கிராம் வெள்ளி ரூ.8 உயர்ந்து, ரூ.318க்கு விற்பனை செய்யப்படுகிறது.