White Eggs Vs Brown Eggs: முட்டையில் எது சிறந்தது? வெள்ளையா பழுப்பு நிறமா? எதில் சத்துக்கள் அதிகம்?

Updated: Thursday, January 29, 2026, 13:51 [IST]

Subscribe to Oneindia Tamil

சென்னை: தினமும் முட்டை சாப்பிட வேண்டும் சரி! அதில் எந்த முட்டையை சாப்பிட வேண்டும் என்பது தெரியுமா? வெள்ளை முட்டையா இல்லை பழுப்பு நிற முட்டையா என்பதை தெரிந்து கொள்வோம். கிராமப்புறங்களில் கிடைக்கும் பழுப்பு நிற நாட்டு முட்டைகள், நகரங்களில் உள்ள வெள்ளை முட்டைகளை விட சத்தானவை, அதிக சுவையானவை என பலர் நம்பி வருகின்றனர்.

பழுப்பு முட்டைகள் மிகவும் 'இயற்கையானவை' மற்றும் ஆரோக்கியத்திற்கு நல்லது என்ற பொதுவான கருத்து நம் சமூகத்தில் பல காலமாகவே நிலவி வருகிறது. ஆனால் இந்த நம்பிக்கை எந்த அளவுக்கு உண்மை? பழுப்பு முட்டைகள் உண்மையில் வெள்ளை முட்டைகளை விட சிறந்ததா? அறிவியல் பூர்வமான உண்மைகள் என்ன சொல்கின்றன என்பதை ஆராய்வோம்.

முட்டையின் ஓட்டின் நிறத்திற்கும் அதன் சத்து அல்லது சுவைக்கும் எந்த நேரடி தொடர்பும் இல்லை என்பதுதான் அறிவியல் உண்மை. முட்டை ஓட்டின் நிறமானது கோழியின் மரபணுக்களாலேயே பெரும்பாலும் தீர்மானிக்கப்படுகிறது. உதாரணமாக, வெள்ளை கலர் கோழிகள் பொதுவாக வெள்ளை முட்டைகளையும், பழுப்பு நிற கோழிகள் பழுப்பு முட்டைகளையும் இடுகின்றன.

கோழிகள் வளரும் சூழல்

கோழிகள் வளரும் சூழல், அவற்றின் உணவு மற்றும் மனஅழுத்தம் போன்ற காரணிகள் சில சமயங்களில் முட்டை ஓட்டின் நிறத்தைச் சற்றே கருமையாக்கவோ அல்லது லேசாகவோ மாற்றலாம். ஆனால் இந்த புறக்காரணிகள் முட்டையின் ஊட்டச்சத்து மதிப்பு அல்லது சுவையை ஒருபோதும் பாதிப்பதில்லை என்பது குறிப்பிடத்தக்கது.

பழுப்பு முட்டைகள்

பழுப்பு முட்டைகள் வெள்ளை முட்டைகளை விட இயற்கையானவை, சத்தானவை என்ற பொதுவான கருத்து உண்மையல்ல. 2010 ஆம் ஆண்டில் 'Journal Poultry Science' ஆய்விதழில் வெளியான ஒரு ஆய்வறிக்கையின்படி, முட்டையின் அளவு அல்லது அதன் ஓட்டின் நிறத்தைப் பொருட்படுத்தாமல் அனைத்து கோழி முட்டைகளும் ஊட்டச்சத்து ரீதியாக ஏறக்குறைய ஒரே மாதிரியானவை. இவை ஒரே அளவிலான வைட்டமின்கள், தாதுக்கள், புரதங்கள் மற்றும் கலோரிகளை வழங்குகின்றன.

முட்டையின் தரத்தையும் சத்துக்களையும் நிர்ணயிப்பது கோழி வளர்க்கப்படும் சூழல் மற்றும் அவற்றின் உணவுமுறைகளே. சூரிய ஒளியில் நன்கு வளர்க்கப்படும் கோழிகள் மற்றும் ஒமேகா-3 கொழுப்பு அமிலங்கள் நிறைந்த உணவை உட்கொள்ளும் கோழிகளின் முட்டைகளில் வைட்டமின் D மற்றும் ஒமேகா-3 கொழுப்புகளின் அளவு அதிகமாக இருக்கும் என்று பல ஆராய்ச்சிகள் சுட்டிக் காட்டுகின்றன.

