கூலிங்கிளாஸ் அணிந்த குறுந்தொகையே!

ஊராளும்
உத்தமனே!
உன் பெயர் சொல்லி - தன்
உச்சந்தலையில் - தினம்
பூசாத்தி மகிழும் - பெண்ணரசி
ராசாத்தி துணைவா- இரு
நங்கையர் திலகங்களுக்கும்- நீ
நெடுங்காலம் துணை வா!

அமைதிப்பூங்கா
சிம்மாசனத்திலும்: தமிழ்ச்சனத்தின் தமிழ்ச்
சனத்தின் மனத்திலும்...
கொலுவமர்ந்து - செங்
கோலோச்சும் தலைவா!
உனக்கும் சோம்பலுக்கும்
ஓராயிரம் கல் தொலைவா?

வேலையில் மூழ்கிவிட்டால் - உன்
விழிகள் தூங்கா:
நாட்டவர் நலத்தை - உன்
நினைப்புக்கள் நீங்கா: உன்
கோட்டை மேசையில்
கோப்புக்கள் தேங்கா: உன்னால்
ஆனதய்யா- தமிழ் பூமி
அமைதிப் பூங்கா!

நீ
ஏ.எம். முதல்
பி.எம். வரை
சலிக்காது உழைக்கும்
சி.எம்.

நீ தேசுமிகு - தமிழ்த்
தேயம் - தனைக்காக்கச்
சிலிர்த்து நிற்கும்
சீயம்!

முத்தமிழ் வித்தகமே! கால்கள்
முளைத்து நடக்கும் முப்பால் புத்தகமே!
நீ
நாடாளுகின்றாய்
நான்காம் தடவை:
உன்னை- இனி
வெல்லுமோ புடவை?

நிச்சயம்
நாளைய தேர்தல் - இந்த
நான்கை ஆக்கும் ஐந்தா! நீயேதான்
அடுத்த முதல்வன் அஞ்சுகம் மைந்தா!
விந்தையே
தலைமுறை
தலைமுறையாய்த்
தலைவனாயிருந்தும்
தலைகனக்காத விந்தையே! மாநகரத்
தந்தையின் தந்தையே!

உன்னால் தான் உண்டானது
உழவர் சந்தையே: இனி
உழவர் பெருமக்கள்-
உடுத்த மாட்டார்கள் கந்தையே!

உன்னால்தான் உண்டானது
உழவர் சந்தையே: இனி
உழவர் பெருமக்கள் -
உடுத்த மாட்டார் கந்தையே!

சதா சர்வகாலமும்
மக்கள் பக்கம்தான்
மன்னா! உன் சிந்தையே:
என்ன செய்யும்?
வசவாளர் உன்மேல்
வீசுகின்ற நிந்தையே!

சதா சர்வகாலமும்
மக்கள் பக்கம்தான்
மன்னா! உன் சிந்தையே:
என்ன செய்யும்?
ஏது செய்யும்?
வசவாளர் உன்மேல்
வீசுகின்ற நிந்தையே!

சிலர்
வாய்ப்புளிக்கச் சொல்லுவார்
வந்தபின் பார்ப்போம்! என்று
வள்ளலே ! நீதான் சொன்னாய்
வருமுன் காப்போம் என்று!