போலி பாஸ்போர்ட்டைக் கண்டுபிடிக்க நவீன சாதனம்

சென்னை:

சென்னை விமான நிலையத்தில் உள்ள விசா மற்றும் பாஸ்போர்ட் வழங்கும் பிரிவுக்கு போலி ஆவணங்களைக் கண்டுபிடிக்கும் வீடியோ சாதனம்செவ்வாய்க்கிழமை வழங்கப்பட்டது.

ரூ 8 லட்சத்து 60,000 மதிப்புள்ள இந்த வீடியோ சாதனத்தை காமன்வெல்த் மற்றும் பிரிட்டிஷ் வெளியுறவுத் துறை அமைச்சர் பீட்டர் ஹெய்ன் வழங்கினார்.சென்னை விசா மற்றும் பாஸ்போர்ட் பிரிவு முதன்மை அலுவலர் ஆசிஷ் பென்காரா வீடியோ சாதனத்தைப் பெற்றுக் கொண்டார்.

பின்னர் ஹெய்ன் பேசுகையில், வெகு விரைவில் லண்டனிலுள்ள ஹீத்ரூ விமான நிலையத்திலும் இது போன்ற போலி ஆவணங்களைக் கண்டுபிடிக்கும் வீடியோசாதனம் பொருத்தப்படும். அங்கு மட்டுமின்றி, லண்டனிலுள்ள பிற விமான நிலையங்களிலும் இந்த சாதனத்தைக் கொண்டு போலி பாஸ்போர்ட்கள் மற்றும்விசா தொடர்பான போலி ஆவணங்களைக் கண்டுபிடிக்கத் திட்டமிட்டுள்ளோம் என்றார்.

பென்காரா பேசுகையில், இந்தியாவிலேயே முதல்முதலாக சென்னை விமான நிலையத்தில் இந்த வீடியோ சாதனம் நிறுவப்படுகிறது. சென்னை விமானநிலையத்தில் ஒரு வாரத்திற்கு சராசரியாக 12 க்கும் மேற்பட்ட போலி ஆவணங்கள் புலனாய்வு செய்து கண்டு பிடிக்கப்படுகின்றன என்றார்.

யு.என்.ஐ.