தூங்கும் முன்பு டீ குடிக்கிறீங்களா? இரவில் காபி சாப்பிடலாமா? அப்ப கிரீன் டீ குடிக்கலாமா? இதை பாருங்க

Updated: Wednesday, September 25, 2024, 15:53 [IST]

Subscribe to Oneindia Tamil

சென்னை: இரவில் சிலர் காபி, டீ குடிப்பதை வாடிக்கையாக வைத்திருப்பார்கள்.. இப்படி இரவு நேரத்தில், சூடான பானங்கள் அருந்துவது நல்லதா? இதனால் உடலுக்கு கெடுதல் ஏற்படுமா? இதுகுறித்து நிபுணர்கள் சொல்லும் அறிவுரைகள் என்ன?

பெரும்பாலானோர், வேலை, நேரமின்மை காரணமாக பகல் முழுக்க சாப்பிட முடியாமல் போய்விடும்.. எனவே, இரவு நேரம் அதிகம் சாப்பிட நேரிடுகிறது.. இரவில் அதிகமாக சாப்பிட்டு, ஓய்வும் எடுக்கிறார்கள்.. இப்படி அதிகமாக சாப்பிட்டு தூங்குவதே உடல் எடையை அதிகரிக்க செய்யும் என்கிறார்கள்.

இரவு உணவு: இரவு உணவு மட்டுமல்ல, சிலருக்கு இரவு சாப்பிட்டதுமே டீ, காபி குடிக்கும் பழக்கம் இருக்கும்.. இதுவும் உடல் எடையை அதிகரிக்க செய்யும்.. அதுமட்டுமல்ல, காபியில் உள்ள காஃபின் தூக்கத்தை கெடுத்துவிடும்.. அத்துடன் மெல்ல மெல்ல உடல் பருமனுக்கும் வழி வகுக்கும்..

டீ குடித்துவிட்டு தூங்கினாலும் அதுவும் கெடுதிதான்.. இதனால், தூக்கம் தடைபடுவதுடன், தலைவலி பாதிப்பும், கவலையும் ஏற்பட்டுவிடும்.. இதற்கு காரணம், டீயில் உள்ள கஃபீன் (caffeine)தான். இதுஒருவகையில், டீ என்ற போதைக்குள் விழ வைத்துவிடும்.. டீ குடிக்காவிட்டால் தூக்கமே வராது என்ற எண்ணத்தையும் தந்துவிடும். அப்படியே டீ குடிக்க வேண்டும் என்று நினைத்தால், பிளாக் டீ குடிக்கலாம்..

பால் டீ: ஏனென்றால், டீயில் உள்ள ஃபேளவனாய்டுகள் அழற்சிக்கு எதிர்வினையாற்றுகிறது... இது உடலுக்கு கெடுதலை தராது.. பாலுடன் சேர்த்து டீ குடிப்பதை தவிர்க்க வேண்டும். அதேபோல, கிரீன் டீ குடிப்பது, உடலுக்கு எப்போதுமே நல்லதுதான்.. ஆனால், கிரீன் டீ என்றாலும்கூட, இரவு சாப்பிட்டதும் குடிக்கக்கூடாது. இதனாலும், தூக்கம் தடைபட்டு, உடல் எடை அதிகரிக்கும் என்கிறார்கள்., தேவைப்பட்டால், இரவு நேரங்களில் பால் அல்லது மஞ்சள் கலந்த பாலை குடிக்கலாம்.

டீ, காபி என்றில்லை, இரவு உணவுக்கு பிறகு தண்ணீர் அதிகமாக குடிப்பதையும் தவிர்க்க வேண்டுமாம். இதனாலும் தூக்கம் பாதிக்கும்.. எனவே, 7 அல்லது 8 மணிக்குள் இரவு உணவை முடித்துவிட்டு, 20 நிமிடமாவது நடைபயிற்சி செய்துவிட்டு தூங்க சென்றால், செரிமானம் சீராகும்.. உடல் எடையும் அதிகரிக்காமல் இருக்கும்.. நிம்மதியான தூக்கமும் கிடைக்கும் என்று அறிவுறுத்துகிறார்கள் மருத்துவர்கள்.

காலை உணவு: அதுமட்டுமல்ல, வெறும் வயிற்றில் டீ குடிப்பதை தவிர்க்க வேண்டுமாம். அதேபோல, காலை உணவு சாப்பிட்டதுமே டீ குடிப்பதை தவிர்க்க வேண்டுமாம். காலை உணவு சாப்பிடுவதற்கு 15 நிமிடங்களுக்கு முன்புதான் டீ குடிக்க வேண்டுமாம்.. அதேசமயம், தினமும் இரண்டு முறை மட்டுமே டீயை குடிக்க வேண்டும் என்கிறார்கள் டாக்டர்கள்.