உலகில் 100 சிறந்த நிறுவனங்களில் ஒன்று இந்தியாவின் ரிலையன்ஸ்

மும்பை:

உலகில் சிறப்பாக நிர்வகிக்கப்படும் 100 சிறந்த நிறுவனங்கள் பட்டியலில் இந்தியாவின் ரிலையன்ஸ் இன்டஸ்ட்ரீஸ் லிமிடெட் நிறுவனமும் இடம்பெற்றுள்ளது.

அமெரிக்காவில் இருந்து வெளியாகும் இன்டஸ்ட்ரி வீக் என்ற பத்திரிக்கை இப் பட்டியலைத் தயாரித்துள்ளது. தொடர்ந்து இரண்டாவது ஆண்டாக 100நிறுவனங்கள் பட்டியலில் ரிலையன்ஸ் நிறுவனம் இடம் பெற்றுள்ளது குறிப்பிடத்தக்கது.

இப் பட்டியலில் இடம் பெற நிறுவனத்தின் நிதி நிலைமை உள்பட 4 தகுதி நிலையைத் தாண்ட வேண்டும் என்பது குறிப்பிடத்தக்கது. உலகம் முழுவதும் உள்ள90-க்கும் அதிகமான வர்த்தகத் தலைவர்கள், நிபுணர்கள் ஆகியோர் கொண்ட குழு இப் பட்டியலைத் தயாரித்துள்ளது.

உலக சராசரிக்கும் அதிகமாக ரசாயனப் பொருட்களை உற்பத்தி செய்து ரசாயன நிறுவனங்களிலேயே ரிலையன்ஸ் நிறுவனம் முதலிடம் பெற்றுள்ளதுகுறிப்பிடத்தக்கது.

இப் பட்டியலில் ஹிந்துஸ்தான் லீவர் நிறுவனமும் இடம் பெற்றுள்ளது. இருப்பினும் முழுமையான இந்திய நிறுவனம் என்ற பெருமையை ரிலையன்ஸ்நிறுவனத்துக்குக் கிடைத்துள்ளது. ஹிந்துஸ்தான் லீவர் நிறுவனம் இந்திய நிறுவனங்கள் வரிசையில் வரவில்லை.

பெருமை மிகு இப் பட்டியலில் ஜெனரல் எலக்ட்ரிக் கம்பெனி, ஐபிஎம் கார்ப்பொரேஷன், டூ பான்ட் கம்பெனி, ஜான்சன் அன்ட் ஜான்சன், இன்டெல்கார்ப்பொரேஷன். மோட்டரோலா, நோக்கியா, டொயோடா மோட்டார் கார்ப்பொரேஷன் போன்ற உலகின் பெரிய நிறுவனங்கள் இடம்பெற்றுள்ளன என்பது குறிப்பிடத்தக்கது.

யு.என்.ஐ.