ராஜ்குமார் மீட்பு முயற்சிக்கு கர்நாடக எதிர்க்கட்சிகள் ஆதரவு

பெங்களூர்:

நடிகர் ராஜ்குமாரை மீட்பதற்கு தமிழக-கர்நாடக அரசுகள் எடுத்து வரும் நடவடிக்கைகளுக்கு கர்நாடக எதிர்க்கட்சிகள் ஆதரவு தெரிவித்துள்ளன.

தமிழக முதல்வர் கருணாநிதியுடன் நடத்திய பேச்சுவார்த்தை விவரங்களை எதிர்க்கட்சியினருக்கு விளக்குவதற்காக அனைத்துக் கட்சி கூட்டத்தை முதல்வர்எஸ்.எம்.கிருஷ்ணா சனிக்கிழமை கூட்டினார்.

முதல்வர் இல்லமான கிருஷ்ணாவில் இந்தக் கூட்டம் நடந்தது. இதில் பல்வேறு எதிர்க்கட்சிகளின் தலைவர்கள், உயர் போலீஸ் அதிகாரிகள் கலந்துகொண்டனர்.

கூட்டம் முடிந்ததும் காவல்துறை அமைச்சர் மல்லிகார்ஜூன கார்கே நிருபர்களிடம் கூறியதாவது:

அனைத்துக் கட்சிக்கூட்டத்தில் ராஜ்குமாரை மீட்க அரசு எடுத்த நடவடிக்கைகள் குறித்து முதல்வர் எஸ்.எம்.கிருஷ்ணா கூறினார். எதிர்க்கட்சித்தலைவர்களும் அரசு இதுவரை எடுத்த நடவடிக்கைகளில் திருப்தி தெரிவித்தனர்.

முன்னதாக, தமிழக முதல்வர் கருணாநிதி பெங்களூர் வந்திருந்தபோது, கர்நாடக முதல்வர் கிருஷ்ணாவுடன் நடத்திய ஆலோசைனையின்போது, வீரப்பனுடன்பேச்சுவார்த்தை மூலம் மட்டுமே பிரச்சனைக்கு தீர்வு காண முடியும் என்று தீர்மானித்தனர்.

இதுதொடர்பாக, ஏற்கனவே தமிழ்நாடு, கர்நாடக உள்துறை செயலாளர்கள் டெல்லி சென்று பிரதமர் வாஜ்பாய், உள்துறை அமைச்சர் அத்வானி, மத்தியஉள்துறை செயலாளர்களிடம் விளக்கிக் கூறினார். அவர்கள் இதற்கு அனுப்பிய பதிலில் பேச்சுவார்த்தை மூலமே இதை அணுகுவது நல்லது எனகூறியுள்ளனர்.

டாக்டர் ராஜ்குமாரை மீட்க இரு மாநில அரசுகளும் எடுக்கும் நடவடிக்கைக்கு ஆதரவு தருவதாக எதிர்க்கட்சிகள் கூறியுள்ளன என்றார் கார்கே.