Bullet Coffee: காலையில் எழுந்ததும் சாதா காபிக்கு பதிலாக புல்லட் காபி குடிங்க! உடம்புக்கு நல்லதாம்!

சென்னை: காலையில் எழுந்தவுடன் ஒரு கப் காபி குடிப்பது இந்தியர்களின் அன்றாட வழக்கமாக உள்ளது. ஆனால், சாதாரண காபிக்கு பதிலாக 'புல்லட் காபி' குடிப்பது உடல் ஆரோக்கியத்திற்கு, குறிப்பாக இந்தியர்களுக்கு எப்படி உதவும் என்பதை மும்பையை சேர்ந்த எலும்பு முறிவு சிகிச்சை நிபுணர் மனான் ஓரா (Dr Manan Vora) விரிவாக விளக்குகிறார்.

தூங்கி எழுந்ததும் காபியோ அல்லது டீயோ குடிக்காவிட்டால் பலருக்கு அன்றைய நாளே ஓடாது என்பார்கள். அந்த அளவுக்கு அடிக்ட்! இன்னும் சிலர் காலை உணவை தவிர்த்துவிட்டு அதற்கு பதிலாக 2 அல்லது 3 காபி, டீகளை குடித்து மதிய உணவை சாப்பிடுவோரும் இருக்கிறார்கள்.

காபி, டீ குடிப்பது உடல்நலனுக்கு கேடு என மருத்துவர்கள் பரிந்துரைத்தாலும் அதில் சர்க்கரைக்கு பதில் நாட்டு சர்க்கரைதான் போடுகிறேன் என்பார்கள். ஆனால் காபி, டீயே கெடுதல்தான் என்கிறார்கள். இதன் பழைய கஞ்சி, மோர், சர்க்கரை சேர்க்காத ஜூஸ், களி, கேழ்வரகு உள்ளிட்டவைகளை குடிக்க அறிவுறுத்துகிறார்கள். ஆனால் மும்பையை சேர்ந்த மருத்துவர் ஒருவர் புல்லட் காபி குடித்தால் நல்லது என்கிறார்.

புல்லட் காபி என்றால் என்ன?

வழக்கமான காபியில் சர்க்கரை மற்றும் பாலுக்குப் பதிலாக, ஆரோக்கியமான கொழுப்புச் சத்துக்கள் நிறைந்த நெய் (Ghee) அல்லது தேங்காய் எண்ணெய் (Coconut Oil) சேர்த்துத் தயாரிக்கப்படுவதே புல்லட் காபி.

மருத்துவர் கூறும் முக்கியக் காரணங்கள்

1. மூளை சுறுசுறுப்பு மற்றும் நீடித்த ஆற்றல்: சாதாரண காபி குடித்தால் உடனடியாக ஒரு உற்சாகம் கிடைக்கும், ஆனால் சிறிது நேரத்திலேயே அது குறைந்துவிடும். ஆனால், புல்லட் காபியில் உள்ள கொழுப்புச் சத்து, காபியில் இருக்கும் 'கஃபைன்' (Caffeine) மெதுவாக ரத்தத்தில் கலக்க உதவுகிறது. இதனால் நாள் முழுவதும் சீரான ஆற்றல் கிடைப்பதோடு, மூளை மிகவும் சுறுசுறுப்பாக இயங்கும்.

2. எலும்பு மற்றும் மூட்டு ஆரோக்கியம்: எலும்பு மருத்துவர் என்ற ரீதியில் அவர் குறிப்பிடுவது என்னவென்றால், இதில் சேர்க்கப்படும் நெய், மூட்டுகளுக்கு ஒரு 'லூப்ரிகண்ட்' (Lubricant) போலச் செயல்படுகிறது. இது மூட்டு தேய்மானம் மற்றும் வலிகளைக் குறைக்க உதவும். மேலும், கொழுப்பில் கரையும் வைட்டமின்களான A, D, E மற்றும் K ஆகியவற்றை உடல் உறிஞ்சுவதற்கு இது வழிவகை செய்கிறது.

3. இந்தியர்களின் உணவு முறையும் - இன்சுலின் பாதிப்பும்: இந்தியர்களின் உணவில் கார்போஹைட்ரேட் (சர்க்கரை சத்து) அதிகம் உள்ளது. காலையிலேயே சர்க்கரை கலந்த காபி குடிப்பது ரத்தத்தில் சர்க்கரை அளவை சட்டென உயர்த்தும். ஆனால், புல்லட் காபி குடிப்பது இன்சுலின் அளவைச் சீராக வைக்க உதவுகிறது. இது சர்க்கரை நோய் (Diabetes) அபாயத்தைக் குறைக்க உதவும்.

4. பசியைக் கட்டுப்படுத்தும்: இந்தக் காபியில் உள்ள ஆரோக்கியமான கொழுப்புகள் உங்களுக்கு நீண்ட நேரம் பசி எடுக்காமல் தடுக்கும். இதனால் தேவையற்ற தின்பண்டங்களை உண்பது தவிர்க்கப்பட்டு, உடல் எடையைக் குறைக்க விரும்புவோருக்கு இது ஒரு வரப்பிரசாதமாக அமையும்.

5. குடல் ஆரோக்கியம்: நெய்யில் உள்ள 'பியூட்ரிக் அமிலம்' (Butyric Acid) குடலில் உள்ள நச்சுக்களை நீக்கி, செரிமான மண்டலத்தைச் சீராக்குகிறது. இது இந்தியர்களிடையே பொதுவாகக் காணப்படும் கேஸ்ட்ரிக் (Gas) மற்றும் அஜீரணப் புகார்களைக் குறைக்கும்.

எப்படித் தயாரிப்பது? (மருத்துவர் பரிந்துரை)

ஒரு கப் சூடான கருப்பு காபி (Black Coffee) எடுத்துக் கொள்ளவும்.

அதில் ஒரு ஸ்பூன் சுத்தமான பசு நெய் அல்லது தேங்காய் எண்ணெய் சேர்க்கவும்.

இரண்டையும் ஒரு மிக்சியில் போட்டு நன்றாகக் கலக்கினால், மேலே நுரை ததும்பும் சுவையான புல்லட் காபி தயார்!

எச்சரிக்கை: இதில் சர்க்கரை எக்காரணம் கொண்டும் சேர்க்கக் கூடாது.

"காலையில் உங்கள் உடலுக்குத் தேவையான எரிபொருளைச் சரியாகக் கொடுங்கள். சாதாரண காபியைத் தவிர்த்து புல்லட் காபிக்கு மாறுவது, நீண்ட கால ஆரோக்கியத்திற்கு ஒரு சிறந்த முதலீடு" என்று அந்த எலும்பு மருத்துவ நிபுணர் உறுதியாகக் கூறுகிறார்.

பொறுப்புத் துறப்பு: இந்த புல்லட் காபி குறித்து ஒரு மருத்துவர்தான் பரிந்துரைத்துள்ளார் என்ற போதிலும் அவரவர் உடல்நிலைக்கு இது ஏற்றதா என்பதை உங்கள் குடும்ப மருத்துவரை அணுகி அவர் எடுத்துக் கொள்ள சொன்னால் மட்டும் எடுத்துக் கொள்ளலாம்.