மாரடைப்பு வேறு! இதய செயலிழப்பு வேறு! இரண்டுக்கும் உள்ள வித்தியாசம் என்ன? டாக்டர் விளக்கம்
சென்னை: தெலுங்கானாவில் குளித்துவிட்டு வந்த பிளஸ் 2 மாணவி உயிரிழந்ததை மாரடைப்பு என சொல்லக் கூடாது என்கிறார்கள். அதாவது அந்த மாணவிக்கு ஏற்பட்டது கார்டியாக் அரெஸ்ட், எனவே இதயம் செயலிழப்பு என்றுதான் சொல்ல வேண்டும் என்கிறார்கள்.
தெலுங்கானாவில் பள்ளிக்குச் செல்ல குளித்துவிட்டு வந்த பிளஸ் 2 மாணவி கஸ்தூரி, திடீரென மயங்கி விழுந்தார். அவரை மருத்துவமனைக்கு அழைத்து சென்ற போது அவர் மாரடைப்பால் உயிரிழந்ததாக மருத்துவர்கள் தெரிவித்தனர்.
சிறு வயதில் மாரடைப்பு என்ற சம்பவத்தால் பல்வேறு தரப்பினர் அச்சமடைந்துள்ள நிலையில் அது குறித்து Sen Balan என்ற பேஸ்புக் பக்கத்தில் கூறியிருப்பதாவது : தமிழ் ஊடக நண்பர்கள் மருத்துவ வார்த்தைகளைப் பயன்படுத்தும் போது கவனமாகப் பயன்படுத்த வேண்டும். இதயத்திற்கு செல்லும் இரத்தக் குழாய்களில் அடைப்பு ஏற்பட்டு இதய பாதிப்பு ஏற்படுவதை ஆங்கிலத்தில் heart attack - myocardial infarction என்றும் தமிழில் மாரடைப்பு என்றும் அழைப்பதை வழக்கமாக வைத்திருக்கிறோம்.
அதேநேரம் பிறக்கும் போதே ஏற்படும் குறைபாடுகளால் எப்படி மற்ற உறுப்புகள் பாதிக்கப்படுகின்றதோ, அதேபோல இதயமும் பாதிக்கப்படலாம். அந்த பாதிப்பு அதிகமாக இருந்தால் சில நேரங்களில் சிறுவயதில் உடனடி இறப்பும் ஏற்பட வாய்ப்பு உள்ளது. Hypertrophic cardiomyopathy எனப்படும் இதய தசை வீக்க நோய், Long QT syndrome, Wolff-Parkinson-White syndrome போன்ற இதயதுடிப்பு கடத்துதல் நோய்கள், இதய வால்வு பிரச்சனைகள், Arrhythmia எனப்படும் சீரற்ற இதயத்துடிப்பு போன்ற பல நோய்கள் இதற்கு காரணமாக இருக்கலாம்.
இவற்றை மாரடைப்பு (Heart attack) என அழைக்கக் கூடாது, இதயச் செயலிழப்பு (cardiac arrest) என அழைப்பதே பொருத்தமாக இருக்கும்.
இந்தச் செய்தியின் ஆங்கிலத்தில் வந்த பதிப்புகளில் cardiac arrest என்றே குறிப்பிடப்பட்டுள்ளது. தமிழில் அதை இதயச் செயலிழப்பு என குறிப்பிடும் போது பொதுமக்களிடம் ஏற்படும் தேவையற்ற பயத்தையும், குழப்பத்தையும் தவிர்க்கலாம். இவ்வாறு அவர் குறிப்பிட்டுள்ளார்.
அண்மைக்காலமாக விளையாடச் சென்றவர்கள், ஜிம்முக்கு சென்றவர்கள், உள்ளிட்டோர் உயிரிழப்புகளை பலர் மாரடைப்பு என தவறாக குறிப்பிடுவதால் பெற்றோர் , பொதுமக்கள் மத்தியில் அச்சம் எழுந்துள்ளது.
Click it and Unblock the Notifications
Sign in with Google