தங்கம் வாங்க இதுதான் சூப்பர் சான்ஸ்.. வருகிறது டோக்கனைஸ்டு தங்கம்.. Tokenised Gold என்றால் என்ன?
சென்னை: இந்தியக் குடும்பங்களில் தங்கத்திற்கு எப்போதும் தனி இடம் உண்டு. திருமணம், திருவிழாக்கள், சேமிப்பு என எல்லாவற்றிற்கும் நாம் தங்கத்தையே நம்புகிறோம். ஆனால், இன்று நகையாக மட்டுமே வாங்காமல், தங்கத்தில் முதலீடு செய்யப் பல புதிய வழிகள் வந்துவிட்டன.
மியூச்சுவல் ஃபண்ட் போல இருக்கும் 'கோல்டு இடிஎஃப்' (Gold ETF), அரசாங்கத்தின் 'சவூரின் கோல்டு பாண்ட்' (SGB), டிஜிட்டல் தங்கம் எனப் பல வழிகள் இருக்கும் நிலையில், இப்போது 'டோக்கனைஸ்டு தங்கம்' (Tokenised Gold) என்ற புதிய முறை மக்களிடையே பேசப்பட்டு வருகிறது. இது ஒரு சிறந்த கண்டுபிடிப்பா அல்லது இதில் ஏதேனும் ஆபத்து இருக்கிறதா? சாதாரண மக்களும் எளிதாகப் புரிந்துகொள்ளும் வகையில் இதைப் பார்ப்போம்.
டோக்கனைஸ்டு தங்கம் என்றால் என்ன?
"டோக்கனைஸ்டு தங்கம் என்பது பிளாக்செயின் (Blockchain) தொழில்நுட்பத்தின் அடிப்படையில் இயங்கும் ஒரு டிஜிட்டல் தங்கம் ஆகும். இதில், பாதுகாப்பான அறைகளில் (சில சமயம் வெளிநாடுகளில்) வைக்கப்பட்டுள்ள உண்மையான தங்கத்திற்குப் பதிலாக, இணைய உலகத்தில் உங்களுக்கு டிஜிட்டல் 'டோக்கன்' வழங்கப்படும்" என்று விளக்குகிறார் ஆனந்த் ரதி வெல்த் நிறுவனத்தின் நிர்வாக இயக்குனர் அர்ஜுன் குஹா தாகுர்தா.
அதாவது, நீங்கள் ஒரு தங்க நாணயத்தையோ அல்லது நகையையோ கையில் வாங்குவதற்குப் பதிலாக, கம்ப்யூட்டரில் டிஜிட்டல் டோக்கனாக வாங்குவீர்கள். இதில் இருக்கும் ஒரு பெரிய வசதி என்னவென்றால், மிக மிகக் குறைந்த பணத்திற்குக்கூட (உதாரணமாக 100 ரூபாய்க்குக்கூட) உங்களால் தங்கம் வாங்க முடியும்.
மற்ற தங்க முதலீடுகளை விட இது எப்படி மாறுபடுகிறது?
தங்க இடிஎஃப் (Gold ETF) போன்ற மற்ற முதலீடுகள் இந்திய அரசின் 'செபி' (SEBI) அமைப்பால் முறைப்படுத்தப்பட்டவை. ஆனால், இந்த டோக்கனைஸ்டு தங்கத்திற்கு இந்தியாவில் இன்னும் நேரடிச் சட்டங்களோ, கட்டுப்பாடுகளோ இல்லை.
விற்பனை வசதி: கோல்டு இடிஎஃப்-ஐ பங்குச் சந்தை இயங்கும் நேரத்தில் மட்டுமே விற்க முடியும். ஆனால் டோக்கனைஸ்டு தங்கத்தை 24 மணி நேரமும், எப்போது வேண்டுமானாலும் வாங்கலாம், விற்கலாம்.
