வயதானால் உங்கள் எலும்புகள் தேய காரணம் கால்சியம் குறைபாடு அல்ல! மருத்துவர் விளக்கம்

சென்னை: வயதானால் பலருக்கு எலும்புகள் தேய்ந்து நடக்க முடியாமல், நிற்க முடியாமல், உட்கார கூட முடியாத அளவுக்கு அவதிப்படுவார்கள். இந்த நிலையில் எலும்புகள் தேய கால்சியம் குறைபாடு காரணமில்லை என மருத்துவர் ஒருவர் விளக்கியுள்ளார்.

இதுகுறித்து டாக்டர் ஹரிஹரன் கூறியிருப்பதாவது: வயதானால் உங்கள் எலும்புகள் தேய்வதற்குக் காரணம் கால்சியம் குறைபாடு அல்ல! - ஒரு அதிரடி உண்மை!

2016-ல் நான் பேலியோ டயட் (Paleo Diet) பரிந்துரைக்கத் தொடங்கியபோது, நூற்றுக்கணக்கான நோயாளிகளுக்கு முழுமையான ரத்தப் பரிசோதனைகளைச் செய்தேன். அப்போது ஒரு அதிர்ச்சியான உண்மையைக் கண்டறிந்தேன்: பரவலாக அனைவருக்கும் விட்டமின் டி (Vitamin D) குறைபாடு இருந்தது.

ஏன் 30ng/mL என்பது போதுமானதல்ல?

பெரும்பாலான லேப்களில் 30ng/mL என்பது 'Normal' எனக் குறிப்பிடப்பட்டிருக்கும். இது எப்படி வகுக்கப்பட்டது தெரியுமா? 30-க்குக் கீழ் சென்றால் Parathyroid (பாராதைராய்டு) ஹார்மோன் அதிகரித்து எலும்புகளை உருக்க ஆரம்பிக்கும். இதயத் துடிப்பு சீராக இருக்க ரத்தத்தில் கால்சியம் அவசியம் என்பதால், எலும்பில் இருக்கும் 5 கிலோ கால்சியத்தில் இருந்து உடல் திருட ஆரம்பிக்கிறது.

இந்த ஆபத்தைத் தவிர்க்கவே விட்டமின் டி 30 என்பது அளவுகோலாக வைக்கப்பட்டது. இது உயிர் காக்க மட்டுமே, எலும்பு உறுதிக்கு அல்ல!

கால்சியம் மாத்திரை ஒரு மாயை!

பல மருத்துவர்கள் வயதானவர்களுக்கு கால்சியம் மாத்திரைகளைப் பரிந்துரைக்கிறார்கள். இது பெரும்பாலும் தேவையற்றது.

➤ நம் எலும்புகளில் 5 கிலோ கால்சியம் உள்ளது.
➤ இதயத் துடிப்பு மற்றும் தசைச் செயல்பாட்டிற்குத் தேவையோ வெறும் 5 கிராம் மட்டுமே!
➤ உடலில் 1000 மடங்கு கால்சியம் இருப்பு இருக்கும்போது, மாத்திரை ஏன்?

உண்மையான பிரச்சினை கால்சியம் இல்லை, அதை எலும்புக்குள் கொண்டு செல்லும் 'சாவி' (Vitamin D) தான் நம்மிடம் இல்லை!

வெள்ளைக்காரர்களும் நாமும்: ஒரு ஒப்பீடு விட்டமின் டி சூரிய ஒளியில் இருந்து கிடைக்கிறது.

➊ வெள்ளையர்கள்: சூரிய ஒளி குறைவாக உள்ள நாடுகளில் இருப்பதால், குறைந்த ஒளியிலும் அதிக விட்டமின் டி தயாரிக்கும் வகையில் 'வெள்ளைத் தோல்' கொண்டுள்ளனர்.
➋ நாமோ: அதிக சூரிய ஒளி உள்ள நாட்டில் இருப்பதால், நம் தோல் கருப்பாக (Melanin) உள்ளது. நமக்கு அதிக வெயில் தேவை, ஆனால் நாம் வெயிலில் செல்வதே இல்லை!

பழங்குடியினரின் ரகசியம் (Hadzabe & Maasai) இன்றும் பழமையான வாழ்க்கை முறை வாழும் ஹட்சாபே மற்றும் மசாய் பழங்குடியினருக்கு எலும்புத் தேய்மானமே இல்லை. அவர்களின் ரத்தத்தில் விட்டமின் டி அளவு 50 ng/mL-க்கு மேல் உள்ளது. அவர்கள் நம் தாத்தாக்கள் காட்டிய வழி!

எனது பரிந்துரை: நீங்கள் 100 ஆண்டு காலம் எலும்பு உறுதியுடன் வாழ வேண்டுமென்றால்:

❶ உங்கள் விட்டமின் டி அளவை 50 ng/mL-க்கு மேல் பராமரியுங்கள்.
❷ அனாவசியமாக கால்சியம் மாத்திரைகள் எடுப்பதைத் தவிருங்கள்.
❸ உணவில் உள்ள கால்சியத்தை எலும்புக்குக் கடத்த விட்டமின் டி-யைச் சரியாக வைத்திருங்கள்.
அதற்கு விட்டமின் டி 60,000u உள்ள மாத்திரையை வாரம் ஒரு நாள் எடுத்துக்கொண்டே இருங்கள்.

"நார்மல் விட்டமின் டி அளவு 50ng/mL-க்கு மேல் இருக்க வேண்டும்" என்பதை உங்கள் மருத்துவரிடம் வலியுறுத்துங்கள். இவ்வாறு அவர் தெரிவித்துள்ளார்.

English summary

A doctor has explained that the severe bone wear and joint problems many people face in old age—making it difficult to walk, stand, or even sit—are not always caused by calcium deficiency. The expert highlighted that several other health factors can also lead to bone degeneration and mobility issues in the elderly.