திமுக கூட்டணியிலிருந்து ஹாருன் கட்சி விலகியது

சென்னை:

திமுக கூட்டணியில் இடம் பெற்றிருந்த தமிழக முஸ்லீம் ஐக்கிய ஜமாத் கட்சி கூட்டணியிலிருந்து விலகியது.

தமிழக முஸ்லீம் ஐக்கிய ஜமாத் கட்சி திமுக கூட்டணியில் இருந்து விலகுவதாக அதன் தலைவர் ஜே.எம்.ஹாருன்அறிவித்தார்.

இவர் கடந்த சட்டசபைத் தேர்தலுக்கு முன்பு தமாகாவிலிருந்து விலகி தனிக் கட்சி தொடங்கினார். பிறகு திமுகவுடன்கூட்டணி வைத்து, அந்தக் கட்சி 3 தொகுதிகளில் போட்டியிட்டது. ஆனால் ஒன்றிலும் வெல்லமுடியவில்லை.

இதைத்தொடர்ந்து கட்சியின் செயற்குழுக் கூட்டம் நேற்று (புதன்கிழமை) சென்னையில் நடந்தது. கூட்டம்முடிந்ததும் ஹாருன் நிருபர்களுக்குப் பேட்டியளித்தார். அப்போது அவர் கூறியதாவது:

செயற்குழுக் கூட்டத்தில் திமுக கூட்டணியிலிருந்து விலகுவது என்று முடிவெடுக்கப் பட்டது. பாரதீய ஜனதா இடம்பெற்றிருக்கும் கூட்டணியில் பங்கேற்றதால்தான் கட்சி கடந்த தேர்தலில் தோற்றது என கூறப்பட்டது.

எனவே ஜமாத் அந்தக் கூட்டணியிலிருந்து விலகிக் கொள்கிறது. இனிமேல் அரசியலுக்கு அப்பாற்பட்ட சமூகநலஇயக்கமாக நாங்கள் செயல்படுவோம் என்று அவர் கூறினார்.

விரைவில் ஹாருன் காங்கிரசில் சேரப்போவதாகக் கூறப்படுகிறது.