கருணாநிதியே மீண்டும் முதல்வர்.. கூறுகிறது ம.தி.மு.க

பாபநாசம்:

நடைபெற உள்ள சட்டமன்ற தேர்தலில் தி.மு.க.வெற்றி பெறுவது உறுதி என்று ம.தி.மு.க. அவைத்தலைவர் எல்.கணேசன் தெரிவித்தார்.

பாபநாசம் ஒன்றிய நகர, ம.தி.மு.க.செயல்வீரர்கள் கூட்டத்திற்கு வந்த மாநில அவைத்தலைவர் எல்.கணேசன் கூறியதாவது:

மத்திய அரசிடம் எவ்வித நிபந்தனையுமின்றி, எவ்வித ஆர்ப்பாட்டமும் இன்றி தமிழகத்திற்கும், தமிழக மக்களுக்கும், தீப்பெட்டி தொழிற்சாலை,சேதுசமுத்திர திட்டம் போன்ற பல திட்டங்களை பெற்றுத் தந்த இயக்கம் ம.தி.மு.க. இந்த பெருமை கழகப்பொதுச்செயலாளர் வைகோவையே சாரும்.

வரும் தேர்தலில் ம.தி.மு.க. அதிக இடங்களைக் கேட்கும். ஆனால் ஆட்சியில் பங்கு கேட்காது. கலைஞர் கொடுக்கும் இடங்களைப் பெற்றுக்கொள்வோம்.

தமிழகத்தில் வரும் சட்டசபைத் தேர்தலில் தி.மு.க.கூட்டணியே வெற்றி பெறும். கருணாநிதியே தமிழகத்தின் அடுத்த முதல்வர் என்றார் எல்.கணேசன்.