400 விக்கெட்டுகளை வீழ்த்தினார் ஆம்புரோஸ்

லீட்ஸ்:

மேற்கிந்தியத் தீவுகள் அணியின் வேகப் பந்து வீச்சாளர் கர்ட்லி ஆம்புரோஸ், டெஸ்ட் கிரிக்கெட்டில் 400 விக்கெட்டுகளை வீழ்த்தி சாதனை படைத்துள்ளார்.

இங்கிலாந்துக்கு எதிராக லீட்ஸில் நடைபெற்று வரும் 4-வது கிரிக்கெட் டெஸ்ட்டில் அவர் இச் சாதனையை படைத்தார். இதன் மூலம் டெஸ்ட்கிரிக்கெட்டில் 400 விக்கெட்டுகளுக்கு மேல் வீழ்த்தியவர்கள் பட்டியலில் அவர் 5-வது இடம் பெற்றார்.

97 டெஸ்ட் போட்டிகளில் விளையாடியுள்ள ஆம்புரோஸ், ஒரு இன்னிங்ஸில் 5 அல்லது அதற்கு மேல் விக்கெட்டுகளை 22 முறை வீழ்த்தியுள்ளார். ஒரு டெஸ்ட்போட்டியில் 10 அல்லது அதற்கு மேல் விக்கெட்டுகளை 3 முறை வீழ்த்தியுள்ளார். 45 ரன்களுக்கு 8 விக்கெட்டுகளை வீழ்த்தியதே இவரது சிறந்த பந்துவீச்சாகும்.

400 விக்கெட்டுகளுக்கு மேல் வீழ்த்தியவர்கள் பட்டியலில் மேற்கிந்தியத் தீவுகள் அணியின் கார்ட்னி வால்ஷ் முதலிடத்தில் உள்ளார். அவர் 120டெஸ்டுகளில் விளையாடி 472 விக்கெட்டுக்களை வீழ்த்தியுள்ளார்.

இரண்டாவது இடத்தில் இந்தியாவின் கபில்தேவ் (434 விக்கெட்டுகள்), 3-வது இடத்தில் நியுசிலாந்தின் ரிச்சர்டு ஹாட்லி (431 விக்கெட்டுகள்),4-வது இடத்தில் பாகிஸ்தான் வாஸிம் அக்ரம் (407 விக்கெட்டுகள்) உள்ளனர்.

400 விக்கெட்டுகளை அடுத்து நெருங்கக் கூடிய இடத்தில் இருப்பவர் ஆஸ்திரேலியாவின் ஷேன் வார்னே ஆவார். அவர் 84 டெஸ்டுகளில் 366 விக்கெட்டுகளைவீழ்த்தியுள்ளார்.