மூப்பனார் உடல் நலம் பெறக் கோரி சர்வ மத பிரார்த்தனை

சென்னை:

தமிழ் மாநில காங்கிரஸ் தலைவர் மூப்பனார் விரைவில் உடல் நலம் பெற வேண்டும் என்று தமிழக காங்கிரஸின்வர்த்தகர் பிரிவு சார்பில் இன்று (வெள்ளிக்கிழமை) காலை சர்வ மத பிரார்த்தனை நடைபெற்றது.

முதுகு வலி காரணமாகக் சுமார் ஒரு மாத காலமாக போரூர் ராமச்சந்திரா மருத்துவமனையில் சிகிச்சை பெற்றுவருகிறார் மூப்பனார். அவருக்கு அறுவைச் சிகிச்சையும் நடந்தது.

முதல்வர் ஜெயலலிதா, திமுக தலைவர் கருணாநிதி உட்பட பல அரசியல் கட்சித் தலைவர்களும், நண்பர்களும்,மருத்துவமனைக்குச் சென்று மூப்பனாரின் உடல் நலம் விசாரித்தனர்.

இந்நிலையில், மூப்பனார் விரைவில் குணம் பெற வேண்டும் என்பதற்காக, வர்த்தகர் பிரிவு தலைவர் வசந்தகுமார்,சர்வ மத பிரார்த்தனைக்கு ஏற்பாடு செய்திருந்தார்.

அவரது தலைமையில் இன்று காலை 11 மணியளவில் இந்த சர்வ மத பிரார்த்தனை வர்த்தகர் பிரிவு காங்கிரஸ்தலைமையகத்தில் நடைபெற்றது.