கல்லீரல் கல்லா போயிரும்லே.. வேணாம் குடிக்காதீங்கலே! டாக்டர் நேரடியாக காட்டிய டெமோ.. ஷாக் போட்டோ!
டெல்லி: இந்தியாவில் குறிப்பாக தமிழகத்தில் நாள்தோறும் மதுகுடிப்போரின் எண்ணிக்கையும், அதனால் கல்லீரல் பாதிக்கப்பட்டு உயிரிழப்போரின் எண்ணிக்கையும் அதிகரித்து வருகிறது. இந்நிலையில் மருத்துவர் ஒருவர் மதுக் குடிப்பவர் ஒருவரின் கல்லீரலையும், ஆரோக்கியமான தனது மனைவியின் கல்லீரலையும் ஒப்பிட்டு புகைப்படத்தை வெளியிட்டுள்ள நிலையில், தற்போது அது வேகமாக பகிரப்பட்டு வருகிறது.
மதுப்பழக்கம் நீண்ட காலமாகவே உலக அளவில் புழக்கத்தில் இருக்கிறது. இந்தியாவில் குடிக்கும் நபர்களின் எண்ணிக்கை கணிசமாக அதிகரித்து வருகிறது. குறிப்பாக கல்லூரி காலத்தில் இருந்தே மதுவுக்கு அடிமையாகும் இளைஞர்களின் எண்ணிக்கை அதிகரித்து வருகிறது.
கேரளா, தமிழகம், புதுச்சேரி, கர்நாடகா போன்ற மாநிலங்களில் மதுபானங்கள் சகஜமாக கிடைப்பதால் ஒரு சில நேரங்களில் பெண்களும் பள்ளி கல்லூரி மாணவிகளும் மது குடிக்கும் புகைப்படங்கள் கூட அவ்வப்போது வெளியாகி அதிர்ச்சியை ஏற்படுத்தி வருகிறது.
பொதுவாக ஆண்டுக்கு ஒருமுறை மாதத்திற்கு ஒருமுறை என குடித்து வந்தவர்கள் கூட நாள்தோறும் குடிக்கும் நிலைக்கு தள்ளப்பட்டு இருக்கின்றனர். இளைஞர்களும் அதிக அளவில் மது பழக்கத்திற்கு அடிமையாகி விபத்து, உடல்நலக் கோளாறு உள்ளிட்டவற்றால் உயிரிழக்கும் சம்பவங்களும் அதிகமாக இருக்கிறது. தமிழகத்தில் இளம் விதவைகளின் எண்ணிக்கை அதிகரித்து வருவதற்கு மது விற்பனையும் ஒரு காரணம் என குற்றம் சாட்டப்படுகிறது.
சமூக பிரச்சினைகள் மட்டுமல்லாது தனிமனித உடல் நலனிலும் மது அதிக அளவில் கோளாறுகளை ஏற்படுத்துகிறது. கல்லீரல், இதயம், சிறுநீரகம் மட்டுமல்லாது ஒட்டுமொத்த மனித உடல் அமைப்பையே சிதைக்கும் அளவுக்கு மதுவால் பல்வேறு பிரச்சனைகள் வருகிறது. குறிப்பாக கல்லீரல் மது குடிப்பவர்களால் அதிகம் பாதிப்புக்கு உள்ளாகிறது.
மதுவால் உடலில் உள்ள பல உறுப்புகள் ஒவ்வொன்றாக செயலிழக்க தொடங்கி உயிருக்கு ஆபத்தை ஏற்படுத்துகிறது. முதலில் மதுவால் பாதிக்கப்படுவது கல்லீரல் தான். ஆரம்பத்தில் கல்லீரல் சிறிது சிறிதாக செயலிழக்க தொடங்கி தொடர்ந்து கல்லீரலில் கொழுப்பு தேங்கி ஃபேட்டி லிவர் பிரச்சினை ஏற்படும். தொடர்ந்து ஆல்கஹாலிக் ஹெபடைடிஸ், ஆல்கஹால் சிரோசிஸ் உள்ளிட்ட பிரச்சனைகளும் ஏற்படுத்துகிறது இதை கவனிக்காமல் விட்டால் இறுதியில் மரணம் தான்.
இந்த நிலையில் மதுவால் கல்லீரலுக்கு ஏற்படும் பாதிப்பு குறித்து மருத்துவர் ஒருவர் தெளிவாக விளக்கியுள்ளார். வாரத்திற்கு ஒருமுறை குடிக்கிறேன் எனக் கூறப்படும் சோசியல் டிரிங்கர் ஒருவரின் கல்லீரலின் புகைப்படத்தையும் தனது ஆரோக்கியமான மனைவியின் கல்லீரலின் புகைப்படத்தையும் அவர் பகிர்ந்திருக்கிறார். மது குடிப்பவர் கல்லீரல் காய்ந்து போன ரப்பர் போல, கருப்பாகவும் இறுக்கமாகவும் காணப்படுகிறது. அதே நேரத்தில் அவரது மனைவியின் கல்லீரலோ பிங்க் நிறத்தில் உள்ளது. தற்போது இந்த புகைப்படம் சமூக வலைதளங்களில் வேகமாக பரவி வருகிறது. எனவே மதுவை இத்தோடு நிறுத்தி விடுவது நலம் என்கின்றனர் மருத்துவர்கள்.
Click it and Unblock the Notifications
Sign in with Google