தமிழகத்தில் இன்று

ஜூ-ன்07, 2000

நால்வகைப் பசும்பொன்னும் - ஒரு
நாலா யிரவகைப் பணக்கு வையும்
வேல்வகை வில்வகையும் - அம்பு
விதங்களும் தூணியும் வாள்வகையும்
சூல்வகை தடிவகையும் - பல
தொனிசெயும் பறைகளும் கொணர்ந்துவை த்தே
பால்வளர் மன்னவர் தாம் - அங்குப்
பணித்ததை என்னுளம் மறந்திடுமோ? (24)

கிழவியர் தபசியர் போல் - பழங்
கிளிக்கதை படிப்பவன் பொறுமையென் றும்
பழவினை முடிவென் றும் - சொலிப்
பதுங்கிநிற் போன், மறந் தன்மையி லான்,
வழவழத் தருமனுக் கோ - இந்த
மாநில மன்னவர் தலைமைதந்தார் - புவி
முழுதையும் தனியே குடிகொண் டான் (25)

தம்பியர் தோள்வலி யால் - இவன்
சக்கர வர்த்தியென் றுயர்ந்துது வும்,
வெம்பிடு மதகரி யான் - புகழ்
வேள்விசெய் தந்நிலை முழக்கிய தும்,
அம்புவி மன்னரெ லாம் - இவன்
ஆணைதம் சிரத்தினில் அணிந்தவ ராய்
நம்பரும் பெருஞ்செல் வம் - இவன்
நலங்கினர் சபையினில் பொழிந்தது வும், (26)

எப்படிப் பொறுத்திடு வேன்? - இவன்
இளமையின் வளமைகள் அறியே னோ?
குப்பை கொலோமுத் தும்? - அந்தக்
குரைகடல் நிலத்தவர் கொணர்ந்து பெய் தார்
சிப்பியும் பவளங்க ளும் - ஒளி
திரண்டவென் சங்கத்தின் குவியல்க ளும்
ஒப்பிலவை டூரியமும் - கொடுத்து
ஒதுங்கி நின்றான் இவன் ஒருவனுக்கே (27)

மலைநா டுடைய மன்னர் - பல
மான் கொணர்ந்தார், புதுத் தேன்கொணர்ந்தார்,
கொலைநால் வாய்கொணர்ந்தார் - மலைக்
குதிரையும் பன்றியும் கொணர்ந்துதந் தார்
கலைமான் கொம்புகளும் - பெருங்
களிறுடைத் தந்தமும் கவரிக ளும்
விலையார் தோல்வகை யும் - கொண்டு
மேலும்பொன் வைத்தங்கு வணங்கி நின் றார் (28)

செந்நிறத் தோல், கருந் தோல் - அந்த
திருவளர் உதவியின் தோலுட னே
வெந்நிறப் புலித்தோல் கள் - பல
வேழங்கள் ஆடுகள் இவற்றுடைத் தோல்,
பன்னிற மயிருடைகள் - விலை
பகரரும் பறவைகள், விலங்கினங் கள்,
பொன்னிறப் பாஞ்சாலி - மகிழ்
பூத்திடும் சந்தனம் அகில்வகை கள். (29)

ஏலங் கருப்பூ ரம் - நறும்
இலவங்கம் பாக்குநற் சாதி வகை,
கோலம் பெறக் கொணர்ந் தே - அவர்
கொட்டி நின்றார் , கரம் கட்டி நின்றார்,
மேலுந் தலத்திலுள் ளார் - பல
வேந்தர் அப்பாண்டவர் விழைந்திடவே
ஓலந் தரக் கொணர்ந் தே - வைத்த
தொவ்வொன்றும் என் மனத் துறைந்ததுவே (30)

மாலைகள் பொன்னும்முத் தும் - மணி
வகைகளிற் புனைந்தவும் கொணர்ந்துபெய் தார்
சேலைகள் நூறுவன் னம் பல
சித்திரத் தொழில்வகை சேர்ந்தன வாய்,
சாலவும் பொன்னிழைத் தே - தெய்வத்
தையலர் விழைவன பலர் கொணர்ந் தார்
கோலநற் பட்டுக்க ளின் - வகை
கூறுவதோய எண்ணில் ஏறுவ தோ? (31)

சுழல்களும் கடகங் ளும் - மணிக்
கவசமும் மகுடமும் கணக்கில வாம்
நிழல்நிறப் பரிபல வும் - செந்
நிறத்தன பலவும்வெண் ணிறம்பல வும்
தழல்நிறம்மேக நிறம் - விண்ணில்
சாரும் இந்திரவில்லை நேரும்நிறம்
அழகிய கிளிவயிற் றின் - வண்ணம்
ஆர்ந்தன வாய்ப்பணி சேர்ந்தன வாய். (32)