Gold Rate Today: தங்கம் மார்கெட்டில் அடித்த சுனாமி.. ரூ.15,000 நெருங்கிய ஆபரண தங்கம்! வரலாறு காணாத உச்சம்

Updated: Wednesday, January 21, 2026, 13:14 [IST]

Subscribe to Oneindia Tamil

சென்னை: தங்கம் மற்றும் வெள்ளி விலை தொடர்ச்சியாக அதிகரித்து வருகிறது. இதனால் திருமணம் வைத்திருப்போர் தங்கத்திற்கே மிகப் பெரிய தொகையை ஒதுக்க வேண்டி இருக்கிறது. தங்கம் விலை இப்படித் தொடர்ந்து உச்சம் தொடரும் நிலையில், இன்றும் தங்கம் விலை உயர்ந்துள்ளது. சென்னையில் இன்று காலை ஆபரண தங்கம் விலை 2800 ரூபாய் உயர்ந்த நிலையில், பகலில் மீண்டும் தங்கம் விலை உயர்ந்துள்ளது. ஒரே நாளில் சவரனுக்கு 4120 ரூபாய் உயர்ந்துள்ளது.

தங்கம் விலை கடந்த இரண்டு ஆண்டுகளாக வரலாறு காணாத அளவுக்கு வேகமாக உயர்ந்து வருகிறது. கடந்தாண்டு மட்டும் தங்கம் விலை சர்வதேச சந்தையிலேயே கிட்டத்தட்ட 70% உயர்ந்திருந்தது. இந்தியாவிலும் கூட அதை விட வேகமாகவே உயர்ந்து வந்தது. இந்தாண்டு 20 நாட்கள் கூட ஆகாத நிலையில், அதற்குள் 10% தங்கம் விலை உயர்ந்துவிட்டது.

காரணம்

இப்போது தங்கம் விலை இந்தளவுக்கு உயர டிரம்ப் மட்டுமே பிரதானக் காரணம். அவர் கிரீன்லாந்து விவகாரத்தைப் பெரிய விஷயமாக மாற்றுவதே தங்கம் விலை உயரக் காரணமாகும். அமெரிக்காவுக்கு கிரீன்லாந்து வேண்டும் என்றும் அதைத் தனது கட்டுப்பாட்டில் கொண்டு வர ராணுவ நடவடிக்கை கூட எடுப்பேன் என டிரம்ப் சொல்கிறார். அதை எதிர்க்கும் ஐரோப்பிய நாடுகளையும் மீதும் டிரம்ப் மிரட்டுகிறார்.

உச்சம்

பொதுவாகவே சர்வதேச பதற்றம் இருக்கும் போது தங்கம் விலை தானாகவே உயரும். இப்போதும் கூட அதுவே நடந்துள்ளது. கிரீன்லாந்து குறித்து டிரம்ப் பேச ஆரம்பித்தவுடனேயே தங்கம் விலை தாறுமாறாக உயரத் தொடங்கியது. அத்தோடு டாலர் மதிப்பு சரிவதும், ரூபாய் மதிப்பு பலவீனமாக இருப்பதும் சேர்ந்து தங்கம் விலையைப் புதிய உச்சத்திற்கு ஒவ்வொரு நாளும் கூட்டிச் செல்கிறது.

நேற்றைய தினம் காலை ஆபரணத் தங்கம் சவரனுக்கு ரூ.1280 உயர்ந்த நிலையில், மாலை மீண்டும் ரூ.2320 உயர்ந்து, ரூ.1,11,200க்கு விற்பனையானது. அதாவது ஒரே நாளில் தங்கம் விலை சவரனுக்கு ரூ.3600 அதிகரித்துள்ளது. ஒரு கிராம் தங்கம் நேற்று மாலை 13,900க்கு விற்பனையானது. வெள்ளி விலை இப்போது கிராமுக்கு ரூ.340க்கு விற்பனையாகிறது.

இன்றைய விலை

சர்வதேச சந்தையில் தங்கம் விலை தாறுமாறாக உயர்ந்து வரும் சூழலில், இந்தியாவிலும் இன்று தங்கம் விலை உயர்ந்துள்ளது. சென்னையில் தங்கம் விலை புதிய உச்சத்தைத் தொட்டுள்ளது. இன்று சென்னையில் ஆபரண தங்கம் விலை 2800 ரூபாய் உயர்ந்துள்ளது.. ஒரு சவரன் ஆபரண தங்கம் சென்னையில் ரூ.1,14,00க்கு விற்பனை செய்யப்பட்டது. ஒரு கிராம் ஆபரண தங்கம் கிராமுக்கு ரூ.350 உயர்ந்து, ரூ.14,250க்கு விற்பனையானது.

இதற்கிடையே 3 மணி நேர கேப்பில் தங்கம் விலை மீண்டும் உயர்ந்துள்ளது. காலையில் 2800 ரூபாய் உயர்ந்த நிலையில், இப்போது மீண்டும் ரூ.1320 உயர்ந்துள்ளது. சென்னையில் இப்போது தங்கம் விலை சவரனுக்கு ரூ.1,15,320க்கு விற்பனை செய்யப்படுகிறது. 22 கேரட் ஒரு கிராம் தங்கம் ரூ.14,415க்கு விற்பனை செய்யப்படுகிறது