டேபிள் டென்னிஸ்: முதல் சுற்றில் தமிழகம் வெற்றி

பெங்களூர்:

பெங்களூரில் 62 வது ஜூனியர் தேசிய மற்றும் மாநிலங்களுக்கு இடையேயான டேபிள் டென்னிஸ் போட்டி வியாழக்கிழமை தொடங்கியது.

தொடக்கப் போட்டிகளில் தற்போதைய சாம்பியன் பெங்கால், தமிழ்நாடு அணிகள் அபார வெற்றி பெற்றன.

ஆண்கள் பிரிவு முதல் சுற்றுப் போட்டி ஒன்றில் தமிழ்நாடு, ஜம்மு காஷ்மீருடன் மோதியது. ஓர் அணி வெல்ல 3 போட்டிகளில் வென்றாக வேண்டும்.

தமிழ்நாடு அணியின் எஸ்.ஏ.சகாயராஜ், நிகில் கேசக்கை 21-7, 21-7 என்ற கணக்கில் வென்றார். தமிழ்நாட்டின் வினோத், அனில்தத்தாவை 21-13,21-12 என்ற கணக்கில் வென்று தமிழ்நாட்டுக்கு 2-0 என்ற முன்னிலை தேடித்தந்தார்.

மூன்றாவது போட்டியில் ரவி நாராயணன், நிதின் குமாரை 21-8, 21-11 என்ற கணக்கில் வென்றதன் மூலம் 3-0 என்ற கணக்கில் முதல்சுற்றுப் போட்டியில் தமிழ்நாடு வென்றது.

தற்போதைய சாம்பியன் பெங்கால், பாண்டிச்சேரியுடன் மோதியது. முதல் இரண்டு போட்டிகளில் பெங்கால் எளிதாக வென்றது.