வரி அதிகம்: டோக்கனைஸ்டு தங்கம் இந்தியாவில் 'கிரிப்டோ' போன்ற ஒரு டிஜிட்டல் சொத்தாகவே (VDA) பார்க்கப்படுகிறது. அதனால், இதில் கிடைக்கும் லாபத்திற்கு நேரடியாக 30% வரி விதிக்கப்படும். இது தவிர, வாங்கும் போது 1% டிடிஎஸ் (TDS) வரியும் உண்டு. ஆனால், கோல்டு இடிஎஃப் போன்றவற்றுக்கு வரி மிகக் குறைவு (12.5%).
இதில் இருக்கும் ஆபத்துகள் என்ன?
1. அரசாங்கப் பாதுகாப்பு இல்லை:
நீங்கள் டோக்கனைஸ்டு தங்கம் வாங்கும் போது, அந்த நிறுவனத்தையும், தங்கத்தைப் பாதுகாத்து வைக்கும் 'கஸ்டோடியன்' (Custodian) என்ற அமைப்பையும் மட்டுமே நீங்கள் நம்ப வேண்டும். ஒருவேளை அந்தப் பிளாட்பார்ம் மூடப்பட்டாலோ அல்லது ஏதேனும் தகராறு ஏற்பட்டாலோ, உங்களுக்காகப் பரிந்து பேச அரசு கட்டுப்பாட்டு அமைப்புகள் எதுவும் இல்லை.
2. தங்கம் உண்மையிலேயே இருக்கிறதா?
பிளாக்செயின் தொழில்நுட்பம் உங்களிடம் எத்தனை டோக்கன் இருக்கிறது என்பதைத் துல்லியமாகக் காட்டும். ஆனால், அதற்கு இணையாக நிஜத் தங்கம் லாக்கரில் பத்திரமாக இருக்கிறதா என்பதை அதனால் சொல்ல முடியாது. இந்தியா புல்லியன் மற்றும் ஜூவல்லர்ஸ் சங்கத்தின் (IBJA) தலைவர் பிரித்விராஜ் கோதாரி கூறும்போது, "தங்கத்தை வைத்துள்ள லாக்கர் நிறுவனத்தின் பெயர் என்ன, அதற்கு காப்பீடு (Insurance) இருக்கிறதா, பிஐஎஸ் ஹால்மார்க் (BIS Hallmarking) இருக்கிறதா என்பதை முதலீட்டாளர்கள் முதலிலேயே சரிபார்க்க வேண்டும்" என்கிறார்.
3. நிறுவனம் முடங்கினால் என்ன ஆகும்?
டோக்கனைஸ்டு தங்கம் விற்கும் தளம் ஏதேனும் காரணத்தால் முடங்கிப்போனால், உங்கள் டிஜிட்டல் டோக்கன் வெறும் காகிதமாக மாற வாய்ப்புண்டு. தங்கம் வெளிநாட்டு லாக்கர்களில் வைக்கப்பட்டிருந்தால், அதை மீட்டெடுப்பது இன்னும் கடினம்.
இதை நிஜத் தங்கமாக மாற்ற முடியுமா?
ஆம், மாற்றலாம். பெரும்பாலான நிறுவனங்கள் 0.5 கிராம் முதல் தங்கம் வாங்க அனுமதிக்கின்றன. ஆனால், அதை நீங்கள் நிஜத் தங்க நாணயமாகவோ, கட்டியாகவோ கையில் வாங்க நினைக்கும் போது 3% ஜிஎஸ்டி (GST), தயாரிப்புக் கூலி (Minting charges) மற்றும் டெலிவரி கட்டணங்களை நீங்கள்தான் செலுத்த வேண்டும்.
யார் இதில் முதலீடு செய்யலாம்?
தொழில்நுட்ப அறிவு உள்ளவர்கள், எப்போது வேண்டுமானாலும் தங்கம் வாங்க வேண்டும் என்று நினைப்பவர்கள் இதை முயற்சி செய்யலாம். ஆனால், நிதி வல்லுநர்கள் தரும் எச்சரிக்கை என்னவென்றால், உங்களுடைய மொத்த முதலீட்டில் 5% க்கும் குறைவாகவே இதில் முதலீடு செய்ய வேண்டும். பாதுகாப்பிற்கு, அரசாங்கத்தின் கோல்டு பாண்டுகளையே (SGB) தேர்வு செய்வது நல்லது.
Click it and Unblock the Notifications
Sign in with Google