புது வெப்சைட்டைத் துவக்கி வைத்தார் முதல்வர்

சென்னை:

சென்னை ஆன் லைன் என்ற பெயரிலான புதிய தமிழ் வெப்சைட்டை முதல்வர் சென்னையில் துவக்கி வைத்தார்.

சென்னை தலைமை செயலகத்தில் வெள்ளிக்கிழமை நடந்த எளிய விழாவில் சென்னை ஆன் லைன் என்ற தமிழ் வெப் சைட்டை துவக்கி வைத்து முதல்வர்பேசினார்.

அவர் பேசுகையில், சென்னை ஆன் லைன் 1998-ம் ஆண்டு முதல் அப்பணாசாமியை ஆசிரியராகக் கொண்டு ஆறாம் திணை என்ற தமிழ் மின் இதழை சிறப்பாகநடத்தி வருகிறது. இது தமிழ் மொழி வளர்ச்சிக்கு பெரிதும் பணியாற்றி வருவது குறித்து மகிழ்ச்சி அடைகிறேன்.

இப்போது சென்னை ஆன் லைன் ஆங்கிலத்தில் நடத்தி வரும் வலை தளத்திற்கு இணையாக சென்னை ஆன் லைன் என்ற முழுதுமான தமிழ் வலை தளத்தை இணையத்தில்தொடங்குவது குறித்து மகிழ்ச்சி அடைகிறேன். இந்த இணையத் தளத்தை என்னைக் கொண்டு துவங்க வைத்ததற்காக என் நன்றியை தெரிவித்துக்கொள்கிறேன்.

இணையத்தின் பெரும்பாலான வசதிகள் ஆங்கிலம் தெரிந்தவர்களுக்குத்தான் உள்ளது. ஆங்கிலத்துக்கு இணையாக தமிழ் வலை தளங்களுக்கு எல்லா வசதிகளும்கிடைக்க வேண்டும் என்ற தமிழக அரசின் கொள்கையை அடிப்படையாக இந்த தளம் தொடங்கப்படுவது வரவேற்கத்தக்கது என்றார்.