புடின், கிளின்டன் நியூயார்க்கில் சந்திக்கின்றனர்

வாஷிங்டன்:

ரஷ்ய அதிபர் விளாடிமிர் புடினை அமெரிக்க அதிபர் பில் கிளின்டன் நியுயார்க்கில் அடுத்தவாரம் சந்தித்துப் பேசுகிறார்.

இத் தகவலை அமெரிக்க வெளியுறவுத் துறை அதிகாரிகள் தெரிவித்தனர்.

நியுயார்க்கில் உள்ள ஐக்கிய நாடுகள் சபையின் மில்லேனியம் மாநாடு அடுத்த வாரம் நடைபெறுகிறது. இம் மாநாட்டில் சபையில் உறுப்பினர்களாக உள்ள155 நாடுகளின் அதிபர்களும், பிரதமர்களும் கலந்து கொள்கின்றனர்.

இம் மாநாட்டில் கலந்து கொள்ள வரும் ரஷ்ய அதிபர் விளாடிமிர் புடினைச் சந்திக்க அமெரிக்க அதிபர் பில் கிளின்டன் திட்டமிட்டுள்ளார்.

சமீபகாலத்தில் இரு நாட்டுத் தலைவர்களும் சந்தித்துப் பேச இருப்பது இது மூன்றாவது முறையாகும். ஏற்கெனவே ஜூன் மாதம் மாஸ்கோவிலும், ஜூலையில்ஜப்பான் நாட்டில் உள்ள ஒகிநாவாவிலும் இருவரும் சந்தித்துப் பேசினர்.

இரு நாடுகளுக்கும் இடையே உள்ள பிரச்சினைகள், சர்வதேச பிரச்சினைகள் உள்ளிட்டவை குறித்து இரு நாட்டுத் தலைவர்களும் கலந்து ஆலோசிப்பார்கள்என்று தெரிகிறது.