பயங்கர ட்விஸ்ட்.. ஈரான் - அமெரிக்கா போர் நிறுத்தம்! தங்கம் விலை என்னவாகும்? வெளியான முக்கிய தகவல்

Updated: Wednesday, April 8, 2026, 7:45 [IST]

Subscribe to Oneindia Tamil

சென்னை: "நாகரிகமே அழிந்துவிடும்" என ட்ரம்ப் விடுத்த எச்சரிக்கை, அடுத்த சில மணி நேரங்களிலேயே "போர் நிறுத்தம்" என மாறியிருப்பது உலக நாடுகளை நிம்மதி பெருமூச்சு விட வைத்துள்ளது. பாகிஸ்தான் மத்தியஸ்தம், ஹார்முஸ் ஜலசந்தி திறப்பு என அதிரடி மாற்றங்கள் நிகழ்ந்துள்ள சூழலில், சாமானிய இந்தியர்களின் பார்வையின் இப்போது ஒரே கேள்விதான் - "தங்கம் விலை குறையுமா?"

தங்கம் விலை: இப்போதைய நிலவரம் என்ன?

சர்வதேச அரசியலில் போர் மேகங்கள் சூழ்ந்தால், முதலீட்டாளர்கள் அனைவரும் ஓடும் ஒரே பாதுகாப்பான புகலிடம் 'தங்கம்'. கடந்த 6 வாரங்களாக ஈரான் - இஸ்ரேல் - அமெரிக்கா மோதலால் சர்வதேச சந்தையில் தங்கம் விலை உச்சத்தைத் தொட்டிருந்தது. இப்போது போர் நிறுத்தம் அறிவிக்கப்பட்டுள்ளதால், சந்தையில் அதன் தாக்கம் எப்படி இருக்கும் எனப் பார்ப்போம்.

விலை குறைய வாய்ப்புள்ள காரணங்கள்:

நிம்மதி பெருமூச்சு விட்ட பங்குச்சந்தை: போர் நிறுத்தம் அறிவிக்கப்பட்ட நிமிடங்களிலேயே அமெரிக்க பங்குச்சந்தை (Stock Market) உயரத் தொடங்கிவிட்டது. முதலீட்டாளர்கள் தங்கத்தில் இருந்து பணத்தை எடுத்து மீண்டும் பங்குகளில் முதலீடு செய்ய ஆரம்பிப்பார்கள். இதனால் தங்கத்தின் மீதான மோகம் குறைந்து, விலை இறங்க வாய்ப்புள்ளது.

கச்சா எண்ணெய் சரிவு: ஹார்முஸ் ஜலசந்தி (Strait of Hormuz) மீண்டும் திறக்கப்படுவதால், கச்சா எண்ணெய் விநியோகம் சீராகும். எண்ணெய் விலை குறைந்தால், பணவீக்கம் கட்டுக்குள் வரும். இதுவும் தங்கம் விலை குறைய ஒரு முக்கிய காரணியாகும்.

டாலரின் மதிப்பு: போர் பதற்றம் குறையும்போது அமெரிக்க டாலரின் மதிப்பு வலுப்பெற வாய்ப்புள்ளது. பொதுவாக டாலர் வலுவடைந்தால், சர்வதேச சந்தையில் தங்கம் விலை குறையும்.

இருப்பினும்... விலை ஏன் சட்டென வீழ்ந்துவிடாது?

இது வெறும் 2 வார இடைவெளிதான்: இது நிரந்தர அமைதி ஒப்பந்தம் அல்ல, வெறும் 15 நாட்கள் போர் நிறுத்தம் மட்டுமே. இஸ்ரேல் - ஈரான் இடையே இன்னும் உள்ளுக்குள் புகைந்து கொண்டிருக்கும் மோதல் நீடிப்பதால், தங்கம் விலை 'மளமள'வென சரிந்துவிடாது.

இந்தியாவின் இறக்குமதி வரி: சர்வதேச சந்தையில் விலை குறைந்தாலும், இந்தியாவில் இறக்குமதி வரி மற்றும் ரூபாய் மதிப்பு நிலவரத்தைப் பொறுத்தே ஆபரணத் தங்கத்தின் விலை தீர்மானிக்கப்படும்.

தங்கம் விலை கணிப்பு: என்ன செய்யலாம்?

தற்போது நிலவும் சூழலில், தங்கம் விலையில் ஒரு சிறு சரிவு (Correction) ஏற்பட வாய்ப்புகள் அதிகம். கடந்த சில வாரங்களாக விஷம் போல ஏறிய விலை, இந்த 15 நாள் போர் நிறுத்த காலத்தில் சற்று தணியும்.

வாங்குபவர்களுக்கு டிப்ஸ்: நீங்கள் தங்கம் வாங்கத் திட்டமிட்டிருந்தால், இந்த வார இறுதி வரை சந்தையை உன்னிப்பாகக் கவனியுங்கள். ஈரான் - அமெரிக்கா பேச்சுவார்த்தை சுமூகமாக முடிந்தால், தங்கம் விலை இன்னும் ஓரளவு குறையலாம். ஆனால், மீண்டும் போர் பதற்றம் ஏற்பட்டால் விலை எகிறிவிடும். எனவே, மொத்தமாக முதலீடு செய்யாமல் சிறு சிறு பகுதிகளாக வாங்குவது புத்திசாலித்தனம்!

ட்ரம்ப்பின் இந்தத் திடீர் மனமாற்றம், உலகப் பொருளாதாரத்திற்கு 'ஆக்சிஜன்' கொடுத்துள்ளது. இது நீடித்தால் மட்டுமே நடுத்தர வர்க்கத்தின் தங்கக் கனவு நனவாகும்!