சம்மர் வந்தாச்சு.. வியர்வை கொட்டோ கொட்டுனு கொட்டுதா.. குறைக்க எக்ஸ்பர்ட் சொல்லும் ஈசி டிப்ஸ்

சென்னை: நாம் சாப்பிடும் உணவுக்கும் வியர்வைக்கும் தொடர்பு இருப்பதாகவும் சில உணவு பழக்கத்தை கடைப்பிடித்தால் அதிகளவில் வியர்த்து கொட்டுவதில் இருந்து தப்பிக்கலாம் என்றும் பிரபல ஊட்டச்சத்து நிபுணர் லாவ்னீத் பத்ரா கூறியுள்ளார்.

கோடைக்காலம் வந்தாலே பலருக்கும் வீட்டை விட்டு வெளியே செல்வது என்றாலே வேப்பங்காய் போல கசக்கும். வீட்டில் இருந்து வெளியே சென்று விட்டு வந்தால் அதுவும் மதிய நேரங்களில் போய்விட்டால் அவ்வளவுதான்.. தனியாக வியர்வையில் ஒரு குளியல் போட்டது மாதிரி ஆகிவிடும்.

சட்டை எல்லம் தொப்பென்று தண்ணீரில் முக்கியது போல கூட சிலருக்கு வியர்வை கொட்டும். இதனால், விரைவாக சோர்வும் ஏற்பட்டு விடும். மதிய நேரங்களில் தர்ப்பூசணி, இளநீர் என குளிர்ச்சியான உணவு பதார்த்தங்களை தேடி அலைந்து சாப்பிட்டு கொஞ்சம் ஆசுவாசப்பட்டுக் கொள்ளலாம். ஆனால், வியர்வையால் உடல் முழுக்க ஏற்பட்ட ஒரு அசவுகரியம் வீட்டிற்கு போய் குளிக்கும் வரை தீராது.

இதனால், பலரும் இரண்டு முறை குளிப்பது என பல வழிகளை கையாள்கிறார்கள். நமது உணவு பழக்க வழக்கம் கூட எந்த அளவு வியர்வை ஏற்படுகிறது என்பதை தீர்மானிக்கும் ஒரு காரணி என்பது பலருக்கும் தெரியாது.. பிரபல ஊட்டச்சத்து நிபுணர் லாவ்னீத் பத்ரா சில உணவு பொருள் மூலமாகவும் கோடை முழுவதும் அவஸ்தையை ஏற்படுத்தும் வியர்வையை எதிர்த்து போராடலாம் என்கிறார். அவர் கூறிய சில டிப்ஸ்களை பார்க்கலாம்..

* வெயில் காலத்தில் வியர்வை மூலமாக அதிக நீர் இழப்பு ஏற்படும். எனவே, அதிக தண்ணீர் குடிப்பது நல்ல யோசனைதான். குளிர் காலத்தில் உடலுக்கு குளிர்ச்சியை ஏற்படுத்து, பட்டர் மில்க், ஜல்ஜீரா போன்ற பானங்களை குடிக்கலாம். வெறுமனே தண்ணீர் மட்டும் குடிக்காமல் இதுபோன்ற நீர் ஆகாரங்களை எடுக்கலாம். இவ்வாறு செய்வதன் மூலம் உடலை குளிர்ச்சியாக வைத்திருக்க முடியும் என்பதோடு, நீர் இழப்பு ஏற்படுவதை தடுக்க முடியும்.

* காஃபியை தவிர்க்கலாம். புத்துணர்ச்சி பெறுவதற்கு காஃபி பலருக்கும் தேவைப்படலாம். ஆனால், ஒரே ஒருமுறை மட்டும் கொஞ்சமாக காபி குடிப்பது நல்லது. காஃபின் - அதிக வியர்வை ஏற்பட வழிவகுக்கும். குறிப்பாக உள்ளங்கை, கால்கள், அக்குள் போன்ற இடங்களில் அதிக வியர்வை ஏற்படுவதை இது தூண்டும்.

* காரமான உணவுகளை தவிர்க்க வேண்டும். உணவு பொருளில் அதிக காரம் சேர்ப்பதை தவிர்க்க வேண்டும். காரமான உணவு பொருளை சாப்பிட்டால் உடனடியாக வியர்வை ஏற்படும். ஏனெனில், வெப்பத்திற்கு எதிர்வினையாற்றுவது போலவே காரமான பொருளை சாப்பிடும் போதும் உங்கள் உடல் செயல்படும்.

* வியர்வை எதிர்ப்பு பொருட்கள் என சொல்லப்படும் Antiperspirants-களை பயன்படுத்தலாம். ஏனெனில் இது வியர்வையை கட்டுப்படுத்துவதற்காக வடிவமைக்கப்பட்டுள்ளன. எனவே, இது அதிக வியர்வை ஏற்படுவதை கொஞ்சம் குறைக்கும்.

* அமைதியை கடைபிடிக்க வேண்டும். அச்சப்படும் போதும் மன உளைச்சல் அடையும் போதும் கூட வியர்க்கும். உங்கள் உடலில் உள்ள வியர்வை சுரப்பிகள் நீங்கள் பயப்படும்போது அல்லது மன அழுத்தத்தில் இருக்கும்போது செயல்படுகின்றன. இது உங்கள் உடலை அதிகமாக வியர்க்கச் செய்கிறது. உடலில் உள்ள வியர்வை சுரப்பிகள் செயல்பட தொடங்குகின்றன. எனவே அதிக வியர்வையை தவிர்க்க டென்ஷன் இன்றி அமைதியை கடைபிடிக்க வேண்டும்.

English summary

Famous nutritionist Lavneet Patra has said that there is a relationship between the food we eat and sweating and if we follow certain dietary habits we can avoid excessive sweating.