பழுப்பு நிற முட்டையா வெள்ளை நிறமா

சுவையைப் பொறுத்தவரை, பழுப்பு மற்றும் வெள்ளை முட்டைகளுக்கு இடையே ஓட்டின் நிறம் காரணமாக எந்த குறிப்பிடத்தக்க வேறுபாடும் இல்லை. கோழிகளின் உணவு முறை மற்றும் முட்டையின் புத்துணர்ச்சி ஆகியவை அதன் சுவையை வெகுவாகப் பாதிக்கின்றன. முட்டைகளின் சிறப்பான சுவையையும் ஊட்டச்சத்துக்களையும் நீண்ட காலம் பாதுகாக்க, அவற்றை குளிர்சாதனப் பெட்டியில் குறைந்த வெப்பநிலையில் சேமிப்பது மிகவும் அவசியம்.

"சண்டே ஹோ யா மண்டே, ரோஸ் காவோ அண்டே" (ஞாயிறு அல்லது திங்கள், தினமும் முட்டை சாப்பிடுங்கள்) என்ற பிரபலமான வாசகம், முட்டைகளை அன்றாட உணவில் சேர்த்துக் கொள்வதன் முக்கியத்துவத்தையும், அவற்றின் ஆரோக்கிய நன்மைகளையும் மிகத் தெளிவாக எடுத்துரைக்கிறது. முட்டைகள் அதிக ஊட்டச்சத்து நிறைந்தவை என்பதுடன், எளிதாக எங்கும் கிடைக்கக் கூடிய மலிவான உணவுப் பொருளாகும்.

வேகவைத்த முட்டை

ஒரு வேகவைத்த முட்டையில் சுமார் 6 கிராம் புரதம், 0.6 கிராம் கார்போஹைடிரேட்டுகள், 5 கிராம் கொழுப்புகள் (2 கிராம் ஒற்றை நிறைவுறா கொழுப்பு, 0.7 கிராம் பல நிறைவுறா கொழுப்பு மற்றும் 1.5 கிராம் நிறைவுற்ற கொழுப்பு), 213 மி.கி. கொலஸ்ட்ரால் மற்றும் 63 மி.கி. சோடியம் ஆகியவை நிறைந்துள்ளன.

முட்டையின் வெள்ளைக் கருவில் புரதம், நியாசின் (வைட்டமின் B3), ரிபோஃப்ளேவின் (வைட்டமின் B2), குளோரின், சோடியம், பொட்டாசியம், துத்தநாகம், சல்ஃபர் போன்ற அத்தியாவசிய சத்துக்கள் உள்ளன. மஞ்சள் கருவில் வைட்டமின் A, D, E போன்ற கொழுப்பில் கரையும் வைட்டமின்களும், வைட்டமின் B12, ஃபோலிக் அமிலம், கோலைன், லூட்டின், இரும்புச்சத்து, கால்சியம், தாமிரம் மற்றும் பாஸ்பரஸ் போன்ற முக்கிய ஊட்டச்சத்துக்களும் நிரம்பியுள்ளன.

ஆரோக்கிய நன்மைகள்

முட்டையின் முழுமையான ஆரோக்கிய நன்மைகளை அடைய, புதிய மற்றும் விரிசல்கள் அற்ற முட்டைகளைத் தேர்ந்தெடுப்பது மிகவும் முக்கியம். வாங்குவதற்கு முன், முட்டையின் நிறம், தனித்துவமான வாசனை, மற்றும் அதன் வெளிப்புறத் தன்மை ஆகியவற்றை கவனமாக பரிசோதிக்க வேண்டும். எப்போதும் புதிய முட்டைகளையே வாங்குங்கள். முட்டைகளை குளிர்ச்சியான, உலர்ந்த இடத்தில் சேமித்து, சமைப்பதற்கு முன் குளிர்சாதனப் பெட்டியில் இருந்து எடுத்து அறை வெப்பநிலையில் சிறிது நேரம் வைக்கவும்.