செருப்பு கிளாத்தி மீனை வாங்குறீங்களா? சத்துள்ள செருப்பு மீனின் ஸ்பெஷல்.. மருத்துவ குணமுள்ள கிளாத்தி

Updated: Saturday, December 14, 2024, 21:12 [IST]

Subscribe to Oneindia Tamil

சென்னை: மருத்துவ குணங்கள் நிறைந்த கிளாத்தி மீன்களை பற்றி தெரியுமா? இந்த மீனிலுள்ள சத்துக்கள் என்னென்ன தெரியுமா? இந்த மீன்களை எப்படி உணவில் பயன்படுத்துவது? எந்த காலகட்டத்தில் இத்தகைய கிளாத்தி மீன்கள் கிடைக்கும்? சுருக்கமாக இங்கே பார்க்கலாம்.

மீன்கள் என்றாலே சத்துக்கள் நிறைந்த உணவுவகைகள்தான். ஆனால் பெரும்பாலான மீன்களை பற்றி அறியாததால், அவைகளை உணவில் அவ்வளவாக பயன்படுத்துவதில்லை. அதில் மிக முக்கியமானது இந்த கிளாத்தி மீன்கள்.

கிளாத்தி மீன்கள்: மன்னார் வளைகுடா ஆழ்கடல் பகுதியில் மட்டுமே இந்த மீன்கள் வாழக்கூடியவை.. பார்ப்பதற்கு செருப்பு போன்ற உடலமைப்பும் செருப்பு போன்ற கடினமான தோலமைப்பையும் கொண்டிருக்குமாம் இந்த கிளாத்தி மீன்கள். அதனால்தான், இதனை செருப்பு மீன்கள் என்று அழைக்கிறார்கள்.

இந்த கிளாத்தி மீன்கள் எல்லா காலகட்டத்திலும் கிடைக்காது.. ஜூலை மாதம் இறுதியில் தொடங்கி ஆகஸ்ட் மாதம் இறுதி வரையில் மட்டுமே கிளாத்தி மீன்கள் கிடைக்கும்.. அதிலும், ஒரு படகிற்கு 2,000 கிலோ முதல் 3,000 கிலோ வரையில் கிடைக்குமாம். ஷீலா மீனை போலவே, இந்த மீனின் ருசிகள் இருக்கும். வாவல் மீனை போலவும் இதன் ருசி இருக்கும். இந்த மீனின் நடுவில் மட்டும் முள் எலும்பு போல இருக்கும். ஒரு மீன் 2 முதல் 3 கிலோ வரை வரையில் மட்டுமே இருக்கும்.

செருப்பு மீன்கள்: இந்த மீனில் ஒமேகா-3 ஊட்டச்சத்து நிறைந்துள்ளது.. புரோட்டீன்களும் அபரிமிதமாக உள்ளன. இரும்புச்சத்துக்கள் அதிகமாக உள்ளதால், ரத்தத்திலுள்ள, ரத்த சிவப்பணுக்களை இந்த மீன்கள் அதிகரிக்க செய்கின்றன.. அதேபோல,. இந்த கிளாத்தி மீன்களை சாப்பிடும்போது, உடலிலுள்ள சோடியம் அளவை பூர்த்தி செய்துவிடும்..

இதிலுள்ள பாஸ்பரஸ் செல்லுலார் பாதிப்பை சரிசெய்து புரத உருவாக்கம் மற்றும் ஹார்மோன்களை சமநிலைப்படுத்துகிறது.. அஜீரண கோளாறு இருந்தாலும் அது சரியாகிவிடும். கிளாத்தி மீன்களிலுள்ள கால்சியம் ஊட்டச்சத்துக்கள், எலும்புகள், பற்களை ஆரோக்கியமாக வைக்க உதவுகிறது.
அபார ருசி: இந்த மீனையும் , மற்ற மீன்களை போல குழம்பு, கிரேவி செய்யலாம்.. சிலர் புட்டு சமைத்து சாப்பிடுவார்கள்.. ஆனால், இதன் தலைப்பகுதியை குழம்பு வைத்து சாப்பிட்டால் அபார ருசியாக இருக்குமாம். ஆனால், சமைக்கும்போது, இந்த தோலை மட்டும் நீக்கிவிட்டு சாப்பிடலாம் என்கிறார்கள் மீனவர்கள்,

இத்தனை சிறப்புகளை கிளாத்தி மீன்கள் கொண்டிருப்பதால்தான், கேரளா உள்ளிட்ட அரபு மற்றும் ஜரோப்பிய நாடுகளுக்கு கப்பல் மூலமாகவும், விமானம் மூலமாகவும் கிளாத்தி மீன்கள் கொண்டு செல்லப்படுகின்றன. அதேபோல உள்ளுர் மக்களும் அதிகளவில் வாங்கி சாப்பிடுகிறார்கள்.. ஒரு கிலோ ரூ.170 முதல் ரூ.200 வரை விற்கப்படுகிறதாம்.